Գոնե սա կարող եք չէ՞
ԱԺ-ում շարունակվում է հաջորդ տարվա գլխավոր ֆինանսական փաստաթղթի քննարկումները։ Ամեն տարի այս գործընթացը «դե ժա վյու» է առաջացնում, հայրենի պաշտոնյաները գալիս ու խոստանում են տքնել այնպես վերաբաշխել սուղ ֆինանսները, որպեսզի հնարավորինս բարեկեցիկ դառնա շարքայիններիս կյանքը, պետական համակարգի ներկայացուցիչներն էլ ամեն տարի հայտարարում են, թե կրճատել են իրենց ծախսերը եւ բյուջեից քիչ փող են ստանալու, քան նախորդ տարի։ Հետո, բնականաբար, պարզվում է հակառակը, ու մամուլում հայտնվում է պաշտոնյաների՝ բյուջեի հաշվին գլխապտույտ ծախսերի, մի քանի հարյուր հազարի հասնող կոնյակների նախասիրության, թանկ ավիատոմսերի եւ այլնի մասին։ Այդպիսի մի հայտարարություն էլ արվեց ՀՀ նախագահի աշխատակազմի ղեկավար Արմեն Գեւորգյանի կողմից, նախագահականին հատկացվող ֆինանսները պակաս են լինելու նախորդ տարվանից։ Նվազումը պայմանավորված է նրանով, որ նախագահի կարգադրությամբ լուծարվել է ազգային անվտանգության խորհրդի աշխատակազմը եւ այն դարձել է նախագահի աշխատակազմի ստորաբաժանում, պարզ ասած՝ մեծ ախորժակը դեռ պահպանվում է... Դիտարկմանը, որ 2017 թվականին կայանալիք խորհրդարանական ընտրություններից հետո նախագահի ինստիտուտն առաջնային չի լինելու, ուստի ճիշտ կլիներ, որ նախագահի աշխատակազմում էլի կրճատումներ լինեին, Արմեն Գեւորգյանը հակադարձեց. «Համակերպվեք այն մտքի հետ, որ հանրապետության նախագահի ինստիտուտը լիարժեք աշխատելու է այսօրվա Սահմանադրության սկզբունքներով մինչև 2018 թվականի ապրիլը», Սերժ Սարգսյանի ղեկավարած կառույցի պաշտպանությունը ամբողջ հոգով իր վրա վերցրեց Ռոբերտ Քոչարյանի երբեմնի հավատարիմ մարդկանից մեկը։ «Խնայողությունը խնայողություն, բայց չինովնիկները տասնյակ կիլոմետրեր հեծանիվով չեն գնալու» նեղսրտեց Կառավարության աշխատակազմի ղեկավար, նախարար Դավիթ Հարությունյանը։ Նրա խոսքով, նախարարների տեղակալների համար նախատեսված են ծառայողական մեքենաներ։ Նույնիսկ եթե նրանցից որեւէ մեկը ցանկանա աշխատանքի գնալ հեծանիվով, բարդ է ենթադրել, որ նրանք հեծանիվով նաեւ ծառայողական ուղեւորությունների մեկնեն, նկատեց Հարությունյանը։ «Չեմ կարծում, որ մենք կարող ենք մեզ նման ճոխություն թույլ տալ»,- հեգնեց Հարությունյանը։ Բայց կարող եք չէ՞, ասենք, մի քանի հազար դոլար արժողությամբ շքեղ մեքենաներով չշրջել, բենզինի ավել «չեկեր» դուրս չգրել բյուջեի հաշվին, կամ ավտոմեքենաները վերանորոգելը ոչ «հրաշագործ» վարպետներին չվստահել, որոնց ծառայությունների դիմաց աստղաբաշխական թվեր են դուրս գրվում։ Գոնե սա կարող եք չէ՞։Թե՞ որոշ պաշտոնյաների մարմնի փափուկ մասերը կնեղանան։ Պարզվեց նաեւ խորհրդարանի բյուջեն են ճշգրիտ հաշվարկել ու ափառ-ցփեռ գումարներ չեն վատնելու։ Առհասարակ այսօր խորհրդարան եկած չինովնիկները աչքի ընկան իրենց «զսպվածությամբ»։ Հատուկ քննչական ծառայության պետի տեղակալ Վլադիմիր Հովհաննիսյանին սադրել ոչ մի կերպ հնարավոր չստացվեց։ Հանրության մոտ ձեւավորված տպավորությունը, որ իրավապահ համակարգը միայն ոչ խոշոր ձկներին է բռնում, խոշոր մեղավորներն այդպես էլ անպատիժ են մնում,, նա չընդունեք, բայց չկարողացավ հակառակ օրինակն էլ բերել։ Արձագանքելով դիտարկմանը, թե ՊՊԾ գնդի գրավումից շուրջ երեք ամիս անց էլ, երբ մամուլում բազմաթիվ հրապարակումներ են եղել, մասնավորապես՝ ՀՀ ոստիկանապատի թիկնազորի գործողությունների մասին, որևէ մեկը պատասխանատվության չի ենթարկվել, Հովհաննիսյանը նշեց, որ նախաքննությունը դեռևս շարունակվում է, նախնական քննության տվյալների հրապարակման անթույլատրելիությունը սահմանող հոդվածի համաձայն՝ նախնական քննության տվյալները կարող են հրապարակվել բացառապես վարույթ իրականացնող քննիչի թույլտվությամբ: Անի Սահակյան