«Իվանիշվիլին հարկադրված կհեռանա». Սաակաշվիլի

Sputnik լրատվական գործակալության փոխանցմամբ՝ Վրաստանի նախկին նախագահ Միխեիլ Սաակաշվիլին նախկին վարչապետ, իշխող «Վրացական երազանք-Դեմոկրատական Վրաստան» կուսակցության հիմնադիր, միլիարդատեր Բիձինա Իվանիշվիլուն մեղադրել է Վրաստանի խորհրդարանական ընտրությունները կեղծելու համար։ Հոկտեմբերի 30-ին Վրաստանի 73 միամանդատ օկրուգներից 50-ում անցկացվել է խորհրդարանական ընտրությունների երկրորդ փուլը, որի արդյունքներով «Վրացական երազանքը» հաղթել է դրանցից 48-ում։ Սաակաշվիլին Facebook-ի իր էջում գրել է. «Երեկվա երկրորդ փուլը անցկացվեց ճիշտ այնպես, ինչպես ես ենթադրել է և զգուշացրել է բոլորին՝ զանգվածային կեղծմամբ։ Իվանիշվիլին օտար դիտորդների բացակայության պայմաններում անգամ գումարներ չծախսեց «կարուսելների» վրա և շատ տեղերում պարզապես նկարեց թվեր։ Նման հանդուգն ու մասշտաբային կեղծիքների մասին չի կարողացել երազել անգամ Շևարդնաձեն»։ Սաակաշվիլին վստահություն է հայտնել, որ Իվանիշվիլին ամեն դեպքում հարկադրված կլինի հեռանալ, քանի որ դա կլինի վրաց ժողովրդի կամքը, ինչի համար էլ անհրաժեշտ է ժողովրդի կամքն իրագործել խաղաղ ճանապարհով։