Էրդողանն`ընդդեմ լրագրողների

Թուրքիայի նախագահ Ռեջեփ Թայիփ Էրդողանը մտադիր է լրագրողների դեմ հարուցած դատական գործերը, որոնք բացահայտել են Անկարայի և ԴԱԻՇ-ի միջև կապերը, վերածել «ցուցադրական գործընթացի», ինչը կստիպի մամուլի մյուս ներկայացուցիչներին դադարել լույս սփռել կառավարության գործունեության վրա, գրում է գերմանական Frankfurter Allgemeine Zeitung-ը: Էրդողանի ծրագրի համաձայն՝ Ջան Դյունդարի և Էրդեմ Գյուլի ճակատագիրը, որոնք հրապարակել են տեղեկատվություն այն մասին, որ Թուրքիան զենք է մատակարարում Սիրիայի ջիհադիստներին, պետք է երկար մնա թուրք ժողովրդի հիշողության մեջ: Այսպիսով՝ այս երկու լրագրողների գործով վճիռը կդատապարտի նաև Թուրքիայում ազատ մամուլը, ընդգծում է պարբերականը: Հատկանշական է, որ մեկնաբանելով երկու լրագրողների ձերբակալությունը՝ Էրդողանը հասկանալ տվեց, որ, մեծ հաշվով, նշանակություն չունի՝ թուրքական բեռնատարները ինչ են տեղափոխում Սիրիա՝ զե՞նք, թե՞ հումանիտար օգնություն: Նա նաև չի ժխտել, որ Cumhuriyet թերթի հրապարակումները լիովին հիմնված են փաստերի վրա, այլ շեշտադրել է, որ այդ դրանք չպետք է ի հայտ գային, քանի որ ոչ մեկն իրավունք չունի մատնանշել կառավարության մեքենայությունները՝ գրում է պարբերականը: Այս գործընթացը կսահմանի նոր չափորոշիչներ թուրքական զանգվածային լրատվամիջոցների համար: Եթե լրագրողները դատապարտվեն, ապա մեկընդմիշտ վերջ կդրվի Էրդողանի գործողությունների վերաբերյալ բացահայտումներին, և երկիրը, որը պարուրված է ստի սարդոստայնում, ևս մեկ քայլով կմոտենա բռնապետությանը՝ եզրափակում է հոդվածի հեղինակը: