18 միջազգային կազմակերպություններ Ադրբեջանին կոչ են արել վերջ տալ մարդու իրավունքների խախտումներին

14:00 - 29/հոկտեմբերի/2016

Միջազգային իրավապաշտպան կազմակերպությունների կոալիցիան Ադրբեջանի կառավարությանը կոչ է արել վերջ տալ քաղաքացիական հասարակության դեմ իրականացվող հալածանքներին և մարդու իրավունքների պաշտպանության ոլորտում իրական բարեփոխումներ ձեռնարկել: Այս մասին հայտնում է azadliq.info լրատվական կայքը: Կազմակերպություններն Ադրբեջանի կառավարությանը դիմել են հատուկ նամակով, որում ասվում է. «Մենք լուրջ մտահոգված ենք այն բանի համար, որ Ադրբեջանում հետապնդման են ենթարկվում բոլոր նրանք, ովքեր քննադատում են կառավարությանը: Բացի այդ, միջազգային կազմակերպությունների խորհուրդը պահանջել է Ադրբեջանի կառավարությունից չեղարկել օրենսդրական բոլոր սահմանափակումները, որոնք կաթվածահար են անում քաղաքացիական հասարակության գործունեությունը, սակայն ոչ մի դրական քայլ չի նկատվում այդ հարցում: Շատ հասարակական կազմակերպությունների առաջնորդներ կանգնած են իրական վտանգի և սպառնալիքի առջև, շատ ակտիվիստներ դեռևս ձերբակալված են կեղծ մեղադրանքներով»: Նամակում նշվում է նաև, որ կազմակերպությունների խորհրդի փորձագետները վերջին շրջանում Ադրբեջանի նախագահի կողմից հաստատված ազատականացմանը և ժողովրդավարացմանը միտված հրամանագրերը համարում են ոչ լուրջ և կոսմետիկ՝ գնահատելով, որ դրանք արված են միայն միջազգային դոնորներից դրամաշնորհներ ներգրավելու նպատակով:

Նամակը ստորագրվել է Article 19, Bankwatch Network, Crude Accountability, Freedom Now, Helsinki İnsan Hüquqları Fondu, İnsan Hüquqları Evləri Fondu və Senzura İndeksi, Helsinki Niderland Komitəsi, Norveç Helsinki Komitəsi, PEN-Amerika, Beynəlxalq PEN-club, Ընդդեմ խոշտանգումների համաշխարհային կազմակերպության և մի շարք այլ միջազգային իրավապաշտպան կազմակերպությունների կողմից: