Դեռ պարզ չէ՝ ՀՀԿ համագումարին Ծառուկյանը կհրավիրվի, թե ոչ

Հանրապետական կուսակցության նոյեմբերի 26-ի  համագումարը  տեղի է ունենալու  Կարեն Դեմիրճյանի անվան  մարզահամերգային համալիրում։  Հրավիրված կլինի մոտ  2000 հոգի,  որից 1800-ը ՀՀԿ պատվիրակներն են,  իսկ մոտ 200-ը՝ հյուր։ Պատվիրակների ընտրությունը դեռ չի ավարտվել, նաև հստակ որոշված չէ, թե  ովքեր են լինելու  հյուրերը։  «Հրավիրել ենք Չինաստանի կոմունիստական  կուսակցությանը,  Ռուսաստանի «Եդինայա Ռոսիային»  և ԵԺԿ-ին։  Կհրավիրենք նաև մեզ հետ համագործակցող և  մեր համակիր տեղական կուսակցություններին»,- «Հայկական Ժամանակի» հետ զրույցում ասել է  ՀՀԿ կազմակերպչական հանձնաժողովի  նախագահ  Ռուբեն Թադևոսյանը՝  չմանրամասնելով, թե   խոսքը որ կուսակցություններին է վերաբերում։  Նա հաստատել է, որ  կհրավիրվի ՀՅԴ-ն։ Իսկ թե «Բարգավաճ Հայաստան», «Օրինաց երկիր» կուսակցությունները կամ  նրանց ղեկավարներ  Գագիկ Ծառուկյանն ու  Արթուր Բաղդասարյանը կհրավիրվեն, Թադևոսյանը դժվարացել է պատասխանել։  «Կորոշենք, դեռ որոշված չէ,  այդ հարցերը չենք քննարկել։ Մեկ շաբաթից պարզ կլինեն մանրամասները»,- եզրափակել է նա։