ԵԽ-ում դատապարտել են Թուրքիային

Եվրոպայի խորհրդարանում Թուրքիայի մամուլի ազատության հարցով գումարված նիստի ժամանակ արձանագրվել է, որ երկրում ռազմական հեղաշրջման փորձից հետո լրագրողների վիճակն ավելի է վատացել, հաղորդում է Deutsche Welle-ի թուրքական ծառայությունը: Տարածաշրջանային քաղաքականության ԵՄ հանձնակատար Կորինա Կրետուն Թուրքիայում առկա դրությունը «մտահոգիչ և անընդունելի» է որակել` հորդորելով թուրքական կառավարությանը վերացնել մամուլի ազատության առջև դրված բոլոր խոչընդոտները: ԵԽ ամենամեծաքանակ խմբի` Քրիստոնեա-դեմոկրատների անունից խոսող գերմանացի խորհրդարանական Ռենատ Սոմերն ասել է, որ «Թուրքիայում խոսքի և մամուլի ազատություն չի մնացել և սկսվել է վհուկների որս»: ԵԽ սոցիալ-դեմոկրատների անունից ելույթ ունեցող Քաթի Փիրին, ով Թուրքիայի հարցով զեկուցող է, հորդորել է ազատ արձակել Թուրքիայում բանտարկված բոլոր լրագրողներին: «Լրագրողները բանտերում են ոչ թե գործած հանցանքների, այլ արտահայտած մտքերի պատճառով»,- նշել է նա: Կանաչների խմբակցության անունից հանդես եկող գերմանացի խորհրդարանական Ռեբեկա Հարմսն էլ հուլիսի 15-ի ռազմական հեղաշրջման փորձի գիշերն անվանել է Թուրքիայի «քաղաքական կյանքի ամենավատ պահերից մեկը»: Նիստից առաջ մամուլի ասուլիս է հրավիրել թուրքական «Ջումհուրիեթ» պարբերականի նախկին գլխավոր խմբագիր Ջան Դյունդարը, ում դեմ լրտեսության և պետական գաղտնիքները հրապարակելու մեղադրանքներով Թուրքիայում դատական գործ է հարուցված: Նա լրագրողների հետ զրույցում աջակցություն է խնդրել Թուրքիայում խոսքի և մամուլի ազատության համար: