Ծառուկյանին սպասելիս
Երեկ Գագիկ Ծառուկյանի տան մոտ կազմակերպված ակցիայից հետո ԲՀԿ-ականները սպասում են Ծառուկյանի պատասխանին: Ինչպես տեսանք տասնյակ քաղաքացիներ երթով գնացել էին ԲՀԿ նախկին ղեկավար Գագիկ Ծառուկյանի տան մոտ ու պահանջում էին Ծառուկյանի ակտիվ քաղաքականություն վերադարձը: ԲՀԿ նախկին ղեկավարին հեռացրեցին քաղաքական դաշտից մեկ տարի առաջ՝ համարելով նրան քաղաքական չարիք:
Սերժ Սարգսյանը ՀՀԿ խորհրդի նիստում ծավալուն անդրադարձ կատարեց ԲՀԿ-ին ու Ծառուկյանին, որին հետեւեցին շարքային ՀՀԿ-ականները՝Ծառուկյանի հասցեին արտահայտվելով անթույլատրելի բառապաշարով:
Քիչ առաջ ԱԺ ԲՀԿ խմբակցության քարտուղար Վահե Էնֆիաջյանը խորհրդարանում լրագրողների հետ զրույցում անդրադարձավ Գագիկ Ծառուկյանի տան մոտ երեկ անցկացված ակցիային՝ նշելով, որ ԲՀԿ-ականները սպասում են Ծառուկյանի պատասխանին: Այս պահի դրությամբ Ծառուկյանից արձագանք չկա, բայց իրենք հուսով են, որ առաջիկայում կլինի: Վահե Էնֆիաջյանը խոստովանեց, որ ոչ թե ցրվելու, այլ տարածքը լքելու կոչեր են եղել Գագիկ Ծառուկյանի կողմից: «Դա սխալ մեկնաբանություն էր: Տան անվտանգության աշխատակիցներն են այնտեղ եղել, տարածքի մուտքի հետ կապված խնդիր է եղել: Ես այդ ժամանակ տարածքում չեմ եղել, այդ խնդիրն իմ ժամանելուն պես մեծ հաշվով կարգավորվել է:ԲՀԿ-ականը ամբողջ հոգով վստահեցնում էր, որ Ծառուկյանի վերադարձի կարիք կա, քանի որ նրա մարդկային տեսակն ու որակը բավարար է, որ նա ներգրավվի քաղաքական դաշտում այն փոփոխությունների իրականացմանը, ինչի մասին բազմիցս բարձրաձայնվել է. «Եկեք մի քանի բան առանձնացնենք: Նախ, Գագիկ Ծառուկյանն ինչի՞ համար մի կողմ քաշվեց ակտիվ քաղաքականությունից: Գագիկ Ծառուկյանը, մենք շատ լավ գիտակցում էինք, որ եթե հասարակությանը փողոց հանեինք և հեղափոխական ճանապարհը մենք շարունակեինք փողոցում, արյունահեղություն էր տեղի ունենալու:Մենք ինքներս փոփոխությունների կարիքն արձանագրել ենք և հիմա էլ ենք արձանագրում, բայց ճանապարհներ կան, գործիքակազմ կա քաղաքական դաշտում, որից մենք չենք օգտվել և չենք օգտվի: Եվ եթե այնպիսի մարդիկ կան, որոնք հորդորում են կամ նման սպասելիքներ ունեն, մեծ հաշվով ոչ ոք նրանց ոչ ձեռքն է բռնել, ոչ էլ ոտքերն է կապել, կարող են նման ճանապարհով գնալ: Մենք նման ճանապարհով չենք գնացել, չենք էլ հորդորում, որ ինչ-որ մեկն այդ ճանապարհը համարի մեր պետության համար արդիական»,-ասաց Էնֆիաջյանը՝ օդում կախված թողնելով հարցը, թե Ծառուկյանի վերադարձի դեպքում արդյոք չի կրկնվելու նախորդ ճակատագիրը:
Հարցին, թե ԲՀԿ-ականների ակցիան շարունակակա՞ն է լինելու, պատգամավորը պատասխանեց, որ նախաձեռնողներն այս պահին սպասողական կեցվածք ունեն, և կախված Ծառուկյանի պատասխանից, չի բացառվում, որ նմանօրինակ նախաձեռնություններ ևս տեղի ունենան: Իրականում պարզ է, որ Գագիկ Ծառուկյանի վերադարձը լինելու է Սերժ Սարգսյանի թույլտվությամբ, ավելին՝ նրա ցանկությամբ ու որոշմամբ:
ԲՀԿ-ականներն էլ առանց այսպես կոչված լուրջ հիմքերի չէին լծվի Ծառուկյանի վերադարձի գործին: Հետեւաբար պետք չի մոլորեցնել նման կրկեսային բեմադրություններով, թե ժողովուրդն ունի Ծառուկյանի վերադարձի պահանջը: Այնպես որ կրկեսի վերածելու հայրենիք չունենք, պարոնայք, այլ ճանապարհ ընտրեք:
Անի Սահակյան
Լուսանկարը ֆոտոԼուրի