«Թանկագին ընկերները». նրա ձայնը կլսվի անգամ Սոչիում
Հալեպում եռօրյա հումանիտար հրադադարից հետո վերսկսվել են մարտերը, ռուսական օդուժի ինքնաթիռներն էլ վերսկսել են ռմբահարումները: Հալեպի թաղամասերի մի մասը գտնվում է նախագահ Բաշար ալ-Ասադի զորքի, մյուս մասն էլ նրան ընդդիմացող ջոկատների հսկողության տակ: Մյուս կողմից, Իրաքից ստացվող հաղորդագրությունների համաձայն, կառավարական զորքերը գրավել են ծայրահեղական - զինյալների վերահսկողության տակ գտնվող Մոսուլ քաղաք տանող ճանապարհի վրա տեղակայված վերջին գյուղը: Իրաքի զորքերը գրավել են Թալ Քայֆ գյուղը, որը Մոսուլից ընդամենը հինգ կիլոմետր է հեռու: Թուրքիայի վարչապետ Բինալի Յըլդըրըմն ասել է, որ Թուրքիան պատրաստ է «քայլեր ձեռնարկել» հյուսիսային Իրաքում, քանի որ Անկարային չեն բավարարում ԱՄՆ-ի խոստումները Մոսուլի ճակատամարտում քուրդ զինյալներին և շիա աշխարհազորայիններին հատկացվող դերի վերաբերյալ: «Թուրքիան չի կարող անտարբեր մնալ կոտորածների նկատմամբ, որոնք կարող են հանգեցնել փախստականների նոր ալիքի և սահմանային բախումների: Մենք քայլեր կձեռնարկենք, եթե դրանց անհրաժեշտությունն առաջանա», - նշել է Թուրքիայի վարչապետը: Այսպիսով, թուրքական հրետանին մասնակցում է ԴԱԻՇ ահաբեկչական խմբավորումից իրաքյան Մոսուլ քաղաքի ազատագրման գործողությանը։ Թուրքիայի նախագահ Ռեջեփ էրդողանը հայտարարել է, որ իրաքյան Մոսուլ քաղաքը, որը ներկայում գտնվում է ԴԱԻՇ ահաբեկչական խմբավորման գրոհայինների վերահսկողության տակ, ինչ-որ ժամանակ պատկանել է Թուրքիային։ «Պետք է հիշել, որ Իրաքը շատ հնագույն քաղաքներ է ունեցել։ Պատմականորեն նաև Քիրկուկն է մերը եղել»,-ասել է նա։ Էրդողանը քննադատել է Արևմուտքի գործողությունները՝ նշելով, որ արևմտյան երկրները մինչ օրս բառացիորեն ոչինչ չեն արել Իրաքի և Սիրիայի համար. «Նրանք դեռևս ոչինչ չեն արել, նրանք խանգարել են այնպիսի անկեղծ ժողովուրդների, ինչպիսին մենք ենք, անելու ինչ-որ բան»։ Էրդողանի խոսքով՝ եթե Միջազգային կոալիցիայի ուժերը Անկարայի հետ միասին գործեն, Թուրքիան կձեռնարկի բոլոր անհրաժեշտ քայլերը ԴԱԻՇ-ի դեմ սիրիական Ռաքքայի շրջանում: Այնուհետև, Էրդողանը հանդես է եկել ուշագրավ խոստովանությամբ... Ինձ անհրաժեշտ է իմ թանկագին ընկերոջ՝ Վլադիմիր Պուտինի աջակցությունը Մերձավոր Արևելքում ճգնաժամի և ահաբեկչության դեմ պայքարելու համար։ Էրդողանն այս մասին ասել է` «Իշխանության բանաձև» հաղորդման ժամանակ, որը հեռարձակվում է «Ռոսսիա-1» հեռուստաալիքով։ Նա նշել է, որ Ռուսաստանի հետ համագործակցության համար Թուրքիան պատրաստ է ձեռնարկել ցանկացած քայլ։ Էրդողանի խոսքով՝ Ռուսաստանը և Թուրքիան երկու բարեկամական պետություններ են տարածաշրջանում։ «Մեր աշխարհում առկա բարդությունները հաղթահարելու համար պետք է կենտրոնանանք խաղաղ գոյակցության վրա։ Գլխավոր արժեքը պետք է լինի մարդը, մարդիկ պետք է ապրեն խաղաղության մեջ։ Մենք իրարից գտնվում ենք ձայնի հեռավորության վրա։ Եթե գոռամ, իմ ձայնը կլսվի Սոչիում, եթե ինձ դիմեն Սոչիից, ես կլսեմ, ահա, թե որքան մոտ ենք իրար։ Կարծում եմ պետք է միասին զբաղվենք խաղաղ գործընթացով, լինենք միասնական և համերաշխ»,-ասել է Թուրքիայի նախագահը, իսկ վերջում ռուսերենով շնորհակալություն է հայտնել։ Ի դեպ, հայտնի է դարձել, որ Ռուսաստանը «Եփրատի վահան» գործողության համար հետախուզական տվյալներ կփոխանցի Թուրքիային: Ռուսական «Իզվեստիա» թերթի փոխանցմամբ՝ այդ մասին թերթին հայտնել է ռազմադիվանագիտական իրազեկ աղբյուրը՝ ընդգծելով, որ համապատասխան պայմանավորվածությունը ձեռք է բերվել ոչ վաղ անցյալում Ռուսաստանի ղեկավարության կողմից Թուրքիա կատարած այցի ժամանակ։ Աղբյուրը մանրամասնել է, որ ռուսական պատվիրակության կազմում գտնվել է նաև Ռուսաստանի զինված ուժերի Գլխավոր շտաբի պետ Վալերի Գերասիմովը, որը բանակցել և հետախուզական տվյալների փոխանակման շուրջ պայմանավորվել է իր թուրք գործընկեր Հուլուսի Աքարի հետ։ Կողմերը քննարկել են, թե կոնկրետ ինչպիսի տեղեկատվություն և ինչպիսի ձևաչափով տվյալներ են փոխանցվելու։ Ռուսաստանի Դաշնության խորհրդի ներկայացուցիչ Ֆրանց Կլինցևիչն իր հերթին թերթին հայտնել է, որ Թուրքիան ոչ բարձրաձայն միացել է Ռուսաստանի, Իրանի, Սիրիայի ու Իրաքի ստեղծած հետախուզական տվյալների փոխանակման գործընթացին։ Ահա, մերձավորարևելյան ճգնաժամերի պայմաններում` Թուրքիան ու Ռուսաստանը, չնայած Սիրիայի խնդրում պահպանվող տարաձայնությունների պայմաններում, ամեն առիթով արժևորում են միմյանց կարևորությունը: Մետաքսյա Շալունց
Հետևեք մեզ Viber-ում
