Առուն չթռած հոպ մի՜ ասա

Կարեն Կարապետյանի վարչապետ նշանակվելուց անմիջապես հետո ՀՀԿ-ականներից շատերը հազար թումանով իր տեղն ապահոված սպասում էր մինչեւ ջրերը կպարզվեն, իրավիճակում հստակություն կմտնի: ՀՀԿ-ականները նոր կառավարության, անկուսակցական վարչապետի մասին խորշում էին կարծիք հայտնել, առավել եւս պաշտպանել քննադատներից: Հիմա նրանց դեմը առնել չի լինում Կարեն Կարապետյանի երկու օր առա ջ արված հայտարարությունից հետո: Հայաստանյան հեռուստաընկերություններին տված հարցազրույցում վարչապետը հայտարարել է, որ որևիցե պատասխանատվություն չի հանում իր վրայից իր ասածների համար կամ փորձում բարդել իշխող Հանրապետական կուսակցության վրա: «Ես, իհարկե,պատասխանատու եմ, և ես չեմ ուզում իմ պատասխանատվության մի մասը Հանրապետական կուսակցության վրա բարդել: Իրենք ինձ հետ համապատասխանատու են, և ես ինձանից որևիցե պատասխանատվություն չեմ հանում»,- ասել է Կարեն Կարապետյանը: Այսպիսով՝ դրսից կանչված վարչապետը որոշակիություն է մտցրել իր եւ ՀՀԿ-ի հարաբերությունների միջեւ՝ ցրելով խոսակցությունները, թե ապագայում ՀՀԿ-ն լուսանցք է մղվելու եւ Կարապետյանը ասպարեզ է բերելու թիմակիցներին, յուրայիններին: Հակառակ դրանց վարչապետը ակնարկել է, որ ինքն ու ՀՀԿ-ն նույն հարթությունում են: Հենց այս հայտարարությունից հետո էլ Առաքել Մովսիսյանը՝ Շմայսի բացառիկ հանդիսավորությամբ իր աշխատասենյակում զրուցել է լրագրողների հետ ու մինչեւ վերջին խազը պաշտպանել Կարապետյանին. «Ես ուզում եմ քննադատեն, բայց էս մարդը նորա եկել, եկեք աջակցենք, կարողա ստացվումա իր մոտ: Եթե նախագահն աջակցումա իրեն, նշանակումա ստացվելուա ամեն ինչ: Չեմ գտնում որևէ մեկն ի վիճակի կլինի նախագահի խոսքից անցնել: Վարչապետի համեստությանը մի խաբնվեք, ոչ էլ հագուկապին», – հեղինակավոր կարծիք է հայտնել նա հետո էլ անցել Հանրապետականի պաշտպանությանը. «Կարող ա՞ գիտեք Հանրապետականը վարկաբեկված ա, ձեր իմացած մյուս թիմերն էլ եսիմ ինչ են: Ժողովրդի քանակով նայեք դուք՝ Հանրապետականի կողմն ինչքան մարդ կա, նրանցը՝ ինչքան։ Դուք անընդհատ շեշտում եք, որ Հանրապետական ա չիմանան․․․ Թաքուն բան չկա ստեղ, մենք չենք էլ ամաչում, որ Հանրապետական ենք, սաղից լավ ենք զգում մեզ, քանի որ մեր կուսակցության թասիբն ավելի հզոր ա»,-ասել է իշխանության ներկայացուցիչը։ Պարզ երևում է, որ Շմայսին հուսադրել են ապագայի հարցում, նա էլ ծանր հրետանի բառապաշարը խոդ է տվել ու տրվել թիմակիցների պաշտպանելու գործին՝ չհասկանալով, որ վաղ է <<հոպ>> ասել, առուն թռնելուն դեռ շատ կա: Եթե Շմայսին ու բախտակիցներին խոստացել են, որ ամեն ինչ <<օք>> է ու առաջիկա տարիներն էլ ՀՀԿ-ականներինն է լինելու, դա դեռ չի նշանակում, որ նրանք տեղ են ունենալու այդ երկնակամարում: Ընտրություններին դեռ ամիսներ կան, իսկ եթե բանը հասնի ընտրություններին, ապա պետք է ամենքը սեփական եղունգով գլուխը քորի՝ ռեյտինգային քվեարկության ժամանակ ապահովելով բարձր ձայներ: Անի Սահակյան