Ուզում է հանդիպել Սարգսյանին, որ ի՞նչ ասի
ԵԱՀԿ Մինսկի խմբի համանախագահները սկսել են իրենց տարածաշրջանային այցն Ադրբեջանից, որից հետո ակնկալվում է համանախագահների այցը Հայաստան և Լեռնային Ղարաբաղ: ԵԱՀԿ Մինսկի խմբի ամերիկացի համանախագահ Ջեյմս Ուորլիքը Բաքվում տեղի ունեցած ասուլիսում հաղորդել է, որ Ադրբեջանի նախագահ Իլհամ Ալիևը պատրաստ է հանդիպել իր հայ պաշտոնակից Սերժ Սարգսյանի հետ: «Ես անձամբ եմ զրուցել նախագահ Ալիևի հետ, նա հավաստիացրել է, որ հավատարիմ է Լեռնային Ղարաբաղի հակամարտության խաղաղ կարգավորմանը և պատրաստ է հանդիպել Հայաստանի ղեկավարին», - ասել է Ուորլիքը և հավելել. - «Մենք կքննարկենք նախագահների հաջորդ հանդիպումը կազմակերպելու հարցը»: Ուորլիքը Բաքվում մամլո ասուլիսում նշել է, որ ստատուս-քվոն կայուն չէ. «Մենք պետք է շարունակենք արդյունավետ աշխատել՝ գտնելու խաղաղ կարգավորման ուղիներ»։ Նա հավելել է, որ այսօր բանակցային սեղանին կան կարգավորման շատ տարրեր։ Ուորլիքի խոսքով՝ դեռևս չկա տեղեկություն Հայաստանի և Ադրբեջանի նախագահների առաջիկա հանդիպման մասին։ Համանախագահը հույս է հայտնել, որ երկու երկրների արտգործնախարարները կարող են հանդիպել Համբուրգում կայանալիք ԵԱՀԿ արտգործնախարարների խորհրդի հերթական հանդիպմանը։ Ուորլիքը նաև նշել է, որ տարածաշրջանում խաղաղության ժամանակն արդեն եկել է։ «Երկու երկրների երեխաները պետք է խաղաղ ապրեն և դրան անհրաժեշտ է հասնել բանակցություններով»,-հավելել է նա։ Ուորլիքը հայտնել է նաև, որ վերջերս նրանք Մոսկվայում էին և քննարկել են այդ հարցը Ռուսաստանի արտգործնախարար Սերգեյ Լավրով հետ. «Մենք հավատարիմ ենք մնում հակամարտության կարգավորման ընդհանուր ջանքերին»։ Բաքվից, ըստ պաշտոնական տեղեկատվության` Ադրբեջանի նախագահ Իլհամ Ալիևը կիրակի օրն ընդունել է ԵԱՀԿ Մինսկի խմբի համանախագահներին: Ըստ Ադրբեջանի նախագահի մամլո ծառայության`ուրբաթ գիշեր համանախագահները ժամանել են Բաքու: «Ադրբեջանի նախագահ Իլհամ Ալիևն ընդունել է ԵԱՀԿ Մինսկի խմբի համանախագահներ Ջեյմս Ուորլիքին (ԱՄՆ), Պիեր Անդրիոյին (Ֆրանսիա) և Իգոր Պոպովին (Ռուսաստան) և ԵԱՀԿ գործող նախագահի անձնական ներկայացուցիչ Անջեյ Կասպշիկին»,- ասվում է հաղորդագրության մեջ: Միայն նշվում է, որ հանդիպման ընթացքում կարծիքներ են փոխանակվել ԼՂ հակամարտության հարցով: Այն, որ Ուորլիքը հենց Բաքվում լրագրողներին հայտնել է, որ անձամբ զրուցել է Ալիևի հետ, նա հավաստիացրել է, որ հավատարիմ է Լեռնային Ղարաբաղի հակամարտության խաղաղ կարգավորմանը ու պատրաստ է հանդիպել Հայաստանի նախագահին, սա վկայում է այն մասին, որ համանախագահները Ալիևից նոր հանդիպման կազմակերպման համաձայնություն, ըստ ամենայնի, ստացել են: Պարզ չէ, թե համանախագահները ստացե՞լ են արդյոք Ալիևից իր իսկ պահանջների կատարման մասին տեղեկատվությունը: Խոսքը վերաբերում է սահմանային միջադեպերի ուսումնասիրության մեխանիզմների ներդրմանն ու ԵԱՀԿ առաքելության կազմի ընդլայնմանը: Այս առաջարկություններն ապրիլյան պատերազմից հետո համանախագահների կողմից սուր կերպով առաջ են քաշվել, մինչդեռ Ալիևը դրանց ոչ մի կերպ համաձայնություն չի տալիս: Հետևաբար` հարց է առաջ գալիս` Ալիևը համաձայնվել է հանդիպել Սարգսյանին, որ ի՞նչ քննարկեն: Հերթական հանդիպում` հանդիպման համա՞ր... Պարզ է, որ միջնորդները փորձում են ապահովել բանակցությունների շարունակականությունը, դա որոշակի երաշխիք է, որ սահմանում իրավիճակը դուրս չի գա վերահսկողությունից, սակայն ապրիլյան պատերազմից հետո հետաքրքիր է բանակցությունների առարկան: Կարճ ասած` Ալիևը տալո՞ւ է իր համաձայնությունը արդեն ամիսներ ձգվող առաջարկների վերաբերյալ: Թամար Բագրատունի