Կարեն Կարապետյանը կհրապարակի՞ իր հեռախոսահամարները

Վարչապետ Կարեն Կարապետյանի հայտարարությունը մի քանի հեռուստալրագրողների հետ հարցազրույցի ժամանակ, թե Հայաստանում այսուհետ ցանկացած ոք կարող է ցանկացած ապրանք ներմուծել, իսկ եթե կհանդիպի խոչընդոտների, թող ահազանգի, նոր ուժ ու եռանդ է տվել ՀՀԿ սազանդարներին: Վարչապետի խոսքը հաստատելու համար ԱԺ-ում այսօր նրանցից ամեն մեկը կաշվից դուրս էր գալիս անհնարինն անելու համար: «Եթե կա նման երևույթ, բնականաբար, պատասխանն ինչպիսի՞ն պետք է լինի` եթե կա երևույթ, դիմեք, խնդիրը հարթենք: Նույն պատասխանը նաև ես եմ տվել տարիներ առաջ, ամիսներ առաջ»,- Կարապետյանի խոսքը հաստատելով իր մասին էլ հիշեցրեց ՀՀԿ խմբակցության ղեկավար Վահրամ Բաղդասարյանը: Ուրեմն ստացվում է, որ մինչև հիմա նման երևույթներ չե՞ն եղել, որ ահազանգ չի ստացվել դիտարկմանը, ՀՀԿ-ականը պատասխանեց. «Նման դեպքերում ասում ենք՝ զանգեք: Մինչև այսօր զանգ չենք ստացել: Հիմա վարչապետը նույն բանը պետք է ասի, ասում է՝ եթե կան խոչընդոտներ, զանգահարեք, խնդիրը հարթենք»: Բաղդասարյանը մի պահ մոռացավ, որ հայտարարությունը ոչ թե ինքը, այլ վարչապետն է արել ու հպարտորեն խորհուրդ տվեց զանգահարել նման դեպքերում. «Թող զանգերը լինեն, և դրանից հետո հետևություններ կարվեն: Եթե չհարթվի, կարող եք այդ հարցը նորից բարձրացնել, թե` դուք խոստանում եք և չեք անում: Այսօրվա վարչապետը խոսքի մարդ է, և Հովիկ Աբրահամյանի ժամանակ էլ, եթե նման ահազանգեր եղել են, անմիջապես հետևություններն արվել են»,- ասաց նա: Վահրամ Բաղդասարյանն ամեն ինչ արեց, որպեսզի իրեն հեռու պահի նախկին եւ ներկա կառավարությունների համեմատականից ու ակամայից էլ ավելի բարդ պատմության մեջ հայտնվեց, ասաց, որ հանրության մոտ կա անորոշություն ապագայի նկատմամբ: ՙ«Այսօր դպրոցն ավարտած երեխայի, համալսարանն ավարտած երեխայի համար անորոշ է, թե ինչով պետք է զբաղվի: Մեր խնդիրը պետք է լինի որոշակիություն ստեղծելը՝ կարճաժամկետ, երկարաժամկետ: Այդ որոշակիությունը մտցնելը հավատի վերականգնումն է: Հավատի կորուստը գալիս է անորոշությունից: Մենք չենք թաքցրել, որ հասարակության յուրաքանչյուր ոք չգիտի՝ ինչով պետք է զբաղվի երկու կամ հինգ տարի հետո: Վարչապետը նոր բան չի ասել ասում է, որ պետք է հավատը վերականգնել: Այդ նույն բանը չեն թաքցրել նաև նախորդ վարչապետերը: Մենք ունենք խնդիր և պետք է հարթենք, չենք հաղթահարի, նորից կանենք հետևություններ»: ՀՀԿ-ականը, ստ էության անկեղծ խոստովանեց, որ կառավարությունն իր առջեւ խնդիր է դրել, ոչ թե տնտեսությունը փրկելու, այլեւ հոգեբանական օգնություն է ցույց տալու հավատը կորցրած ժողովրդին, որի վառ օրինակն էլ, ահավասիկ վերոնշյալ հայտարարությունն է առ այն, որ ներկրման ժամանակ առաջացած խոչընդոտների ժամանակ անմիջապես ահազանգեն Կարեն Կարապետյանին: Իհարկե, կարելի էր ոգեւորվել այս հայտարարությունից, եթե Կարեն Կարապետյանը հանրությանը տրամադրեր իր հեռախոսահամարները եւ անմիջապես պատասխաներ յուրաքանչյուրի զանգերին, գնալ խնդրի հետեւից: Եթե անի դա, ուրեմն կարելի է հավատալ թե Բաղդասարյանին, թե Կարեն Կարապետյանին, թե բոլոր իշխանավարոներին: Մինչդեռ ՀՀԿ-ական Համլետ Հարությունյանն անգամ չի թաքցնում, որ մենաշնորհներ կան ու Բաղդասարյանի նման պոպւլիզմով չի զբաղվում՝ եթե կան նման դեպքեր, ապա թող զանգեն: Հարությունյանն ասաց, որ վարչապետն իր հայտարարությամբ փաստեց, որ կա մենաշնորհ, որը պետք է վերացվի: Ո՞ւմ հովանու ներքո են գործել մենաշնորհներն ու օլիգարխիան, պատգամավորը ավելի քան անկեղծ պատասխանեց. «Բոլոր երկրներում էլ այդ պրոցեսները զարգանում են: Վայրի կապիտալիզմի ժամանակ այդ գործընթացները զարգանում էին: Կապիտալի նախնական կուտակումը հիմնականում հանցավոր ճանապարհով է ձեռք բերվել: Մենք սոցիալիզմից անցանք կապիտալիզմի, և տեղի ունեցավ վայրի սեփականաշնորհում: Մարդիկ որոնք օրվա հացի կարոտ էին, որոնք երկրորդ դասարանի կրթություն ունեին, միանգամից հարստացան: Կապիտալի այդ տեսակն իր հետ բերում է հանցավոր գործողություն, որովհետև դրանց տերերից շատերը չգիտեն էլ, որ այդ գործունեությունը հանցավոր ճանապարհ է»,- ասաց Հարությունյանը և հավելեց, որ ժամանակի ընթացքում իրավիճակը կզուլալվի, և կոռուպցիան, մոնոպոլիաները կնվազեն:   Անի Սահակյան