Օղակը սեղմվում է Պուտինի շուրջ

Բեռլինում կայացած Գերմանիայի, Ֆրանսիայի, Ուկրաինայի և Ռուսաստանի առաջնորդների հանդիպումը, ընդհանուր առմամբ 6 ժամ է տևել: «Նորմանդական քառյակի» ձևաչափով, Ուկրաինայի հարցով բանակցությունները հինգ ժամ շարունակվել են, այնուհետև առանց Ուկրաինայի նախագահի մասնակցության, Ֆրանսիայի, Գերմանիայի և Ռուսաստանի առաջնորդները քննարկել են Սիրիայի իրավիճակը: Անգելա Մերկելն ու Ֆրանսուա Օլանդը խիստ քննադատել են Վլադիմիր Պուտինին Սիրիայում ռուսական օդուժի ռմբահարումների համար և հրաժարվել են վերացնել Ռուսաստանի նկատմամբ կիրառվող պատժամիջոցները: Բանակցությունների ավարտից հետո Գերմանիայի կանցլեր Անգելա Մերկելը մամուլի ասուլիսում հայտարարել է, որ հանդիպմանը հրաշք լուծումների չհասան, բայց Ուկրաինայի հարցով ճանապարհային քարտեզը բոլոր կողմերին հնարավորություն կտա առաջ մղել Մինսկի համաձայնության իրագործումը: Պայմանավորվածություն է ձեռք բերվել, որ մինչև նոյեմբերի վերջը այդ ճանապարհային քարտեզը պետք է մշակվի: Մերկելը հայտնել է, որ առաջնորդները նաև քննարկել են Ուկրաինայի արևելքում հակամարտ կողմերի միջև բաժանարար գոտիներ ստեղծելու և հումանիտար իրավիճակը բարելավելու հարցերը: Մերկելը չափազանց կարևոր է համարել նման հանդիպումների անցկացումը՝ պահպանելու համար բանակցային ընթացքը: Ուկրաինայի նախագահ Պետրո Պորոշենկոն ասել է, որ ճանապարհային քարտեզը պետք է Մինսկի համաձայնությունների իրականացման հերթականություն ունենա և երաշխավորի դրանց իրագործումը: Պորոշենկոն նաև հայտնել է, որ համաձայնություն է ձեռք բերվել Դոնբասի շրջանում հակամարտ գծի չորս նոր հատվածներից դուրս բերել ուկրաինական զորքերն ու ռուսամետ անջատականներին: Պորոշենկոն ասել է, որ քննարկվել է նաև Ուկրաինայի արևելքում տեղական ընտրությունների անցկացման հարցը, որը հնարավոր կլինի անցկացնել անվտանգության պայմանները ապահովելու դեպքում: «Նորմանդական քառյակի» առաջնորդները նաև համաձայնել են Ուկրաինայի արևելքում զինված ոստիկանական առաքելության տեղակայմանը, թույլատրելով, որ ԵԱՀԿ դիտորդները զինված լինեն, ինչպես նաև տարածաշրջանում անարգելք մուտքի իրավունք ունենան: Պորոշենկոն սա կապել է նաև Ուկրաինայի տեղական ընտրությունների հետ, ասելով որ այդ առաքելությունը Ուկրաինայի արևելքում անվտանգություն կապահովի ընտրական գործընթացի ժամանակ, ինչպես նաև անցումային շրջանում: Ռուսաստանի նախագահ Վլադիմիր Պուտինը ասել է. «Հաստատել ենք, որ պատրաստ ենք ընդլայնել ԵԱՀԿ-ի առաքելության լիազորությունները ծանր տեխնիկայի հետքաշման և պահպանման հարցերում»: Հիշեցնենք, որ Մինսկի համաձայնությունները ձեռք են բերվել 2015-ի փետրվարին Բելառուսի մայրաքաղաքում: Մինչ բեռլինյան հանդիպումը Նորմանդական քառյակի առաջնորդների՝ Գերմանիայի կանցլերի, Ֆրանսիայի, Ուկրաինայի և Ռուսաստանի նախագահների վերջին հանդիպումը կայացել էր 2015-ի աշնանը: Սիրիայի հարցով բեռլինյան եռակողմ հանդիպման վերաբերյալ նշենք, որ մամուլի ասուլիսում Ֆրանսիայի նախագահ Ֆրանսուա Օլանդը ասել է, թե՝ «այն, ինչ տեղի է ունենում Հալեպում, ռազմական հանցագործություն է»: Իսկ Գերմանիայի կանցլեր Անգելա Մերկելը Հալեպում կատարվողը որակել է «անմարդկային և դաժան»՝ ավելացնելով, որ Սիրայի շուրջ Վլադիմիր Պուտինի հետ զրույցը «շատ ծանր է անցել»: Ռուսաստանը կձեռնարկի «ասիմետրիկ» և «ցավոտ» միջոցներ, եթե Միացյալ Նահանգները է՛լ ավելի կոշտ պատժամիջոցներ սահմանի: Այդ մասին հայտարարել է Ռուսաստանի արտաքին գործերի փոխնախարար Սերգեյ Ռյաբկովը: Օրեր առաջ Միացյալ Նահանգներն ու Մեծ Բրիտանիան հայտարարել էին, որ հնարավոր է՝ նոր պատժամիջոցներ սահմանեն Սիրիայի կառավարության ու նրա դաշնակիցների նկատմամբ: Վլադիմիր Պուտինը ասել է, թե Ռուսաստանը պատրաստ է երկարաձգել Հալեպի ռմբահարումների դադարը, բայց թե արդյոք դա իրականության մեջ կլինի այդպես, դժվար է ասել: Փաստ է մեկ բան` Ռուսաստանի նկատմամբ Պուտինի քաղաքականությունը բերում է ավելի մեծ հակազդեցության արևմուտքի կողմից, և Գերմանիան ու Ֆրանսիան նույնիսկ, որոնք, երբեմն, վարում էին Ռուսաստանի նկատմամբ փոքր-ինչ մեղմ քաղաքականություն` բավական կոշտացրել են վերաբերմունքը ռուսական քաղաքականության նկատմամբ: Թամար Բագրատունի