Մաֆիան գործում է, պատասխանատուներն՝ ահազանգում

ԱԺ արտահերթ նիստում քննարկվում էր 2015թ Մոսկվայում ստորագրված «ԵՏՄ շրջանակներում բժշկական արտադրատեսակների և դեղամիջոցների շրջանառության միասնական սկզբունքների ու կանոնների մասին» համաձայնագիրը: Համաձայնագիրն ըստ հիմնական զեկուցող առողջապահության փոխնախարար Սերգեյ Խաչատրյանի՝ կարգավորում է դեղերի շրջանառությունը, գործունեությունը, որը ներառում է դեղամիջոցների մշակման, նախակլինիկական հետազոտությունների փորձաքննություն, որակի հսկողություն, արտադրության և այլ հարցեր: «Համաձայնագրով սահմանվում է, որ միության շրջանակներում դեղամիջոցների շրջանառության միասնական սկզբունքները և կանոնները սահմանելն, ինչպես նաև միության շրջանակներում դեղամիջոցների ընդհանուր շուկա սահմանելը»,- ասաց Խաչատրյանը՝ հավելելով, որ ամեն բան կարգավորվելու է միջազգային ստանդարտներին համաձայն: Փոխնախարարն ընդգծեց, որ ԵՏՄ անդամ բոլոր երկրները հավասարապես իրավունք ունեն ստեղծվելիք համապատասխան հանձնաժողովին առաջարկներ ներկայացնել և մասնակցել դեղերի շուկայի քաղաքականությանը: Խաչատրյանին դեղերի կեղծման մասին հարց ուղղեց ՕԵԿ-ական պատգամավոր Մհեր Շահգելդյանը; Փոխնախարարը նշեց, որ ՀՀ-ում արտադրվում է շրջանառվող դեղերի ընդամենը 4 տոկոսը, այսինքն կեղծվող դեղերը Հայաստանի տարածքից դուրս են արտադրվում: «Հայաստանում կեղծ դեղեր չեն արտադվում միանշանակ, արվել են լուրջ հետազոտություններ ԱԱԾ և այլ իրավասու մարմինների միջոցով: Կեղծ դեղերի դեմ պայքարը պետք է տանեն այն երկրները, որտեղ այդ դեղերն արտադրվում են: Մենք ունենք վերահսկողություն դեղերի օրինական դաշտի վրա, սակայն կեղծ դեղերի վրա մենք վերահսկողություն չունենք»,- ասաց փոխնախարարը՝ հավելելով, որ ներկայացվող համաձայնագիրը հնարավորություն կտա հետագայում ստեղծել մեխանիզմներ այդ խնդիրների դեմ պայքարելու համար: ՀԱԿ խմբակցության պատգամավոր Արամ Մանուկյանը նույնպես դժգոհեց, որ դեղերը Հայաստանում ոչ միայն կեղծված են, անորակ, այլ նաև թանկ: Պատգամավորի խոսքով՝ այս շուկայում իսկական <<մաֆիա>> է գործում: Պատգամավորն ասաց, որ ինքը միշտ դեղերը իր և բարեկամների համար բերում է արտասահմանից, մասնավորապես Վրաստանից, քանի որ հայ բժիշկներն են խորհուրդ տվել չգնել դեղ Հայաստանում: «Ցավազրկող դեղերի մեծ մասը ցավազրկող չէ, բրախած, անտեր վիճակ է, ո՞վ է տիրություն անելու : Չէ՞ որ սա ազգային անվտանգության խնդիր է, մի երկիր որը գտնվում է նաև կիսապատերազմական վիճակում, մտնում է ցանկած քանակի ու տեսակի դեղ, ու մենք պաշտպանված չենք, դուք պետք է SOS բարձրացնեք, աղմուկ բարձրացնեք, որ բարձիթողի անտեր վիճակ է»,- ասաց Արամ Մանուկյանը: Փոխնախարարը նշեց, որ իրենք SOS են բարձրացրել անցյալ տարի, և հույս հայտնեց, որ երբ քննարկվող համաձայնագիրը մտնի ուժի մեջ, ապա մի քանի տասնյակ որոշումներ կընդունվեն, որոնք հնարավորություն կտան լուծել պատգամավորի բարձրացրած խնդիրները, պատշաճ վերահսկել ոլորտը և պատշաճ պայքարել կեղծ դեղերի դեմ: «Թյուր կարծիք կա, թե Վրաստանում արտադրվող բոլոր դեղերը բարձր որակի են միաժամանակ հակադարձեց փոխնախարարը շարունակելով՝ « Բազմաթիվ միջազգային փորձագետներ հայտարարել են, որ Վրաստանում մեծ թվով կեղծ դեղեր են արտադրվում, որովհետև Վրաստանում հեշտ է գրանցումը, բացակայում է վերահսկողությունը»: Գաղտնիք չէ, թե Հայաստանում ով է տնօրինում դեղերի շուկան. Մեր երկրում այն գտնվում է ԱԺ պատգամավոր, գործարար Սամվել Ալեքսանյանի ձեռքում: Հետաքրքիր է՝ վերը նշված համաձայնագիրն ինչպես կանդրադառնա Ալեքսանյանի բիզնես-գործունեության վրա: Անի Սահակյան