Նոր մանրամասներ՝ երեկ ԱԱԾ-ականների մասնակցությամբ տեղի ունեցած խոշոր ավտովթարից

Հայաստանի քննչական կոմիտեի Զինվորական քննչական գլխավոր վարչության 7-րդ կայազորային քննչական բաժնում պարզվել է երեկ՝ հոկտեմբերի 20-ին Լոռու մարզում տեղի ունեցած ավտովթարի հետևանքով Volkswagen Polo-ի վարորդի և վիրավորների ինքնությունը: Ինչպես հայտնում է ֆոտոլրագրող Գագիկ Շամշյանը, ավտոմեքենան վարել է Շիրակի մարզի Մարալիկ գյուղի բնակիչ, 25-ամյա Սամվել Նահապետյանը: Հիվանդանոց են տեղափոխվել վարորդը և ուղևորներ, Գյումրի քաղաքի բնակիչներ, 24-ամյա Հայկ Սերոբյանը, 26-ամյա Սերյոժա Սերոբյանը, 22-ամյա Տիգրան Սերոբյանը և 23-ամյա Արտյոմ Նահապետյանը: Գ. Շամշյանի տեղեկություններով՝ վիրավորներից Հայկ, Մերուժան, Տիգրան Սերոբյանները, իսկ վարորդ Ս. Նահապետյանն ու մյուս վիրավոր Ա. Նահապետյանը եղբայրներ են: Բոլորն էլ ծառայում են ՀՀ ազգային անվտանգության ծառայության N զորամասի N ուղեկալում՝ որպես պայմանագրային զինծառայողներ: Ինչպես ավելի վաղ հայտնել էր ֆոտոլրագրողը, հոկտեմբերի 20-ին, խոշոր ավտովթար էր տեղի ունեցել Լոռու մարզում: Ժամը 16:40-ի սահմաններում Volkswagen Polo մակնիշի 34 TQ 334 համարանիշի ավտոմեքենայի վարորդը Մեծավան-Տաշիր ավտոճանապարհին դուրս էր եկել ճանապարհի երթևեկելի գոտուց և գլխիվայր շրջվելով՝ հայտնվել դաշտամիջյան հատվածում: Վթարի հետևանքով վարորդն ու 3 ուղևորներ քաղաքացիների օգնությամբ դուրս էին բերվել ավտոմեքենայից և տեղափոխվել Տաշիր բժշկական կենտրոն: Դեպքի վայր էր ժամանել ոստիկանության Տաշիրի բաժնի օպերատիվ խումբը՝ Տաշիրի ոստիկանապետ Արտակ Հովհաննիսյանի գլխավորությամբ: Ժամանել էին նաև ճանապարհային ոստիկանության 2-րդ սպայական գումարտակի 5-րդ վաշտի աշխատակիցները՝ վաշտի հրամանատարի տեղակալ Վարդան Նարգիզյանի գլխավորությամբ: Վթարի մասին ՃՈ օպերատիվ կառավարման կենտրոնի պատասխանատու հերթապահ Արմեն Հարությունյանը տեղեկությունը փոխանցել էր ոստիկանության Տաշիրի բաժին, որտեղից դեպքի վայր էր ժամանել հերթապահ հետաքննիչը: