«Խաղեր տալ»` չի ստացվելու
ԵԱՀԿ Մինսկի խմբի ռուսաստանցի համանախագահ Իգոր Պոպովը հարցազրույց է տվել ադրբեջանական ԱՊԱ գործակալությանը, որտեղ հայտնել է, որ առաջիկայում այցելելու են՝ Ադրբեջան, Հայաստան, Լեռնային Ղարաբաղ. «Մտադիր ենք ուսումնասիրել հակամարտության գոտում իրավիճակի կայունացմանն ուղղված պայմանավորվածությունների իրագործման ընթացքը, որոնք ձեռք են բերվել Վիեննայում և Սանկտ Պետերբուրգում», ասել է նա՝ հավելելով, որ համանախագահները ճշտելու են նաև ռազմական իրադրությունը հակամարտության գոտում: Ռուսաստանցի համանախագահը փաստացի ասել է, որ գալիս են ստուգելու` նախկին պայմանավորվածությունների իրականացումը: Ինչպես հայտնի է, ապրիլյան քառօրյա պատերազմից հետո միջնորդները լուրջ ջանքեր են տանում շփման գծում կայունություն հաստատվի: Դրա ճանապարհին միջնորդներն առաջարկել են սահմանային միջադեպերի ուսումնասիրության մեխանիզմների կիրառումը, ԵԱՀԿ առաքելության կազմի ընդլայնումը, այսինքն` մոնիտորինգային առաքելության մեծացում: Ադրբեջանն ամիսներ շարունակ արհամարհում էր միջնորդների առաջարկները, իսկ մի առիթով էլ պարզապես Ալիևի մակարդակով ասվեց, որ չեն կարևորում այդ առաջարկները, ավելին համարում են` «հայերի տեխնիկական առաջարկություններ»: Հայկական կողմն ընդունել է միջնորդների առաջարկները: Այժմ, ռուսաստանցի համանախագահի մակարդակով փաստացի արձանագրվում է, որ միջնորդները հաստատակամ են, և պնդում ու ակնկալում են իրենց առաջարկների կատարումը: Ասել է թե` ստուգելու են, թե արդյոք Ադրբեջանը կատարել է պահանջը: Ադրբեջանցի լրագրողը հարց է ուղղել Պոպովին նաև «բանակցային գործընթացում յոթ շրջանների վերադարձի մասին» վերաբերյալ: «Մենք բազմիցս ենք արտահայտվել ԼՂ-ի շուրջ տարածքների վերադարձի թեմայի վերաբերյալ: Այդ խնդիրը պետք է դիտարկել համալիր ՝ կարգավորման այլ տարրերի հետ ՝ ներառյալ Ղարաբաղի կարգավիճակի որոշումը, բոլոր փախստականների վերադարձ, Լեռնային Ղարաբաղը Հայաստանին կապող միջանցքի պահպանում, խաղաղարար գործողությունների անցկացում: Կարգավորման գործընթացը՝ միասնական փաթեթ է, և ցանկացած փորձ դրանից առանձին տարրեր մասնատելու, որն այս կամ այն կողմը նախընտրում է, անարդյունավետ է», - ասել է Իգոր Պոպովը: Այստեղ ուշագրավ է այն, որ ռուսաստանցի համանախագահը, ըստ էության, հասկացրել է, որ Ադրբեջանից ժամանակ առ ժամանակ հնչող` «բոլոր շրջանների վերադարձ», կամ` «Ղարաբաղը Ադրբեջանի կազմ պետք է վերադառնա», այս և նմանատիպ այլ հայտարարություններն անիմաստ են: Այսինքն, համանախագահները բաց տեքստով արդեն հասկացնում են Ալիևին, որ նրա` բանակցություններից խուսափելու ու կարգավորման գործընթացը այլ ուղով տանելու «ջանքերը» դատապարտված են: Թամար Բագրատունի