Երբ բացահայտում են հանցավոր գործարքը
Արտահերթ նիստում Ընտրական օրենսգրքի նախագծի քննարկումը խայտառակ բացահայտումների առիթ դարձավ: Պարզվեց, որ ամիսներ շարունակ 4+4+4 ֆորմատում ԸՕ փոփոխությունների քննարկումները իշխանություն-ընդդիմություն տիրույթում ջան-ջիգյար ֆորմատով են անցել, որի արդյունքում իշխանությություները հաջողացրել են նախագծի մեջ խոռճկել այն ամենը, ինչ իրենց պետք է, ինչը կօգնի ռեժիմի վերարտադրությանը: Եւ որ ընդդիմադիրների երբեմնի-երբեմնի ընդվզումները ձեւական լոլոյություններ էին, որոնցով փորձում էին աչք փակել: Պատահական չէ, որ արտահերթ նիստի քննարկումների ժամանակ չորսերի ֆորմատում չտեղավորվող ընդդիմադիրների զայրույթը իշխանություն-ընդդիմություն հանցավոր համագործակցության առիթով:
Ազատ դեմոկրատներ կուսակցության ղեկավար Խաչատուր Քոքոբելյանի նյարդերը ինչ-որ պահի տեղի տվեց ու նա սկսեց ջախջախել թե ընդդիմադիրներին, թե ԸՕ-ի հեղինակներին: Նա հորդորեց, որ այլեւս մատի փաթաթան չդարձնել 4+4+4 ձեւաչափը.<Հո կրակը չենք ընկե?լ էդ ձեւաչափի հետ, որ ամեն ինչ հղում անեք ընդդիմության վրա>> ասաց նա բացահայտելով, թե իրականում ինչպիսի խայտառակ դրույթների տակ են ստորագրել իշխանությունն ու ընդդիմությունը եւ ինչ օրենսգրքի են հավանության արժանացրել: <<Նման հանրահաշիվ ընդհանրապես բնության մեջ չի եղել: Ուզում եք այնպիսի թվաբանություն ասեմ, որ 2 մանդատը դառնա 18 մադատ, մենք սրան դեմ ենք, սա անթույլատրելի է, բնության օրենքներին դեմ է>>, ասաց Խաչատուր Քոքոբելյանը՝ անդրադառնալով քաղաքապետի ընտրություններում մեկ քաղաքական ուժի ստացած ձայները բոնուսային կարգով մյուսին տալուն:Պատգամավորի դիտարկմամբ կարելի էր երկրորդ փուլի մասին դրույթ ամրագրել, քան այսպիսի խայտառակ բոնուսների մասին դրույթ ամրագրել: Նա նախազգուշացրեց, որ խնդիր է առաջանալու նաեւ կառավարություն ձեւավորելիս.<<Օրինակ 60 տոկոս մանդատներ ունեցող ուժերը զրկված են մեծամասնություն ձեւավորելու հնարավորությունից, ինչպես եղավ Վանաձորում>>: Պատգամավորի դիտարկմամբ՝ ընտրությունների հետ կապված դրսում նոր բրենդ է ձևավորվել՝ «արմյանսկի կարուսել»: Նրա պնդմամբ նոր ԸՕ-ով ոչ թե ամբողջովին համամասնական ընտրակարգ է գործելու, այլ ճիշտ հակառակը եւ որ քաղաքական մրցակությունը Քոքոբելյանի խոսքով՝ վերածվելու է ռեսուրսների պայքարի.<Քաղաքական գործընթացները հետին պլան կմղվեն ու տեղի կունենա ռեսուրսների պայքար>>: Նախագծում տեղ է գտել դրույթ, որի համաձայն՝ ընտրախախտումների մասին կեղծ դիմումների համար նախատեսվում է քրեական պատասխանատվությունը: Իշխանությունն ըստ պատգամավորի՝ այսկերպ ցանկանում է հետ պահել բոլոր նրանց, ովքեր ահազանգում են ընտրությունների օրը: «Մենք համաձայնագրից չենք շեղվել, համաձայնագիրն արտացոլել ենք այն տեսքտում, որը ներկայացրել ենք: Կամ դուք չեք կարդում ու ստորագրում եք, կամ այստեղ արդեն այլ քաղաքական խաղ եք պարում, որը կարծում եմ սազական չէ այս խորհրդարանին»,- իր ելույթում ընդդիմադիր պատգամավորներին դիմեց կառավարության աշխատակազմի ղեկավար-նախարար Դավիթ Հարությունյանը, որոնք այլեւս անցել էին արդարանալու գործին ու ելույթներ էին ունենում իշխանության դեմ, որպեսզի մաքրեն իրենց մեղքը: Բայցեւայնպես Հարությունյանը կարդաց այն հայտարարությունը, որի տակ ստորագրել են քաղաքական ուժերը՝ «4+4+4» ձևաչափի շրջանակներում: «Միգուցե իսկապես որոշել եք հետ կանգնել համաձայնագրից: Նորմալ է, կարող եմ հասկանալ, որ մարդիկ որոշել են հետ կանգնել: Բայց այդ դեպքում ես պետք է նշեմ, որ ցանկացած համաձայնագրում յուրաքանչյուր դրույթ, որը դրված է, բալանսավորված է մեկ այլ դրույթով: Ուզո՞ւմ եք հետ կանգնել ձեր ստորագրած փաստաթղթից, ցավալի է, բայց պատրաստ եմ դա քննարկել մեկ պայմանով: Այն ամենը, ինչը բալանսավորում է դրույթները, ևս պետք է վերացվի: Եթե մենք փոխում ենք, պետք է փոխենք համակարգային: Հակառակ պարագայում չի լինում այնպես, որ պայմանագրով պայմանավորվում ենք սրա փոխարեն սա, բայց հետո դուք ասում եք՝ կլինի՞ դուք մեր ուզածը տաք, բայց հակառակը, էն ինչ պետք է դրա փոխարեն տանք, չտանք: Չի լինի: Գնդակը ձեր դաշտում է»,- ասաց Դավիթ Հարությունյանը:
Անի Սահակյան
Հետևեք մեզ Viber-ում
