Թուրքական զինուժի պլանները
Թուրքիայի նախագահ Ռեջեփ Թայիփ Էրդողանը հայտարարել է, որ թուրքական ԶՈՒ-ն Սիրիայում չի սահմանափակվի Դաբըքի գրավմամբ և կշարունակի առաջանալ դեպի քրդական Մանբիչ: Այս մասին գրում է թուրքական «Հաբեր Թյուրք» կայքը: «1923-ից այս կողմ մեզ փորձում են մոռանալ տալ Օսմանյան և Սելջուկյան անցյալը: 2016-ին էլ 1923-ի հոգեբանությամբ չենք առաջնորդվելու, դրանով առաջնորդվելը մեր ազգին օգուտ չի բերի: Հիմա Արևմուտքից Թուրքիային ասում են «Դաբըք մտաք, մաքրեցիք, շատ լավ է, բայց ավելի հարավ չիջնեք»: Իսկ ներքևում ի՞նչ կա: Էլ Բաբ: Շատ կներեք, բայց մենք գնալու ենք Էլ Բաբ: Ինչո՞ւ: Որովհետև մեզ վտանգող գործողությունները Դաբըքով չեն ավարտվում, այլ անգամ հասնում է մինչև Էլ Բաբի հարավ` Մանբիչ: Մենք պետք է պաշարենք Մանբիչը», - հայտարարել է Էրդողանը: Նշենք, որ թուրքական հատուկ նշանակության ուժերն օգոստոսի 24-ի առավոտյան մտել են Սիրիայի տարածք՝ «Իսլամական պետություն» խմբավորման գրոհայիններից հյուսիսային Ջերաբլուս քաղաքի ազատագրման գործողության շրջանակներում: Թուրքական ԶՈւ-ին աջակցում են նաև «Սիրիական ազատ բանակ» ընդդիմադիր խմբավորումն ու ԱՄՆ-ի գլխավորած միջազգային կոալիցիոն ուժերը՝ օդային հարվածների միջոցով: Թուրքական ԶՈՒ-ն պայքարում է նաև Սիրիայի հյուսիսում գործող քրդական ազգային խմբավորումների դեմ:
Հետևեք մեզ Viber-ում
