ՀՀԿ-ն հակասում է ինքն իրեն

ԱԺ արտահերթ նիստում քննարկվում է ԸՕ-ում փոփոխություններ և լրացումներ կատարելու մասին փաթեթն առաջին ընթերցմամբ ընդունելու հարցը: Հիմնական զեկուցող` կառավարության աշխատակազմի ղեկավար-նախարար Դավիթ Հարությունյանը նշեց, որ վերականգնվում է ընտրողների կողմից քվեարկությունից հետո ստորագրելու պարտականությունը, և այդ ստորագրություններով ցուցակները ներկայացվելու են տարածքային ընտրական հանձնաժողովին, որից հետո` 24 ժամվա ընթացքում, կհրապարակվեն ԿԸՀ կայքում: Մյուս փոփոխությունը վերաբերում է տեսանկարահանմանը, տեխնիկան գնվելու է` գնման ընթացակարգի համաձայն: ՀԱԿ խմբակցության անդամ Նիկոլ Փաշինյանը հետաքրքրվեց՝ եթե տեսանկարահանման, հեռարձակման հետ կապված Կառավարության մրցույթին ոչ մի ընկերություն հայտ չներկայացնի, այդ դեպքում ի՞նչ է լինում. «Ես կողմ եմ ընտրացուցակների հրապարակմանը, սակայն որքանո՞վ եք հավանական համարում այն, որ ՀՀԿ-ն որեւէ լծակով կդիմի ՍԴ՝ այս դրույթը չեղյալ համարելու համար, քանի որ ՍԴ-ն մի որոշում է ընդունել, որտեղ արձանագրել է՝ ընտրացուցակները հրապարակման ենթակա չեն: Դուք, պարոն Հարությունյան, որպես պատասխանող եք հանդես եկել ՍԴ-ում: Այդ ժամանակ ՍԴ-ն նաեւ հղում էր արել ԵԽ որոշումներին»,-հարցրեց Փաշինյանը։ 2012 թվականի մայիսի 5-ին ՍԴ-ն ընդունել է որոշում, որտեղ արձանագրել է՝ ընտրողների ստորագրած ցուցակները հրապարակման ենթակա չեն։ Դավիթ Հարությունյանը նշեց, որ ՍԴ հետ կապված որեւէ կանխատեսում չի անում. «Ես երաշխավորում եմ՝ ՀՀԿ-ն չի դիմելու ՍԴ, սա ասում եմ որպես կուսակցական: Գոնե մինչեւ եկող ընտրություն ՀՀԿ-ն չի դիմի ՍԴ: Ինչ վերաբերում է հեռարձակման մրցույթին, ապա եթե հայտեր չլինեն, ապա տեսանկարահանում չի լինի, իսկ այլ լուծում ես չեմ գտնում»:ԸՕ-ն 24-ժամյա ռեժիմով առաջին և երկրորդ ընթերցմամբ անցկացնելը դուր չէր եկել ԱԺ ՕԵԿ խմբակցության պատգամավոր Հեղինե Բիշարյանին, նա դժգոհեց, որ նման կարևորագույն օրինագիծը հրատապ ռեժիմով քննարկելը ճիշտ չէ՝ հաշվի առնելով հոկտեմբերի 2-ին Գյումրի և Վանաձոր քաղաքներում կայացած ՏԻՄ ընտրությունները: «Կարծես թե մի 10 օր հետո ընտրություններ չեն, և ՏԻՄ ընտրությունների ժամանակ մենք լրջագույն խնդիրներ տեսանք ԸՕ-ում: Լավ կլինի մենք այս ռեժիմից հանենք այս նախագիծը: Մենք տեսանք, որ Ընտրական օրենսգիրքը լրջագույն խութեր ունի»,- ասաց նա: ԱԺ Պետաիրավական հարցերի մշտական հանձնաժողովի նախագահ, ՀՀԿ խմբակցության պատգամավոր Հովհաննես Սահակյանը հիշեցրեց, որ ԸՕ-ն մինչ ԱԺ մտելը բավականին երկար քննարկումների միջով է անցել: Սակայն ՕԵԿ խմբակցության քարտուղար Մհեր Շահգելդյանը պնդեց՝ 24 ժամյա ռեժիմով ԸՕ-ն բերելը բացարձակ աննպատակահարմար է։ ԲՀԿ խմբակցության ղեկավար Նաիրա Զոհրաբյանն էլ ասաց, որ ինքն այնքան ռոմանտիկ չէ, որ հավատա, թե քվեարկածների ցուցակների հրապարակումը լուծելու է ընտրական արատավոր համակարգի բոլոր խնդիրները, այնուհետև բարձրաձայնեց իր մտահոգությունը: «Տեղեկություն կա, որ կառավարությունը հրաժարվում է իր մասնաբաժնով անհրաժեշտ ֆինանսական պարտավորությունը կատարելուց` տեսանկարահանման ծախսերի հետ կապված, խոսքը 3 միլիոն եվրոյի մասին է, ինչը տարակուսանք է առաջացրել եվրոպական գործընկերների մոտ»:Պատգամավորի երկրորդ հարցը բխել էր Գյումրիի ընտրություններից .«Այդ քանի՞ հարկանի բոնուս է գործում ԸՕ-ում, որ Գյումրիում Բալասանյանը, չստանալով ձայների մեծամասնությունը, դառնում է քաղաքապետ: Հիմա կասեք, որ դուք քվեարկել ու ընդունել եք օրենքը, բայց ընդունեք, որ կիրարկման ընթացքում այս օրենքն անարդար մեխանիզմներ է առաջացնում, և ժամանակը չէ՞, որ հիմա փոփոխություն կատարվի այդ օրենքում: Ինձ հետաքրքիր չէ, որ Իտալիայում այդ փոփոխությունն է գործում, փաստն այն է, որ Բալասանյանը` Գյումրիում, և Ասլանյանը Վանաձորում չեն ստացել այդքան ձայներ, որ քաղաքապետ դառնան: Չի կարող 32 տոկոս ձայն հավաքածը դառնալ գյումրեցիների վստահությունը վայելող քաղաքապետ»,- ասաց Նաիրա Զոհրաբյանը: Դավիթ Հարությունյանը խնդրեց Նաիրա Զոհրաբյանին` բարձրաձայնել այն եվրոպացի գործընկերների անունները, ովքեր ասել են, թե ՀՀ կառավարությունը չի պատրաստվում կատարել իր մասնաբաժին ֆինանսական պարտավորությունը: Նա հստակեցրեց, որ 3 միլիոն եվրոն ուղղվելու է նույնականացման քարտերի հետ կապված ծրագրին: «Իսկապես կուզենայի լսել այն գործընկերների կամ դեսպանների անունները, որոնք անպատասխանատու հայտարարություններ են արել մեր ամենաոչռոմանտիկ պատգամավորի մոտ»,- ասաց նա: Գյումրու ընտրություններին հասնելով՝ Դավիթ Հարությունյանը հեգնեց, որ արդյունքներից դժգոհողները միշտ էլ փորձում են արդարացումներ, պատճառներ գտնել: Եթե մի որևէ կուսակցություն ստանում է 20 տոկոս, մյուսը ստանում է 10 տոկոս ձայն, իսկ մնացածները 2-3 տոկոս, ուրեմն ո՞վ է հաղթել այդ ընտրություններում: «Տեսականորեն կարելի է ասել, թե 70 տոկոսը ձայն չի տրվել առաջին կուսակցությանը: Բայց դրանք այնքան փոշիացված ուժեր են, որ նրանց մեկ միասնական քաղաքական ուժ դիտարկել չի կարելի: Ընտրական շեմերը սահմանված են հենց դրա համար»,- ասաց նա:Էդմոն Մարուքյանն էլ ընտրախախտումների մասին կեղծ դիմումների համար նախատեսված քրեական պատասխանատվությունը կոշտ մեխանիզմ որակեց: Ըստ նրա՝ այնպես են անելու, որ մարդիկ իրենց ունեցած ահազանգերը չներկայացնեն: «Դեպքեր են եղել, որ ընտրողը գալիս է տեղամաս, իր անվան դիմաց դրված ստորագրություն է հայտնաբերում, հետո քննարկումների ընթացքում ասում են, թե մեկը շփոթվել է, ինքը քո տեղնա ստորագրել, դու էլ էստեղ ստորագրի և նման իրավիճակներ: Հիմա դուրս է գալիս այս հոդվածից, որ նման դեպք լինի ու հայտարարի, հետո պարզվի շփոթված է, այս մարդուն կարան դատեն»։ Ըստ Մարուքյանի՝ այս հոդվածը հետ է մղելու դիտորդներին, վստահված անձանց՝ հայտարարություն տալու համար: Մի խոսքով՝ ԸՕ նախագծից դժհոգ էին եւ օրենսդիրները, որոնք ներգրավված չէին 4+4+4 ֆորմատում եւ անմիջական մասնակիցն էին փոփոխությունների մշակման, այլեւ հենց իրենք, այդ ֆորմատի ջատագովները։   Անի Սահակյան