Կամիկաձե է հայտնվել
ՊԵԿ նախագահի փոփոխությունն այլեւս իրողություն է: Հովհաննես Հովսեփյանին կփոխարինի Վարդան Հարությունյանը՝ «Գազպրոմ Արմենիա» ընկերության այլեւս նախկին նախագահը: Այդ մասին համառ լուրեր կային դեռեւս այն ժամանակ, երբ Կարեն Կարապետյանը նոր էր ոտք դրել կառավարություն: Սակայն, այդ հեռանկարի իրականության հավանականությունը նվազագույնի էր հասնում՝ հաշվի առնելով նախ այն հանգամանքը, թե որտեղից էր կառավարություն տեղափոխվել Հովհաննես Հովսեփյանը, եւ այն, որ նա պաշտոնավարել էր շատ կարճ՝ ընդամենը 7 ամիս ու բարելավել համակարգի ցուցանիշները: Ինչ-որ պահի այս լուրեր առկախվեցին ու սկսեցին խոսել, որ Կարապետյանը փոշմանել է: Փոշմանել է մի քանի պատճառներով, նախեւառաջ այն, որ այդ փոփոխությունն, ըստ էության, միանշանակ չէր ընկալվի, որովհետեւ Հովհաննես Հովսեփյանի պաշտոնավարման ընթացքում միայն դրական դինամիկա է գրանցվել, ինչպես նաեւ երկար ժամանակ նախագահականի վերահսկողական ծառայությունն է ղեկավարել, այսինքն մի պաշտոնյա է, որին գոնե Սերժ Սարգսյանը վստահում ու հավատում է լիուլի: Իսկ թե ինչ էր կատարվում Հովսեփյանից առաջ հարկայինում, բոլորն են հիշում: Գագիկ Խաչատրյանի պաշտոնավարման վերջին ամիսներին իրավիճակն այնքան էր լարվել, որ պայթյունն անխուսափելի դարձավ, համացանցը տրաքեցրեց ՊԵԿ շարքային աշխատակիցների ձայնային ուղերձը, որտեղ նրանք պատմում էին Խաչատրյանի ու նրա մերձավորների կամայականությունների մասին: Այն ժամանակ ՊԵԿ-ը ֆինանսների նախարարության հաշվեկշռում էր ու ֆինանսական հոսքերը՝ ելքային, թե մուտքային, ամբողջությամբ Գագիկ Խաչատրյանի ձեռքում էին: Հովսեփյանի գալով հարկային, մաքսային ոլորտներում փոփոխությունները նկատելի դարձան՝ բացահայտ կոռուպցիան վերացել էր, խոշոր բիզնեսի հարկային վճարումներն ավելացել, սահմանին բիզնեսի առաջ հարուցվող խոչընդոտները՝ էականորեն կրճատվել: Ու, թեպետ, համեմատությամբ հարկային մուտքերը գրեթե համարժեք են 2015-ի մուտքերին, բայց դա առավելապես պայմանավորված է տնտեսության վիճակով։ Փոշմանելու մեկ ուրիշ պատճառի մասին էլ էր խոսվում: Թեպետ, Վարդան Հարությունյանը երկար տարիներ աշխատել է Գազպրոմում որպես Կարապետյանի տեղակալ ու նրա երկարամյա ընկերն է, բայց ճշմարտությունը իսկզբանե թանկ է եղել նրա համար: Իսկ ճշմարտությունն այն է, որ Հարությունյանը նախկին պաշտոնում հազարավոր դոլարների հասնող աշխատավարձ է ստանում, խոսքը մի քանի տասնյակ հազարի մասին է, իսկ դրա դիմաց նա բավականին անշառ աշխատանք է կատարում, քան այժմ ՊԵԿ-ում է լինելու: Հետեւաբար, հենց առաջին օրից Հարությունյանը դեմ է եղել Կառավարություն տեղափոխվելուն, անցավ գլուխը ցավի տակ դնելուն: Եւ, իսկապես, որն է այս նշանակման տրամաբանությունը, եթե Կարեն Կարապետյանը հայտարարել է, որ պրոֆեսիոնալ կառավարման ու գողության վերացման մասին, ապա ինչպես հավատալ, որ ահռելի աշխատավարձ ստացող անձը կգա եւ մոտ մեկ միլիոն ու մի քիչ էլ քիչ աշխատավարձով կհամաձայնի աշխատել: Եթե Կարեն Կարապետյանի թիմակիցները նվիրյալներ ու բարեգործներ են,կամ էլ կամիկաձեներ, պետք է բացահայտ տեղեկացնել բոլորին: Բայց, նույնիսկ այս պարագայում օդում կախված է մնում հարցը՝ նույնիսկ եթե Վարդան Հարությունյանը լավ մենեջեր է, որի մասին խոսել է վարչապետը, ինչ վստահություն կա, որ նա կկարողանա իր առջեւ դրված խնդիրների տակից դուրս գալ: Ի վերջո, խնդիրը միայն ՊԵԿ նախագահի անձի մեջ չէ, այլ՝ Հայաստանում իշխող համակարգի եւ խաղի կանոնների տրամաբանության, կփոխվի արդյոք այդ տրամաբանությո՞ւնը, ժամանակը ցույց կտա: Անի Սահակյանը
Հետևեք մեզ Viber-ում
