Ինչու Պուտինը նախընտրեց Երևանը` Փարիզից
ՌԴ նախագահ Վլադիմիր Պուտինն այսօր կայցելի Հայաստան մասնակցելու ՀԱՊԿ Հավաքական անվտանգության խորհրդի հերթական նիստին: Այս մասին հաղորդեց երեկ Կրեմլի մամուլի ծառայությունը: Նախատեսվում է քննարկել ՀԱՊԿ պատասխանատվության գոտում իրավիճակի, ինչպես նաև կազմակերպության հետագա հավաքական անվտանգության կատարելագործման հետ կապված հարցեր: Ի դեպ, Պուտինը Հայաստան գալիս է ՀԱՊԿ ԱԽ նիստին մասնակցելու այն դեպքում, երբ հրաժարվել է մեկնել Փարիզ` սիրիական հակամարտությունը իր ֆրանսիացի գործընկերոջ հետ քննարկելու, ինչի մասին արդեն Ֆրանսիայի ԱԳՆ-ն ափսոսանք արտահայտող հայտարարություն էր տարածել: Նկատենք, որ Պուտինի այցը Երևան տեղի է ունենում` Ռուսաստան-ԱՄՆ աննախադեպ լարվածության ֆոնին: Իսկ այսօր Երևանում ՀԱՊԿ հավաքական անվտանգության խորհրդի նիստում նախատեսվում է, որ կառույցի գլխավոր քարտուղարի պաշտոնում Նիկոլայ Բորդյուժային կփոխարինի Հայաստանի ներկայացուցիչը: Երեկ խիստ ուշագրավ տեղեկություն ի հայտ եկավ Պուտինի` Երևան այցելելուց առաջ: ՀԱՊԿ անդամ-երկրները ՆԱՏՕ-ի ՀՀՊ-ն դիտում են որպես սպառնալիք իրենց անվտանգությանը: Հայաստանը, Ռուսաստանը, ինչպես նաև ՀԱՊԿ մյուս երկրները ՆԱՏՕ-ի և ԱՄՆ-ի հակահրթիռային պաշտպանությունը դիտում են որպես սպառնալիք և կդիմակայեն դրան: ՀԱՊԿ ռազմավարության մեջ համապատասխան դրույթը կընդունվի այսօր Երևանում սպասվող կազմակերպության գագաթնաժողովին: Այս մասին «Ինտերֆաքսի» հետ զրույցում հայտարարել է Ռուսաստանի ԱԳՆ հատուկ առաջադրանքներով դեսպան Վիկտոր Վասիլևը: «Ռազմավարության մեջ առանձին բլոկով կարտացոլվի ՀԱՊԿ անդամ-պետությունների հակաօդային և հակահրթիռային պաշտպանության թեման: Մենք տեսնում ենք Ռուսաստանի Դաշնության սահմանների երկայնքով, և համապատասխանաբար, ՀԱՊԿ պատասխանատվության գոտում, ՆԱՏՕ-ի և ԱՄՆ-ի ՀՀՊ համակարգերի ավելացում», ասել է Վասիլևը՝ հավելելով, որ այդ հարցը ԱՄՆ-ը հարկ չի համարում համաձայնեցնել իրենց հետ: Պաշտոնյան նշել է, որ նախկինում ԵվրոՀՀՊ-ի տեղակայումը կապվում էր իրանական միջուկային սպառնալիքի հետ, իսկ այժմ այդ վտանգը չկա,« բայց, այնուամենայնիվ, ամերիկյան ՀՀՊ ենթակառուցվածքների տեղակայումը շարունակվում է և՛ Լեհաստանում, և՛ Ռումինիայում»: «Դա իր արտացոլումն է գտել նաև մեր հավաքական անվտանգության ռազմավարության մեջ: Մենք մտահոգություն ենք հայտնում ԱՄՆ-ի և ՆԱՏՕ-ի այդ քայլերի կապակցությամբ, և համապատասխանաբար, պատասխան գործողություններ կձեռնարկենք»,- ասել է Վասիլիևը: Ահա, այսպիսի բարդ ու վտանգավոր հարցի արծարծումը ու դրա շուրջ որոշումների ընդունումը Երևանում կանցկացվի Պուտինի այցելությամբ: Ինչպես հայտնի է, Երևանում կայանալիք ՀԱՊԿ հավաքական անվտանգության խորհրդի նիստում նախատեսվում է, որ կառույցի գլխավոր քարտուղարի պաշտոնում Նիկոլայ Բորդյուժային կփոխարինի Հայաստանի ներկայացուցիչը: Իսկ երեկ սպառազինությունների և պաշտպանական տեխնոլոգիաների «ArmHiTec-2016» առաջին միջազգային ցուցահանդեսին ներկայացվեցին հայաստանյան, ինչպես նաև ռուսական և մի քանի այլ երկրների ռազմարդյունաբերության արտադրանքներ՝ անօդաչու թռչող սարքերից մինչև հեռահար հրթիռային համակարգեր: Ցուցահանդեսի բացմանը ներկա էր նաև ՀԱՊԿ գլխավոր քարտուղար Նիկոլայ Բորդյուժան, ով վստահություն հայտնեց, որ ՀԱՊԿ անդամ երկրների ինքնիշխանության ու տարածքային ամբողջականության պահպանման համար խիստ կարևոր է ժամանակակից զինտեխնիկա ունենալը: «Իհարկե գլխավորապես ջանքերը գործադրվում են, որպեսզի առաջին հերթին անվտանգությունն ապահովվի քաղաքական միջոցներով, բայց իրադարձությունների զարգացման տրամաբանությունը, միտումները խոսում են միայն մի բանի՝ կազմակերպության ուժային պոտենցիալը ամրապնդելու անհրաժեշտության մասին», - նշեց Բորդյուժան: Ցուցահանդեսի ընթացքում պաշտպանության նորանշանակ նախարար Վիգեն Սարգսյանը նկատեց, որ Ադրբեջանը անհանգստացած է «Իսկանդերներով» և Հայաստանի զինված ուժերում տեղի ունեցող գործընթացներով: Օրերս Ադրբեջանի զինված ուժերի ղեկավարի հայտարարեց, թե իրենք «այսուհետ պետք է առավել կոշտ պատասխան տան հայկական կողմին»: «Իսկ ի՞նչ է կարելի ակնկալել մի պետությունից, որը միշտ հայտարարում է այն մասին, որ փորձելու է խնդիրը լուծել ռազմական ճանապարհով: Իհարկե, իրենք շատ անհանգստացած են և՛ այն ամեն ինչով, ինչ տեսան սեպտեմբերի 21-ի զորահանդեսի ժամանակ, այն գործընթացները, որ տեսնում են Հայաստանի զինված ուժերում: Մենք պետք է մշտապես պատրաստ լինենք հնարավոր զարգացումներին և անենք ամեն բան, որ մեր զինված ուժերը ի վիճակի լինեն հետ մղել նման փորձերը և պաշտպանեն Լեռնային Ղարաբաղի Հանրապետության բնակչության անվտանգությունը», ի պատասխան ասել է ՀՀ Պնախարարը: Մոսկվան լավատեսական չէ տրամադրված առաջիկայում Լեռնային Ղարաբաղի հակամարտության կարգավորման հարցում, բայց շարունակում է աշխատանքները Երևանի և Բաքվի հետ, երեկ հայտարարել է Ռուսաստանի նախագահի օգնական Յուրի Ուշակովը: «Ես չէի ասի, որ մենք այստեղ մեծ լավատեսություն ունենք մոտ ժամանակներում այդ հակամարտության, վեճի կարգավորման հարցում: Բայց կշարունակենք համառ աշխատանքը և՛ Բաքվի, և՛, բնականաբար, Երևանի հետ»,- ասել է Ուշակովը լրագրողներին: Այնուամենայնիվ, նա հրաժարվել է մանրամասներ հայտնել բանակցությունների վերաբերյալ՝ նշելով, որ քննարկման են դրված բազմաթիվ տարբերակներ և առաջարկներ: «Բայց առայժմ, կրկնում եմ, հատուկ լավատեսության համար հիմքեր չեն նկատվում»,- ասել է Ուշակովը: Պատասխանելով Հայաստանին սպառազինություն մատակարարելու պատճառների վերաբերյալ հարցին՝ Ուշակովը նշել է, որ Ռուսաստանը Հայաստանի դաշնակիցն է և իրավունք ունի մատակարարել այն սպառազինությունը, որի շուրջ պայմանավորվել է գործընկերների հետ: «Իմ կարծիքով՝ այդտեղ ոչ մի անսպասելի բան չկա ոչ մեկի, այդ թվում՝ ադրբեջանցի գործընկերների համար: Ինչպես գիտեք, Ադրբեջանին նույնպես զենք է մատակարարվում»,- ասել է նա: Թամար Բագրատունի