Սիրիայում մարդասիրական օգնության տրամադրումը շարունակվում է. ՀԱՊԿ գլխավոր քարտուղարի տեղակալ

Սիրիայում մարդասիրական օգնություն տրամադրելու գործողության աշխատանքները շարունակվում են: Այս մասին «ՀԱՊԿ դերը Եվրասիական անվտանգության ամրապնդման գործում» թեմայով կազմակերպված կլոր սեղանի շրջանակում հայտարարել է Հավաքական անվտանգության պայմանագրի կազմակերպության գլխավոր քարտուղարի տեղակալ Վալերի Սեմերիկովը: «Ռուսաստանի նախաձեռնությամբ բարձրացվել էր այդ հարցը: Մարդասիրական օգնություն տրամադրելու հարցում Ռուսաստանը դիմել էր ՀԱՊԿ բոլոր անդամ պետություններին: Հարցը քննարկվել էր նաև Պաշտպանության նախարարների խորհրդի ժամանակ: Բոլոր պետություններն արձագանքել էին օգնության տրամադրմանը մասնակցություն ունենալու հարցին: ՀԱՊԿ-ի դրոշի տակ կիրականացվի այդ օպերացիան, թե ոչ, մեր քննարկման առարկան չէ: Գիտենք, որ Հայաստանն էլ է օգնություն տրամադրել, Բելառուսը, Ղազախստանը, Ռուսաստանը. բոլորը ՀԱՊԿ-ի անդամ պետություններ են, իսկ այս հարցով հետագա զարգացումն արդեն անդամ պետությունների ղեկավարների որոշման հարց է՝ ինչպես և ինչպիսի օգնություն տրամադրել»,-ասել է ՀԱՊԿ գլխավոր քարտուղարի տեղակալը: Ավելի վաղ ՌԴ արտաքին գործերի նախարարությունը խոսել էր Սիրիայից հայերի տեղափոխումը Հայաստան իրականացնելու գործում ՌԴ հնարավոր աջակցության մասին: