Սեյրան Օհանյանը խայծը կուլ կտա՞
Տեւական ժամանակ էր՝ ՀՀԿ խորհրդի անդամ, նախագահի աշխատակազմի ղեկավարի տեղակալ Վիկտոր Դալլաքյանի մասին լուրեր էին շրջում, որ վերջինը կուսակցություն է ստեղծում, որը կոչվելու է «Շրջադարձ», իսկ այդ լուրերի գլխավոր ինտրիգն այն էր, որ կուսակցությանը անդամակցելու է կամ, գուցե, ղեկավարելու Սեյրան Օհանյանը, որը մոտ օրերս պաշտոնանկ արվեց Պաշտպանության նախարարի պաշտոնից։ Եւ ահա, տեղի ունեցավ Դալլաքյանի մամլո ասուլիսը , բայց սպասվածին հակառակ նա բոլոր հարցերին չտվեց սպառիչ պատասխաններ, ու լրագրողներին ներկայացավ քցված ու ՀՀԿ-ի գերությունից փախուստի դիմածի կերպարով։ Վիկտոր Դալլաքյանը նախ հայտարարեց, որ դուրս է գալիս ՀՀԿ-ից եւ Սերժ Սարգսյանի աշխատակազմից, որտեղ անցկացրել է չորս տարի.«Այսուհետև վերադառնում եմ ակտիվ քաղաքականություն և մասնակցելու եմ 2017 թվականի խորհրդարանական ընտրություններին: Իմ այսօրվա ելույթից հետո եթե ինձ կամ իմ ընտանիքի անդամներին բան պատահի, դրա պատասխանատուն Սերժ Սարգսյանն է: Հայաստանում հավատարմագրված դեսպաններին էլ եմ ուղղում խոսքս»,- ասաց Դալլաքյանը։ Քաղաքական նոր հայտ ներկայացնող Դալլաքյանն իր անելիքների մասին խոսելու փոխարեն ամբողջ ասուլիսը նվիրեց «Լուսավոր Հայաստան»-ի ղեկավարի «հանցագործություններին» եւ իշխանությունում նրա «պապաներ» ունենալու հարցերին։ «2012-ի հունվարին Սերժ Սարգսյանն ինձ հրավիրել է նախագահական նստավայր եւ խնդրել, որ ես շարունակեմ իր հետ համագործակցությունը եւ առաջարկել է անդամակցել ՀՀԿ-ին: Նա ընդունել է իմ մոտեցումները եւ ես անդամակցել եմ ՀՀԿ-ին, բայց 2012-ի մայիսի 6-ին, խորհրդարանական ընտրությունների ժամանակ Սերժ Սարգսյանն իմ դեմ օգտագործել է, այսպես կոչված, «լուսավոր հանցագործին», որի հետ կապված մամուլում եղել են բազմաթիվ հրապարակումներ: Ընտրություններից 2 օր հետո Սերժ Սարգսյանն ինձ հրավիրել է Ստեփանակերտ, որին ներկա է եղել Բակո Սահակյանը: Սերժ Սարգսյանն ինձ հարցրեց՝ ինչու այդպես ստացվեց, այսինքն խոսքը Վանաձորի մասին էր: Ես ասացի, որ եկել եմ այդ հարցի պատասխանը Ձեզնից ստանալու: Ես ներկայացրել եմ, թե ինչ է տեղի ունեցել Վանաձորում, օրինակ անձնավորությունը, որին նա օգտագործել է իմ դեմ, ՀՀ-ում մեկ տարի 17 օր չի բնակվել, 8 ամիս եղել է այլ երկրում: Ես բողոքարկել եմ, բայց ԸԸՀ-ն մերժել է բողոքն»,-ասաց Դալլաքյանը՝ հավելելով. «Փաստերը ցույց են տալիս, որ ԱԺ-ում ունենք լուսավոր հանցագործ, որն ունի պապաներ բարձրագույն իշխանություններում»: Այդ դեպքում ինչու 2012-ից հետո համաձայնել է դառնալ ՀՀ նախագահի աշխատակազմի ղեկավարի տեղակալ եւ ԱԺ-ում ՀՀ նախագահի ներկայացուցիչ, իրեն գերության մեջ են պահել ՀՀԿ-ում, Վիկտոր Դալլաքյանը պատասխանեց. «4 տարի սպասել եմ, որովհետեւ կա քարերը հավաքելեւ եւ քարերը նետելու ժամանակը: Հիմա եկել է քարերը նետելու ժամանակը»: Նա ընդգծել է, որ այս 4 տարիներին ոչ մի անգամ Սերժ Սարգսյանի հետ չի հանդիպել: Վիկտոր Դալլաքյանի մամուլի ասուլիսի ընթացքում, թերեւս, ամենասպասվողն այն էր, թե նա ինչ կասի Սեյրան Օհանյանի անդամակցության հեռանկարի կապակցությամբ: Նա ասաց, որ Սեյրան Օհանյանը հրապարակային որեւէ հայտարարություն չի արել իր հետագա ծրագրերի մասին, ըստ այդմ, ինքն էլ ձեռնպահ կմնա որեւէ մեկնաբանությունից: Միաժամանակ, Դալլաքյանը հայտարարեց, որ Սեյրան Օհանյանն այն պետական եւ ռազմական գործիչն է, որի անդամությունը պատիվ կլինի ցանկացած կուսակցության համար: Մինչդեռ իշխանական կուլիսներում գրեթե անհնար են համարում այդ հեռանկարը, եւ սա համարում են Դալլաքյանի կողմից գցված խայծ։ Ի դեպ, Դալլաքյանի լեզուն այնպես էր բացվել, որ նա վերահաստատում էր նախկինում արված աղմկահարույց հայտարարությունները, օրինակ, որ Սերժ Սարգսյանը կազինոներում է խաղում, «Կոնը 50 հազար դոլար է», նա ասաց՝ «Ես իմ խոսքերի տերն եմ, ես երբեւէ հերքե՞լ եմ իմ այդ խոսքերը»: Ավելին՝ նա վստահեցրեց, որ տեր է նաեւ իր մեկ այլ հայտարարության՝ «Զոլավոր շորեր եմ հագցնելու»: «Իմ քաղաքական գործունեության ընթացքում ես սխալվել եմ: Սխալվել եմ, որ համաձայնել եմ անդամակցել ՀՀԿ-ին: Ես ընդունել եմ թիմի մեջ մտնելու առաջարկը՝ հանուն երկրի: Բայց ես սխալվել եմ»: Այսպիսով Արթուր Բաղդասարյանի սինդրոմը դառնում է դոմինանտ, եւ պետք չէ զարմանալ, որ շուտով ՀՀԿ-ից դուրս գալու ու ընդդիմադիր դաշտ վերադառնալու մասին հայտարարեն Գեղամյանը, Խոսրով Հարությունյանը եւ այլք։ Անի Սահակյան