Ովքեր են «դավաճանները»
Այսպիսով՝ դրամատիկ ընտրությունից հետո Վանաձորը քաղաքապետ ունեցավ, տարօրինակ կհնչի, բայց քվեարկության արդյունքները ցույց տվեցին, որ 15-ը մեծ է 18-ից, եւ անգամ ավելին, ՀՀԿ թեկնածու Մամիկոն Ասլանյանի օգտին գրանցվեց 19 ձայն, իսկ «Լուսավոր Հայաստան»-ի ցուցակը ղեկավարող Քրիստ Մարուքյանի օգտին՝ 14 քվե։ Վանաձորի ՏԻՄ ընտրություններից հետո միավորվել էին «Լուսավոր Հայաստան»-ը, «Հայկական Վերածնունդ»-ը եւ «Բարգավաճ Հայաստան»-ը: Թվում էր, թե ռեալ հնարավորություն է ստեղծվել Վանաձորում տապալել ՀՀԿ-ի իշխանությունը ու քաղաքապետի պաշտոնում պաշտպանել Էդմոն Մարուքյանի եղբորը՝ Քրիստ Մարուքյանին, որը առաջնորդում է ԼՀ ընտրական ցուցակը: Բայց եղավ այն, ինչը սպասելի էր.ընդդիմությունը կրկին դավաճանեց։ Վանաձորի ավագանու 33 մանդատը ընտրություններից հետո բաժանվել էր հետեւյալ համամասնությամբ․ ՀՀԿ՝ 13 մանդատ, ՀՅԴ՝ 2, «Լուսավոր Հայաստան»՝ 10, ՀՎԿ՝ 5, ԲՀԿ՝ 3։ Պարզ մաթեմատիկական հաշվարկը հուշում էր, որ ՀՀԿ-ՀՅԴ կոալիցիան անգամ այստեղ իրավիճակ չի կարող փրկել, քանի որ ոչ իշխանական ուժերի ձայների միասնությունը երեքով գերազանցում է՝ 18 մանդատ:Բայց արի ու տես, որ փակ քվեարկության ընթացքում մաթեմատիկական դասական բանաձեւերը կարող են փոխվել: ՀՀԿ ԳՄ նիստից հետո Էդուարդ Շարմազանովը նկատել էր, որ ընդդիմության միասնության մասին կխոսեն քվեարկությունից հետո, հիմա հասկանալի է, թե ինչ էր ակնարկում Շարմազանովը: Իշխանությունը այս օրերին շուրջօրյա ռեժիմով աշխատում էր ընդդիմադիրների հետ, ընդունված խաղի կանոներով հասնելու ցանկալի արդյունքի: Իրականում այդ քվեարկությունը հնդկական կինոյի սցենարով ընթացավ՝ դրամատիկ ու հուզախառն, ընդդիմադիրները մարտեր տվեցին, որպեսզի քվեարկությունն անցնի բաց, իշխանությունն էլ ընդդիմացավ այդ առաջարկին, թեժ մարտերի արդյունքում որոշվեց փակ քվեարկություն իրականացնել, արդյունքում ընդդիմության ներկայացուցիչներից 4-ը քվեարկեցին ՀՀԿ-ի ցուցակը գլխավորող Մամիկոն Ասլանյանի օգտին, իսկ զավեշտն այն է, երբ ձայների հաշվարկից հետո բոլորը՝ ԲՀԿ-ից ու ՀՎԿ-ից հայտարարեցին, թե մնացել են ստորագրած հուշագրի շրջանակներում եւ կողմ են քվեարկել։ Նախորդ օրը երեք ուժերը հուշագիր էին ստորագրել, որ հետագայում գործելու են միասնաբար եւ պաշտպանելու են միասնական թեկնածուին։ Էդմոն Մարուքյանին միացածների ընդդիմություն լինելու աստիճանը նոր չէ որոշվել, նրանք հայտնի են իշխանության հետ խաղեր տալու իրենց անգերազանցելի հմտություններով, իշխանությանը ծառայելու անհագ պատրաստակամությամբ, իսկզբանե զարմանալի էր, որ Մարուքյանը համաձայնել է համագործակցել այս ուժերի հետ, հիմա նրան մեղադրում են եղբորը ամեն գնով քաղաքապետ դարձնելու մոլուցքի համար։ Մյուս կողմից ընդդիմությունը այս քվեարկությամբ խորհրդարանական ընտրություններից առաջ խաչ քաշեց իր վրա եւ ցույց տվեց, որ իրեն չի կարելի վստահել, միեւնույն է այդ քվեն չի ծառայելու իր նպատակին։ Նշենք, որ Մարուքյանը արդյունքները հրապարակելուց հետո լրագրողների հետ զրույցում հայտնեց, որ չի խախտում անմեղության կանխավարկածը եւ շուտով կիմացվի, թե որ ընդդիմադիրներն են կողմ քվեարկել ՀՀԿ-ին։ «Ավագանու նիստերը դեռ լինելու են, և այդ նիստերի ընթացքում երևալու է, թե ով է կողմ քվեարկողը: Սա այնպիսի բան չէ, որ ծածուկ մնա: Մենք իմանալու ենք, ամեն ինչ անելու ենք, որ իմանանք, և հանրությունը պետք է իմանա, թե ինչ է տեղի ունեցել»,- ասել է Մարուքյանը: Այն, ինչ տեղի ունեցավ նախքան քվեարկությունը, Էդմոն Մարուքյանի խոսքով, արդեն փաստում էր, որ իշխանություններն ահաբեկելով ու վախեցնելով ձայներ են քաշել իրենց կողմը: «Որևէ խնդիր չկա, մենք կորցնելու բան չունենք, սա մեզ համար սպասելի էր: Այսպիսի հաղթանակը ՀՀԿ համար ես որևէ կերպ չեմ համարում հաղթանակ, որովհետև հուշագիր ստորագրած մարդկանց ճնշելը, որ իրենց օգտին քվեարկեն, դա հանցագործություն է»,- հայտարարեց նա:
Անի Սահակյան
Լուսանկարը՝ ֆոտոԼուրի