«FETÖ-ն խաբել է մուսուլմաններին». Էրդողան
Anadolu լրատվական գործակալության փոխանցմամբ՝ Թուրքիայի նախագահ Ռեջեփ Էրդողանը, ելույթ ունենալով Եվրասիական իսլամական խորհրդի 9-րդ նիստի բացման ժամանակ, հայտարարել է, որ Ֆեթհուլլահ Գյուլենի կազմակերպությունը (FETÖ) սպառնալիք է ոչ միայն Թուրքիայի, այլև համայն աշխարհի համար: «Գյուլենի հոսանքը տարբերվում է սխալ աշխարհայացքով, իսկ բիզնեսի ու կրթության ոլորտներում նրա մեթոդները սպառնալիք են մուսուլմանական ողջ աշխարհի համար: Եվրասիական իսլամական խորհրդի նիստն ավելի է կարևորվում, քանի որ անցկացվում է հուլիսի 15-ին Թուրքիայում իրականացված ռազմական հեղաշրջման փորձից հետո: Այդ հոսանքը օգտվել է ազատության մթնոլորտից, որը ինչ-որ ժամանակ տիրել է անկախության ձեռքբերումից հետո Արևելյան Եվրոպայում ու Միջին Ասիայում: FETÖ-ն խաբել է մուսուլմաններին, երբ նրանք, ինչպես երբեք, կարիք են ունեցել լուսավորման ու աջակցության: Հուսով եմ, որ Խորհուրդը ջանքեր կգործադրի FETÖ-ի իրական էությունը շուտափույթ բացահայտելու ուղղությամբ: Ձեզանից աջակցություն եմ ակնկալում այդ հարցում»,- ասել է Էրդողանը:
Հետևեք մեզ Viber-ում
