«Թուրքական հոսքի» կառուցումը կսկսվի 2018 թվականին
«Թուրքական հոսք» գազատարի վերաբերյալ միջկառավարական համաձայնագրի ստորագրման շնորհիվ մեկնարկել է նախագծի իրականացումը: Գազամուղի կառուցումը կսկսվի 2018 թվականին: Այդ մասին հայտարարել է «Գազպրոմ» էներգետիկ ընկերության ղեկավար Ալեքսեյ Միլերը, գրում է «ՌԻԱ Նովոստի»-ն: Նրա խոսքով՝ գազամուղի ծովային հատվածը 100 տոկոսով կպատկանի «Գազպրոմ»-ին, ինչպես նաև ընկերությունն ամբողջությամբ իր վրա կվերցնի երկու ճյուղի կառուցման ֆինանսավորումը: Թուրքիայի տարածքում գազատրանսպորտային ենթակառուցվածքն արդեն կառուցելու է թուրքական Botas-ը: Եվրոպացի սպառողներին գազամատակարարման համար տարանցիկ ենթակառուցվածքի ստեղծման նպատակով Թուրքիայում կստեղծվի համատեղ ձեռնարկություն, հավելել է Միլերը: Ռուսաստանը և Թուրքիան հոկտեմբերի 10-ին ստորագրել են «Թուրքական հոսք» նախագծի իրականացման վերաբերյալ միջկառավարական համաձայնագիր: Համաձայնագիրը նախատեսում է Սև ծովի հատակով 15,75 միլիարդ խորանարդ մետր հզորությամբ գազամուղի երկու ճյուղի կառուցում: Միջկառավարական համաձայնագրում գազամուղի կառուցման վերջնաժամկետը 2019 թվականի դեկտեմբերն է:
Հետևեք մեզ Viber-ում
