Ահաբեկչական Թուրքիա. կրկին պայթյուններ, արտակարգ դրություն
Սիրիայում և Սիրիայի շուրջ ստեղծած քաոսը հասունանալով կարող է տարածվել նաև հարևան տարածաշրջանների վրա, մանավանդ, եթե հաշվի առնենք այն հանգամանքը, որ Սիրիայի գրեթե թե բոլոր հարևանները ներգրավված են սիրիական հակամարտությունում։ Երեկ հերթական պայթյունը գրանցվեց Ստամբուլում: Նախնական տվյալներով՝ պայթեցվել է պայթուցիկով լի ավտոմեքենա: Թուրքական Birgün թերթի փոխանցմամբ՝ պայթյունի հետևանքով վիրավորվել է 10 մարդ։ Թուրքական իշխանությունները ձերբակալել են պայթյունի ենթադրյալ կասկածյալին՝ «Քրդստանի աշխատավորական» կուսակցության (PKK) անդամի Աքսարայ քաղաքում կեղծ փաստաթղթերով: Ըստ Anadolu գործակալության` Աքսարայի ոստիկանությունը կասկածելի ավտոմեքենա է կանգնեցրել: Մեքենայում եղել է Ստամբուլում պայթյունի կազմակերպման համար կասկածվողը: Նրա հետ եղել է ևս երկու հոգի, որոնց ևս ոստիկանությունը ձերբակալել է: Հերթական պայթյուն է գրանցվել նաև թուրք-սիրիական սահմանի մոտ, որի արդյունքում զոհվել է ավելի քան 20 մարդ: Առկա տեղեկությունների համաձայն՝ սահմանային անցակետի մոտ պայթեցվել է պայթուցիկով լեցուն ավտոմեքենա: Պայթյունը գրանցվել է Հաթայ նահանգի Ռեյհանլը շրջանի մոտ՝ թուրքական սահմանից 1 կիլոմետր հեռավորության վրա: Ընդդիմադիր «Ժողովրդահանրապետական» կուսակցության (ԺՀԿ) առաջնորդ Քեմալ Քըլըչդարօղլուն կուսակիցների հետ հանդիպման ժամանակ քննադատել է երկրի իշխանություններին՝ կապված բազմաթիվ ահաբեկչությունների գրանցման հետ: «2002 թվականին ստացաք Թուրքիա առանց ահաբեկչության, մինչդեռ ներկայումս Թուրքիայում մոլեգնում է ահաբեկչությունը: Վերջին 6-7 ամսում ահաբեկչությունների հետևանքով զոհվել է ավելի քան 500 մարդ: Ո՞վ է ահաբեկչական կազմակերպության (PKK) հետ նստել բանակցային սեղանի շուրջ: Նախկինում ահաբեկչական կազմակերպությունը PKK-ն էր: Ապա` դրան ավելացավ ԴԱԻՇ-ը, իսկ վերջերս էլ՝ FETÖ-ն (Ֆեթհուլլահ Գյուլենի կազմակերպությունը): Ո՞վ է առաջացրել նրանց, ո՞վ է 14 տարի եղել իշխանության ղեկին: Մեր կուսակցությունն աջակցել է ահաբեկչության կանխմանն ուղղված յուրաքանչյուր օրինագծի: Խոչընդոտներ չեն եղել»,- հայտարարել է Քըլըչդարօղլուն: Թուրքիայում արտակարգ դրության ռեժիմը երկարաձգելու թեման է քննարկվում: Թուրքական Anadolu լրատվական գործակալության փոխանցմամբ՝ հոկտեմբերի 19-ին ժամը 01.00-ից երեք ամսով արտակարգ դրության ռեժիմը երկարաձգելու Թուրքիայի կառավարության որոշումը դիտարկվելու է Թուրքիայի խորհրդարանի նախագահության նիստում։ Համապատասխան որոշման վրա ստորագրել է Թուրքիայի վարչապետ Բինալի Յըլդըրըմը։ Թուրքիայի կառավարությունը արտակարգ դրության ռեժիմը 3 ամսով երկարաձգելու մասին որոշումն ընդունել է հոկտեմբերի 3-ին։ Թուրքիայում 3 ամսով արտակարգ դրության ռեժիմ ներդրվել է հուլիսի 15-ի ռազմական հեղաշրջման փորձից հետո։ Թուրքիայում ստեղծված անորոշ իրավիճակում, և շարունակվում են նաև ձերբակալությունները բոլոր ոլորտներում` իրավապահ համակարգիչ մինչև կրթական, Թուրքիայի քաղաքացիները դիմում են այլ երկրներ`քաղաքական ապաստան ստանալու համար: Թուրքիայում ռազմական հեղաշրջման ձախողված փորձից հետո 176 մարդ Շվեդիային ապաստան ստանալու դիմում է ներկայացրել: Ըստ թուրքական «Անադոլու» գործակալության լրատվամիջոցը հայտնում է, որ ապաստան ստանալու խնդրանքով դիմած անձանց շարքում կան զգալի թվով գյուլենականներ: Շվեդիայից ապաստան խնդրած անձանցից է նաև թուրքական Today’s Zaman պարբերականի Անկարայի բաժնի նախկին ներկայացուցիչ Աբդուլլահ Բոզքուրթը, որի դիմումին դեռևս պատասխան չի տրվել: Թամար Բագրատունի