Հանցավոր անգործություն` «դժոխքում»

Հալեպում դժոխային օրեր են, ու այդ ֆոնին միջազգային հանրության կողմից լսվում են աշխարհաքաղաքական թեմաներով դատողություններ, ստանդարտ հայտարարություններ: Սիրիայում հատկապես լարված է մնում իրավիճակը Հալեպի շուրջ: Առողջապահության համաշխարհային կազմակերպության տվյալներով՝ վերջին շաբաթվա ընթացքում քաղաքում զոհվել է ավելի քան 300 և տուժել շուրջ հազար մարդ: Ռուսաստանը խնդրում է անցկացնել ՄԱԿ-ի ԱԽ արտահերթ հանդիպում Սիրիայի իրավիճակի վերաբերյալ: Մինչդեռ արևմուտքում քննարկում են Սիրիայի պատճառով Ռուսաստանի նկատմամբ նոր պատժամիջոցները: Սակայն Վաշինգտոնը դեմ է արտահայտվել դրան: Սպիտակ տունը դեմ է հանդես գալիս Ռուսաստանի և Իրանի դեմ Կոնգրեսի առաջարկած պատժամիջոցներին, հայտնում է Washington Post-ը՝ հղում անելով Կոնգրեսում իր աղբյուրներին: 2016-ին ներկայացուցչական պալատում օրենք է մտցվել Սիրիայի քաղաքացիական բնակչության պաշտպանության մասին, որը ենթադրում է պատժամիջոցներ Բաշար Ասադի կառավարության աջակցման համար: Այն ընդունելու դեպքում սահմանափակումները առաջին հերթին կվերաբերվեն Ռուսաստանին և Իրանին: Ենթադրվում էր, որ օրենքը կընդունվի սեպտեմբերի վերջին, սակայն Սպիտակ տունը խնդրել է հետաձգել քվեարկությունը: Washington Post-ի տվյալներով՝ ներկայումս Սպիտակ տանը համարում են, որ նոր պատժամիջոցները կխանգարեն Սիրիայի կարգավորման հարցով ապագայում Ռուսաստանի հետ համագործակցմանը: Իսկ Իրանի դեմ պատժամիջոցները կլինեն Թեհրանի միջուկային ծրագրի պայմանավորվածությունների խախտում: Ավելին` ԱՄՆ պետդեպարտամենտում հաստատել են, որ ԱՄՆ-ի և Ռուսաստանի կապերը Սիրիայի հարցով շարունակվում են, սա հաստատել է պետդեպարտամենտի պաշտոնական ներկայացուցիչ Մարկ Թոները: Նա հայտնել է, որ հենց նոր տեղի է ունեցել հերթական հեռախոսազրույցը ԱՄՆ պետքարտուղար Ջոն Քերիի և Ռուսաստանի արտգործնախարար Սերգեյ Լավրովի միջև: Նրա խոսքերով` խոսքը վերաբերվել է Սիրիայի իրավիճակի մասին, ինչպես նաև Ուկրաինայի և Հյուսիսային Կորեային վերաբերվող հարցերին: «Սիրիայի հարցով երկկողմ համագործակցությունը դադարեցվել է, սակայն դա չի խանգարում նախարարների շփմանը»,- ասել է նա: Թոները նշել է, որ խոսքն այժմ գնում է «երկկողմ շփումներին բազմակողմանի գործընթացի շրջանակներում»: Նրա խոսքերով` դադարեցվել է «երկկողմ գործընթացը, որին հասել էին ժնևյան պայմանավորվածությունում՝ սեպտեմբերի 9-ին»: Միաժամանակ, Վաշինգտոնը չի բացառում Դամասկոսի ուժերին հարվածելը, չնայած նաև կասկածում է, որ դա բխում է ԱՄՆ-ի շահերից, լրագրողներին հայտարարել է Սպիտակ տան մամլո քարտուղար Ջոշ Էռնեստը: «Հալեպում իրավիճակի կարգավորման նպատակով Ասադի ռեժիմի դեմ ռազմական գործողությունները հազիվ թե հասնեն նպատակներին, որոնք այժմ թվում են շատերին՝ բռնության կրճատման իմաստով: Ավելի շատ հավանական է, որ դրանք կհանգեցնեն բազմաթիվ անկանխատեսելի հետևանքների, որոնք հաստատ չեն բխի մեր ազգային շահերից»,- նշել է Էռնեստը: Ավելի վաղ ամերիկյան ԶԼՄ-ները հայտնել էին, որ Սիրիայում ԱՄՆ-ի կողմից դիտարկվող հնարավորությունների թվում կան և հարվածներ կառավարական բանակի ռազմական օբյեկտների վրա: ԵՄ դիվանագիտության ղեկավար Ֆեդերիկա Մոգերինին հայտարարել է, որ Եվրամիությունը իր ջանքերն ուղղում է Սիրայի ճգնաժամի քաղաքական կարգավորմանը, այլ ոչ թե Ռուսաստանի դեմ պատժամիջոցներ սահմանելուն. «Մեր աշխատանքն ուղղված է քաղաքական լուծում գտնելուն, այլ ոչ թե այլ էլեմենտներին»: Մոգերինին նաև նշել է, որ ԵՄ իշխանությունները դեռևս հավատում են ճգնաժամի քաղաքական, այլ ոչ թե ռազմական լուծմանը: Իսկ Սիրիայի նախագահ Բաշար Ասադը հանդես է եկել ելույթով, որտեղ արձանագրել է, որ Սիրիայում այսպես կոչված չափավոր ընդդիմության գոյությունը առասպել է: «Դուք գիտե՞ք միաեղջյուրին՝ կենդանի, որը նման է ձիու և ունի եղջյուր: Դա առասպել է: Եվ չափավոր ընդդիմությունն է առասպել: Դա այն է, թե ինչու հնարավոր չէ բաժանել այն, ինչը գոյություն չունի նրանից, ինչը գոյություն ունի»,- հայտարարել է Ասադը դանիական TV 2 հեռուստաալիքին տված հարցազրույցում` մեկնաբանելով հաղորդավարի հարցը դժվարությունների մասին, որոնց բախվել է ԱՄՆ-ը «չափավոր» ապստամբներին ծայրահեղականներից բաժանելու հարցում: Նրանք բոլորն ունեն նույն անդամները, այն նույն անդամները, որոնք կոչվում էին «Սիրիայի ազատ բանակ» չորս տարի առաջ, հինգ տարի առաջ, հետո նրանք դարձան «Ան-Նուսրա», հետո նրանք դարձան ԴԱԻՇ: Այսպիսով, նույն անդամները տեղաշարժվում են մի խմբից մյուսը: Ահա թե ինչու նրանք չեն կարողանում տարբերել դրանց: Եվ նրանք չեն ցանկանում»,- նշել է նա: Ասադը վստահեցրել է, որ իշխանությունները կշարունակեն պայքարել ընդդիմության դեմ մինչև Հալեպը ամբողջովին ազատեն նրանց վերահսկողությունից: Ասադն ընդգծել է, որ երկրի իշխանությունը թույլ չի տա զինյալներին վերահսկողության տակ պահել երկրի որևէ հատված: Մետաքսյա Շալունց