Որտեղ է թաքնված գաղտնիքը
Ազգային ժողովում ԿԸՀ նախագահի եւ անդամների քննարկումը վերածվեց ընդդիմության գզվռտոցի։ ԲՀԿ-ն որեւէ կերպ դուրս չի գալիս ՏԻՄ ընտրություններին արձանագրած արդյունքների տակից եւ այսօր քննարկման մեկնարկը տվեց Միքայել Մելքումյանը, ապա շարունակեց Նաիրա Զոհրաբյանը, որոնք հորդորեցին «լայքերով» ձայներ չհավաքել, հորդորեցին խորհրդարանի ամբիոնը ճոճելու փոխարեն կուսակցական կառույցներ հիմնել, ինչպես արել է ԲՀԿ-ն եւ, ահավասիկ, ՏԻՄ ընտրություններին ստացել է արդյունքները։ Այս ելույթները հատեցին ՀԱԿ պատգամավորների համբերությունը, Լեւոն Զուրաբյանը քարուքանդ արեց նախկին գործընկերներին ՝ ըստ էության բացահայտելով նրանց ստացած քվեների իրական պատճառները, Զուրաբյանը խոսեց այն մասին, որ ԿԸՀ նախագահի եւ անդամների առաջարկին կողմ են եղել ՀՅԴ, ԲՀԿ եւ ՕԵԿ ներկայացուցիչները, պետաիրավական հանձնաժողովականի անդամներ Աղվան Վարդայանը, Լյովա Խաչատրյանը եւ Հովհաննես Մարգարյանը ։ ՀԱԿ պատգամավորը հիեցրեց ՀՀԿ-ի հետ տարբեր ժամանակաշրջաններում կոալիցիա կազմած կուսակցությունների մասին՝ նկատելով, որ այս անգամ էլ կոալիցիա են կազմել կեղծարար ԿԸՀ կազմի ընտրության համար: «Այստեղ է թաքնված ՏԻՄ ընտրությունների գաղտնիքը: Այս 4 կուսակցությունները, լինելով միմյանց մարմին ի մարմնե, տարբեր ժամանակներում կազմել են իշխանության կոալիցիայի մաս, ռոտացիոն կարգով հայտնվել են ընդդիմության շարքերում եւ իշխանությունների հետ վերածել են ընտրությունները ձայների գնման աճուրդի»,- հայտարարեց ՀԱԿ խմբակցության ղեկավար Լեւոն Զուրաբյանը՝ գործընկերներին մեղադրելով քաղաքական առուծախի մեջ: Նա անդրադարձավ Նաիրա Զոհրաբյանի խոսքերին, որն ասում էր՝ կուսակցությունները պետք է ձայն ստանալու համար մեծ աշխատանք տանեն մարզերում ու հորդորեց մեծ-մեծ չխոսել քաղաքական աշխատանքի մասին, որն իրականում եղել է ոչ այլ ինչ, քան պարզագույն առուծախ: ԲՀԿ խմբակցության ղեկավար Նաիրա Զոհրաբյանն էլ իր ելույթում արձագանքեց Լեւոն Զուրաբյանին՝ ասելով, որ պետք է արժանապատվություն ունենալ՝ այդ խայտառակ արդյունքներից հետո հետեւություններ անելու եւ պարտությունն ընդունելու. «Այն քաղաքական ուժերը, որոնք ընտրություններին զբաղեցնում են վերջին պատվավոր հորիզոնականը եւ հետո մեղադրում են ժողովրդին, անվանում են ծախված, մեղադրում են մյուս քաղաքական ուժերին, ապագա չունեն»: Նա ոչ հասցեական բազում մեղադրանքներ հնչեցրեց՝ ասելով, որ այն ուժերը, որոնք ԱԺ ամբիոնից բողոքում են ժողովրդից եւ քաղաքական մյուս ուժերից, «բիրիքով վաճառել են» հանձնաժողովի անդամի իրենց տեղերը եւ վստահված անձանց տեղերը. «Պարտությունը եւս պիտի ընդունել արժանապատվորեն: 500 հոգի Ֆեյսբուքում խլրտացողները ոչ հանրային կարծիք են, ոչ ժողովրդի: Պարզ բանաձեւ կա՝ պետք է ամենօրյա տքնաջան աշխատանք տանել, ինչպես ԲՀԿ-ն է արել: Խոսել, որ ԲՀԿ-ն ինչ-որ առուծախի եւ աճուրդի մասնակից է եղել, ես սա համարում եմ առնվազն անպարկեշտ, որովհետեւ ԲՀԿ-ն ստացել է այն, ինչ քաղել է իր աշխատանքի արդյունքում: Այն քաղաքական ուժը, որը այնքան ուժ, համարձակություն չունի ընդունելու, որ ինքը պարտվել է, տվյալ քաղաքական ուժի վերջակետը դնելու ժամանակը եկել է»: Ընդդիմության ռազբորկաները միակ հարվածը չէր, քիչ հետո ավելի դաժան հարված էր սպասվում։ Պարզվեց, որ ԱԺ նախագահ Գալուստ Սահակյանն է նեղացել լրագրողներից, նա այդ մասին ասաց, երբ իջել էր ԿԸՀ կազմի քվեարկությունը։«Որովհետև դուք սկսել եք պատգամավորներից նաև ընդդեմ ինձ, իմ խոսակցությունից որոշակի կտոր առանձնացնել և դա դարձնել պայքարի ուղի: Այդ իմաստով՝ ես որևէ մեկին հարցազրույց չեմ տա, միայն նրանց, որոնք լավագույն լրագրողներ են, առանձին առանձին, եթե գաք կտամ»,-ասաց Սահակյանը: Անի Սահակյան
Հետևեք մեզ Viber-ում
