Նորից պատժամիջոցներ

ԱՄՆ Կոնգրեսի կիբեռանվտանգության հարցերով ենթակոմիտեի նախագահ Քորի Գարդները հայտարարել է Ռուսաստանի դեմ նոր պատժամիջոցների վերաբերյալ ԱՄՆ Կոնգրեսում նոր օրինագիծ առաջադրելու իր մտադրության մասին:  Ինչպես տեղեկացնում է РИА Новости գործակալությունը, օրինագիծը, ըստ Գարդների, հիմնված է ամերիկյան հետախուզական ծառայության կասկածների վրա, որ ռուսաստանյան հաքերները ենթադրաբար փորձել են ազդել ԱՄՆ-ի ընտրությունների ելքի վրա: «Ես ծրագրում եմ խորհրդարան բերել մի օրինագիծ, որը նախատեսում է նոր պատժամիջոցներ կիրառել Ռուսաստանի այն վատ գործիչների դեմ, որոնք պատասխանատու են կիբեռդաշտում ծավալված չարամիտ գործունեության համար», - Twitter-ի իր միկրոբլոգում գրել է Գարդները: Հիշեցնենք, որ ավելի վաղ ԱՄՆ ներքին անվտանգության նախարարությունն ու ազգային հետախուզության տնօրենի գրասենյակը համատեղ հայտարարությամբ մեղադրել էին Ռուսաստանին` ԱՄՆ-ի քաղաքական կազմակերպությունների դեմ իրականացրած հաքերային հարձակումների համար: