Փակուղի. Ի՞նչ փաթեթ են բերում Սերժ Սարգսյանին
Ղարաբաղյան կարգավորման հիմքը պետք է դառնա բանակցությունների ընթացքում ձեռք բերված փոխհամաձայնեցված լուծումը, պնդում է պաշտոնական Վաշինգտոնը, ճեպազրույցում հայտարարել է Պետդեպարտամենտի լրատվամիջոցների հետ կապերի բաժնի ղեկավար Էլիզաբեթ Թրյուդոն: «Մենք շարունակում ենք ակտիվորեն աշխատել հակամարտության կողմերի հետ: Դուք գիտեք, որ մենք ԵԱՀԿ Մինսկի խմբի համանախագահներից մեկն ենք: Մեր վաղեմի քաղաքականությունը, որի հետ համամիտ են նաև ԵԱՀԿ Մինսկի խմբի համանախագահ մյուս պետությունները, հետևյալն է` հարցի արդարացի լուծումը պետք է հիմնված լինի միջազգային իրավունքի նորմերի, այդ թվում՝ Հելսինկյան եզրափակիչ հռչակագրի, ուժ չկիրառելու կամ ուժի կիրառման սպառնալիքից զերծ մնալու, տարածքային ամբողջականության և ինքնորոշման սկզբունքների վրա», - նշում էր Պետքարտուղարության պաշտոնական ներկայացուցիչը: Էլիզաբեթ Թրյուդոն ճեպազրույցում ԼՂ հակամարտությանն անդրադարձել է` պատասխանելով Ադրբեջանի պաշտոնական AzerTag գործակալության Վաշինգտոնի թղթակից Յուսիֆ Բաբանլիի հարցին: Լրագրողը Պետդեպարտամենտի ներկայացուցչին խնդրեց մեկնաբանել պետքարտուղար Ջոն Քերրիի՝ անցած շաբաթ Aspen վերլուծական ինստիտուտի և The Atlantic հանդեսի կազմակերպած համատեղ քննարկման ժամանակ հնչեցրած հայտարարությունը: Նա որպես անպտուղ բանակցությունների օրինակ հիշատակում էր հենց ղարաբաղյան հակամարտությունը: «Այսօր աշխարհում սառեցված հակամարտություններ կան: Որպես օրինակ մատնանշեմ` Լեռնային Ղարաբաղը, Ադրբեջանի և Հայաստանի միջև [առկա հակամարտությունը], որի պարագայում այս պահին հստակ լուծում չի ուրվագծվում, քանի որ առաջնորդները պատրաստ չեն, կողմերի միջև էլ լարվածություն է առկա: Դրանք բարդ հակամարտություններ են, բայց լուծման ճանապարհ հնարավոր է գտնել, եթե մարդիկ որոշակի համալիր լուծումներ ընդունեն: Մարդիկ պետք է պատրաստ լինեն ընդունել որոշակի լուծումներ», ասել էր պետքարտուղար Քերրին: Պետդեպարտամենտի ներկայացուցչից, սակայն, ադրբեջանցի լրագրողը բավական համառորեն փորձել է պարզել` ինչո՞ւ է Ջոն Քերրին հայտարարել, թե ղարաբաղյան հակամարտության լուծմանը պատրաստ չեն երկու նախագահները, այլ ոչ թե միայն Հայաստանի ղեկավարը: «Հակամարտության միակ կողմը, որ խուսափում է զորքեր դուրս բերելուց, Հայաստանն է: Նման իրավիճակում ինչո՞ւ է պետքարտուղարը հայտարարում, թե երկու առաջնորդներն էլ պատրաստ չեն հակամարտության լուծմանը», սրտնեղած հարցրել է ադրբեջանցի լրագրողը: «Երկու պետությունների ղեկավարներն էլ պատասխանատվություն են կրում խաղաղության հաստատման համար: Այդ իսկ պատճառով էլ մենք վերահաստատում ենք բանակցությունների միջոցով փոխհամաձայնեցված խաղաղության հաստատման կարևորությունը», - նշում էր Պետդեպարտամենտի պաշտոնական ներկայացուցիչ Էլիզաբեթ Թրյուդոն` հատուկ ընդգծելով, թե իր անմիջական ղեկավարի` պետքարտուղար Ջոն Քերրիի հայտարարությունները «վերլուծելու ցանկություն չունի»: Պաշտոնական Բաքուն ակնհայտորեն դժգոհ է ստեղծված իրավիճակից: Ապրիլյան քառօրյա պատերազմից հետո Ալիևը հայտնվել է, կարծես, իր իսկ լարած թակարդում: Այժմ միջնորդներն ամեն ինչ անում են, որպեսզի թույլ չտան նոր էսկալացիա սահմաններում: Այս իրավիճակում Ալիևը ստիպված է համաձայնել խաղաղ բանակցությունների շարունակմանը: Բայց այստեղ այլ հարց է առաջ գալիս` իսկ ի՞նչ են ակնկալում միջնորդները Սերժ Սարգսյանից... Եթե զիջումներ, ապա Սերժ Սարգսյանն արդեն հասկացրել է մի քանի անգամ, որ անընդունելի փոխզիջումներ չեն կարող լինել` հայկական կողմի համար, մանավանդ, որ Ալիևն, առհասարակ, որևէ զիջման պատրաստ չէ: Ակնհայտ է, որ միջնորդներն այս փուլում ընդամենը հույս են հայտնում, որ Հայաստանի և Ադրբեջանի նախագահները կհամաձայնեն հանդիպել, որովհետև դա միջնորդների համար միակ երաշխիքն է այս փուլում` Ալիևին հետ պահել նոր արկածախնդրությունից: ԵԱՀԿ ՄԽ ամերիկացի համանախագահ Ջեյմս Ուորլիքը նախօրեին նշել է. «Հույս ունենք, որ համանախագահները համաձայնություն կտան հաջորդ հանդիպումն անցկացնելու համար: Այս պահին հաջորդ հանդիպման թվականն ու տեղը հստակեցված չէ: Ամսվա վերջին տարածաշրջան կատարելիք մեր այցի ընթացքում մենք պլանավորում ենք կողմերի հետ հանդիպումներ և հարցերի քննարկումներ»: Իր հերթին նաև Ադրբեջանում Ֆրանսիայի դեսպան Աուրելիա Բուշեն վստահեցրել է, որ Փարիզը կարող է կազմակերպել Սերժ Սարգսյանի և Իլհամ Ալիևի հանդիպումը, սակայն այս պահին հայտնի չեն ժամկետներ: Այս ամսվա վերջին տարածաշրջան համանախագահների այցի ընթացքում, թերևս, կորոշվի, թե Սերժ Սարգսյանի և Իլհամ Ալիևի հանդիպման արդյունքում ինչ հարցեր կարելի է քննարկել, որով հնարավոր կդառնա առհասարակ առաջ տանել վաղուց արդեն փակուղում մխրճված ղարաբաղյան բանակցային գործընթացը: Թամար Բագրատունի