Մոսկվան ԱՄՆ-ին մեղադրում է` «սպառնալիքի ու շանտաժի» համար

Ռուս-ամերիկյան պայմանավորվածությունները չեն գործում, Սիրիայում իրավիճակն անկառավարելի է: Ռուսաստանն ու Միացյալ Նահանգները միմյանց մեղադրում եմ Սիրիայում իրավիճակը բարդացնելու, հաստատված հրադադարը չպահպանելու մեջ: Ամերիկյան կողմի նախաձեռնությամբ հոկտեմբերի 1-ին Ռուսաստանի արտգործնախարար Սերգեյ Լավրովը հեռախոսազրույց է ունեցել ԱՄՆ պետքարտուղար Ջոն Քերրիի հետ, որի ընթացքում նրանք քննարկել են Սիրիայում ստեղծված իրավիճակը, հայտնում է ՌԴ ԱԳՆ պաշտոնական ֆեյսբուքյան էջը։ «Արտաքին քաղաքական գերատեսչությունների ղեկավարները շարունակել են քննարկել իրավիճակը Սիրիայում՝ այդ թվում իրավիճակի կարգավորման հնարավորությունները Հալեպի շուրջ, որտեղ հակառակ ռուս-ամերիկյան պայմանավորվածություններին շարունակվում են մարտական գործողությունները»,- ասվում է հաղորդագրությունում։ Հեռախոսազրույցի մանրամասների հայտնի է դարձել, որ Լավրովն ուշադրություն է հրավիրել այն բանին, որ մի շարք հակակառավարական խմբավորումներ, որոնք Վաշինգտոնում համարվում են «չափավոր» ընդդիմություն, ոչ միայն չհետևեցին ռուս-ամերիկյան պայմանավորվածություններին, այլ նաև սկսեցին միանալ «Ջաբաթ ան-Նուսրայի» հետ, որը «Ալ-Քաիդայի» ստորաբաժանումն է: Նա նշել է, որ ԱՄՆ պետք է ամերիկամետ ընդդիմադիր խմբավորումները առանձնացնի ահաբեկչական խմբավորումներից: Իր հերթին, Ջոն Քերրին հայտարարել է, որ Վաշինգտոնը կարող է դադարեցնել Սիրիայում Ռուսաստանի հետ համագործակցությունը, եթե սիրիական զորքերն ու ռուսական ավիացիան չդադարեցնեն Հալեպի վրա հարձակումը: Նախօրեին կայացած հեռախոսազրույցի ընթացքում ԱՄՆ-ի պետքարտուղար Ջոն Քերին Ռուսաստանի ԱԳ նախարար Սերգեյ Լավրովին հայտարարել էր, որ ԱՄՆ-ն կսառեցնի Ռուսաստանի հետ փոխգործակցությունը, եթե Մոսկվան անհապաղ քայլեր չձեռնարկի Հալեպում հարձակողական գործողությունների դադարեցման համար: «Արևմուտքը, Միացյալ Նահանգների գլխավորությամբ, չի կատարում Սիրիայի վերաբերյալ հանձնառությունները», իր հերթին հայտարարում է Ռուսաստանի արտգործնախարար Սերգեյ Լավրովը: Նրա խոսքով՝ ԱՄՆ-ի գլխավորած միջազգային կոալիցիան հարվածներ է հասցնում միայն «Իսլամական պետություն» ծայրահեղական խմբավորման դիքերին, և ձեռք չի տալիս «Ջեբհաթ ան Նուսրայի» զինյալներին: Մոսկվան շեշտում է, որ ԱՄՆ-ը փորձում է Ռուսաստանի վրա բարդել այն բանի ամբողջ պատասխանատվությունը, ինչ տեղի է ունենում Սիրիայում: Այս մասին ուղիղ հայտարարել է Լավրովը՝ մեկնաբանելով ՄԱԿ-ի ԱԽ-ի վերջին նիստում ամերիկյան կողմի արած հայտարարությունները: Հիշեցնենք, որ ՄԱԿ-ի Անվտանգության խորհուրդը սեպտեմբերի 25-ի նիստը նվիրեց Սիրիայի Հալեպ քաղաքի իրադրությանը, որտեղ կառավարական զորքերը գործողություն են իրականացնում զինված խմբավորումների դեմ: Արտահերթ հանդիպում գումարած Մեծ Բրիտանիան, ԱՄՆ-ն և Ֆրանսիան իրենց ելույթներում մեղադրանքներ էին հնչեցնում Դամասկոսի և Մոսկվայի հասցեին։ РИА Новости Լրատվական գործակալության փոխանցմամբ` Ռուսաստանի Դաշնության փոխարտգործնախարար Սերգեյ Ռյաբկովը մեկնաբանել է ԱՄՆ-ի հայտարարությունը Ռուսաստանի հետ Սիրիայի հարցով համագործակցությունը դադարեցնելու վերաբերյալ: Ռյաբկովի խոսքով` այդ հայտարարությունները «սպառնալիքների, շանտաժի քաղաքականություն են», որոնք ուղղված են ԱՄՆ-ի համար շահավետ լուծումներ պարտադրելուն: «Նման հիմքի վրա հնարավոր չէ կարգավորման կամ կայունացման հասնել: Սակայն ուժով ոչինչ չի հաջողվի: Մենք ունենք մեր մոտեցումներն ու սկզբունքները», - ընդգծել է Ռյաբկովը: Այսպիսով, ռուս-ամերիկյան` «պատմական» համարվող համաձայնությունից օրեր անց` կրկին Մոսկվան ու Վաշինգտոնը Սիրիայի հարցում ընդհանուր հայտարարի չեն գալիս: Թեև ռուս-ամերիկյան դիվանագիտական շփումներն ու հեռախոսազրույցները Սիրիայի հարցով շարունակվում են, բայց, ակնհայտորեն, Սիրիայում խաղաղության հաստատման հույսեր մոտ ապագայում չկան... Թամար Բագրատունի