Խայտառակ դրություն Հալեպում․ ի՞նչ են մտածում Երևանում
Մի քանի օր է Հալեպում դաժան հրթիռակոծություններ են շարունակվում` ընդգրկելով նաև հայաբնակ թաղամասերը: Սիրիական պատերազմի կիզակետերից մեկը հանդիսացող Հալեպում վերջին օրերին հրթիռակոծությունները սաստկացան: Նախորդ մեկ շաբաթվա ընթացքում բազմաթիվ զոհերի թվում նաև վեց հայ կա, նրանցից մեկը՝ անչափահաս։ Տեղի «Գանձասար» թերթի թղթակցի փոխանցմամբ՝ հրթիռներն ընկել են հայաբնակ Նոր Գյուղ և Վիլլաներ թաղամասերի վրա: Հրթիռ էր ընկել նաև Հինտոյան ընտանիքի խանութի առաջ, քույրն ու եղբայրը զոհվել են, մայրը՝ վիրավորվել։ «Զոհերն են Արման Հինտոյան և Միրեյ Հինտոյան, որ քույր-եղբայր են մեկ ընտանիքից, Ծիլա Ճապաղջուրյան և Հասմիկ Կիրակոսյան, ունենք վիրավորներ, որոնք ոչ ծանր վերքեր ստացան, ոմանք ծանր վերքեր ստացան, ոմանց ոտքը, ձեռքը կտրված է արդեն: Ահավոր վիճակ էր, սարսափելի վիճակ էր: Վիլլաներ թաղամասում ամբողջ գետինները արյունլվա, շրջանն ամբողջ փակված էր, ահավոր մարդկային ծանր վիճակ էր, և դպրոցների աշակերտությունը անմիջապես ներքնահարկեր իջեցրեցին, որովհետև անտանելի ձևով հրթիռակոծումներ են լինում, և տարբեր շրջանների վրա: Ո՛չ խնայում են աշակերտներին, ո՛չ դպրոցները, պատահական ձևով բնակչության վրա հրթիռներ են նետում, խաղաղ բնակչությունը պատանդ են բռնում և թիրախ են դարձնում», - պատմել է Զարմիկի Պողիկյանը՝ հավելելով․ - «Այսինքն, մենք արդեն վարժվեցինք այս ահաբեկչական իրենց բարբարոսական արարքներին»: Հրթիռակոծության հետևանքով վիրավորվել էին 11 հայեր, նրանցից երկուսն են շարունակում բուժում ստանալ։ Հալեպի տեղական թերթի թղթակցի խոսքով՝ վերջին արյունալի դեպքերից հետո Հալեպի 8-10 հազար հայ բնակչության մի մասը հեռացել է ավելի ապահով շրջաններ. «Շատերը, օրինակ, մեկնեցին այլ՝ ավելի ապահով նահանգներ Սիրիայում, Լաթաքիա ճամփորդողներ եղան: Ընտանիքները, որ իրենց բնակարանները թեժ գոտիներում են, մտահոգ են»: Պաշտոնական Երևանը Սիրիայում ռազմական իրավիճակի սրման և Հալեպում ստեղծված իրավիճակի վերաբերյալ ընդամենը մտահոգություն է արտահայտել` ՀՀ ԱԳՆ-ն` մի քանի տողանոց հայտարարությամբ: «Առանձնահատուկ անհանգստություն է պատճառում հատկապես Հալեպի, այդ թվում նաև հայաբնակ թաղամասերի խաղաղ բնակչության դեմ զենքի խիստ դատապարտելի կիրառումը, որի հետևանքով կան մարդկային մեծաթիվ կորուստներ: Հույս ենք հայտնում, որ սիրիական հակամարտության կարգավորման բանակցային գործընթացում ներգրավված բոլոր կողմերն առավել վճռական կլինեն ահաբեկչության դեմ միասնական պայքարում և հաստատուն՝ բանակցությունների միջոցով խաղաղության վերականգնմանը», ասվում է ԱԳՆ հայտարարության մեջ: Փոխանցվում է նաև, որ նախագահ Սերժ Սարգսյանի հանձնարարությամբ՝ սիրիական հակամարտությունից տուժած բնակիչներին աջակցելու համար մոտակա օրերին երկու ինքնաթիռով Սիրիա կառաքվի մարդասիրական օգնություն։ Սիրիական պատերազմում անցած չորս տարիների ընթացքում հայ խաղաղ բնակչության շրջանում ավելի քան 120 մարդ է մահացել, շուրջ 30 հայազգի զինվորական էլ մահացել է սիրիական բանակի կազմում կռվելով: Ակնհայտ է, որ սա առավել, քան բարդ դրություն է սիրիահայերի համար: Պաշտոնական Երևանը մտահոգություն ու անհանգստություն հայտնելուց բացի` պարտավոր էր ավելի կոնկրետ քայլերով հանդես գալ` թե՛ դիվանագիտական ճակատում, թե՛ հայերին աջակցելու առումով: Սիրիահայության խնդիրներով Երևանում մերթընդմերթ քննարկումներ կազմակերպող Սփյուռքի նախարարությունը կոնկրետ անելիքներ ունի. հայությանն աջակցելը` միայն ելույթներով ու կենացներով չպետք է սահմանափակվի: Իրավիճակն ավելի կոնկրետ գործողություններ է պահանջում` հրթիռակոծությունների տակ հայտնված հայերին Հայաստան, կամ այլ անվտանգ վայրեր տեղափոխելու, ֆինանսական աջակցություն ցուցաբերելու հարցում: Հայաստանի ԱԳՆ-ի ու սփյուռքի նախարարության անգործությունն, ինչպես նաև հայաստանյան քաղաքական ուժերի լռությունն ուղղակի անհասկանալի ու դատապարտելի է: Մետաքսյա Շալունց