Վանաձորում հիմնական ահազանգերը վերաբերում են ընտրակաշառքին. ընդդիմադիր թեկնածուների շտաբերի ներկայացուցիչներ
Վանաձորում ՏԻՄ ընտրությունների հիմնական խախտումը քվեաթերթիկները նկարելն էր, իսկ հիմնական ահազանգերը վերաբերում էին ընտրակաշառքին: Այս մասին Վանաձորի ՏԻՄ ընտրությունների ընդդիմադիր թեկնածուների շտաբերի ներկայացուցիչների համատեղ ասուլիսի ժամանակ հայտարարեցին նրանք:
Հայ ազգային կոնգրես կուսակցության ներկայացուցիչ Էդգար Ոսկանյանն ասաց, որ իրենց շտաբը ստացել է բազմաթիվ ընտրախախտումներ, տեղամասերի դիմաց եղել են բազմաթիվ կուտակումներ, միջադեպեր են գրանցվել մի քանի տեղամասերում, որոնք ճշտվում են:
«Լուսավոր Հայաստան» կուսակցության ներկայացուցիչ Աստղիկ Ավետիքյանն էլ նշեց, որ խախտումներ են արձանագրվել: Ըստ նրա՝ վերջին մի քանի ժամվա ընթացքում ստացել են ահազանգ 30/17 տեղամասից, որտեղ, Ավետիքյանի խոսքով, ԲՀԿ ցուցակի երկրորդ համարը գլխավորող Հրանտ Մարգարյանը, ով այցելել է տեղամաս, դուրս է եկել հանձնաժողովի անդամներից մի քանիսի հետ, ապա, նրա գնալուց հետո նույն տեղամասում հայտնաբերվել է դատարկ քվեաթերթիկ:
30/15 տեղամասում, Ավետիքյանի խոսքով, գրանցվել է ռուսական անձնագրով քվեարկություն, ինչից հետո իրավաբանը բացատրել է հանձնաժողովին, որ դա օրենքի կոպիտ խախտում է, բայց նախագահը հրաժարվել է ընդունել պատճառաբանությունը:
«Նախագահն ասել է, որ դա թույլատրելի է, բայց, կարծես, ամեն դեպքում արձանագրություն կազմվել է»,- նշեց նա:
Հետևեք մեզ Viber-ում
