ՀՀԿ-ին լուրջ քննություն է սպասվում

Մեկ օրից Հայաստանի մի քանի խոշոր քաղաքներում եւ բազմաթիվ գյուղերում տեղի կունենան համայնքային ընտրություններ։ Այս ընտրությունները ուշագրավ են եւ իշխանության, եւ ընդդիմության համար, վերջինիս համար ՏԻՄ ընտրությունները քննություն են լինելու 2017-ի խորհրդարանական ընտրություններից առաջ։ Երեւալու է բոլորի շանսերը, որից ընդդիմադիրները հետեւություններ կանեն, կամ չեն անի։ Իսկ ամենակարեւորը պարզ է դառնալու իշխանությունների դիրքորոշումը։ Վերջին երկու շաբաթների ընթացքում, ինչպես հայտնի է երկրում իրավիճակ է փոխվել, փոխվել է վարչապետը, կառավարության կազմն է նորացվել, եւ այստեղ տեղ են գտել այսպես կոչված չվարկաբեկված մարդիկ։ Հին կառավարության օլիգարխ նախարարները թոշակի են ուղարկվել, իսկ ՀՀԿ-ականները հավակնոտ հայտարարություններ են անում, որ նոր ժամանակներ ենք թեւակոխել ու կադրային փոփոխությունների ժամանակ շեշտադրվելու է անձի պրոֆեսիոնալիզմը։ Իշխանական քարոզչամեքենան էլ այս ամենը ներկայացնում է մի լույսի ներքո, թե իբր ՀՀԿ-ն հասկանում է, որ այսպես շարունակելու ռեսուրս չունի, որ երկրում ծայրահեղ ծանր իրավիճակ է, հետեւաբար պետք է փոխվել ու այդ փոփոխությունների մեկնարկը տալ կառավարությունից։ Հոկտեմբերի 2-ին, ինչպես ասացինք, ՀՀ մի շարք խոշոր քաղաքներում ընտրություններ են սպասվում, հիմա էլ երեւում է, որ իշխանական թեկնածուները կենաց մահու պայքար են մղում վերընտրվելու համար։ Օրինակ Գյումրիում Սամվել Բալասանյանն ըստ մրցակից ընդդիմադիրների պնդումների՝ անցել է բացահայտ ընտրակաշառք բաժանելու, ակնոցներ է բաժանում գյումրեցիներին։ Հայաստանի հայրաքաղաքում որպես կանոն բոլոր ընտրություններն անակնկալ ելք են ունեցել, ընդդիմադիր Գյումրիում հակառակ իշխանության ջանքերի, քիչ բացառություններով հաղթել են ընդդիմադիրները։ Այս ընտրություններին ներկայացված է քաղաքական ողջ ներկապնակը, խորհրդարանում ներկայացված ընդդիմադիրները եւ ոչ միայն։ Վանաձորում եւս թեժ է լինելու, անցած խորհրդարանական ընտրություններին այստեղ եւս անակնկալ գրանցվեց, անկուսակցական Էդմոն Մարուքյանը մեծամասնական կարգով հաղթեց ՀՀԿ-ի թեկնածու Վիկտոր Դալլաքյանին։ Կապանում, Սիսիանում էլ է հետաքրքիր՝ առանց մրցակցության ընտրություններ չեն լինելու, գրեթե բոլոր մեծ քաղաքներում ընդդիմության թեկնածուներ են առաջադրվել։ Կան, իհարկե, համայնքներ, որտեղ չնայած ընդդիմադիրների բացակայության, այդուհանդերձ մրցակցային ընտրություններ են լինելու։ Օրինակ Արթիկում եւ Սեւանում։ Առաջինում ՀՀԿ-ի թեկնածուն նախկին ԲՀԿ-ական Մուշեղ Պետորայնն է, որը պայքարելու է ՀՀԿ-ական Մխիթար Վարագյանի հետ։ Այս երկու կլանների միջեւ բոլոր ժամանակներում թեժ մրցակցություն է եղել ինչպես քաղաքապետի, այնպես էլ պատգամավորական մանդատի համար։ Դե, իսկ Սեւանում սպասվում են մարտեր առանց կանոնների։ Գեղարքունիքի մարզպետ Ռաֆիկ Գրիգորյանը ամբողջ ՀՀԿ-ին հանել է գործող քաղաքապետ Ռուդիկ Ղուկասյանի՝ Ուդոյի դեմ, այստեղ ՀՀԿ-ն պաշտպանում է անկուսակցական Սարգիս Մուրադյանին։ Հովիկ Աբրահամյանի մտերիմ Ուդոն դարձել է իշխանության համար անցանկալի անձ, մարզպետ Գրիգորյանն էլ, ըստ մամուլի, պատվի հարց է համարել նրա հեռացումը։ Այսպիսով՝ նախընտրական խլրտոցներն արդեն իսկ ցույց տվեցին, որ բոլոր մեծ քաղաքներում պայքարը լինելու է անողոք ու թեժ։ Ինչպե՞ս կանցկացնի իշխանությունը այդ ընտրությունները, հին ու բարի մեթոդներո՞վ, թաղային հեղինակությունների միջամտությամբ, թե բոլորովին նոր որակ կբերվի այս ընտրություններին, պարզ կդառնա մի քանի օրից։ Մի բան պարզ է, որ այս ընտրությունները քննություն են լինելու ՀՀԿ-ի համար, դրանից հետո նոր միայն կարելի է հավատալ ՀՀԿ-ի փոխվելու մասին ամպագոռգոռ հայտարարություններին։ Եթե իշխանությունը հավատարիմ մնա իր սկզբունքներին ու ընտրություններն անցնեն հին ձեռագրով, կնշանակի կադրային այս փոփոխությունները սոսկ թոզփչոցի են, դիվիդենտների հավաքագրում 2017-ի խորհրդարանական ընտրությունների համար։ Անի Սահակյան