Ընդդեմ Գյուլենի. պայքարը շարունակվում է
Ադրբեջանի գլխավոր դատախազ Զաքիր Գարալովը հայտարարել է, որ իրենք Թուրքիայի գլխավոր դատախազության հետ համատեղ շարունակում են աշխատել Թուրքիայում հուլիսի 15-ին տեղի ունեցած հեղաշրջման փորձի գլխավոր կազմակերպիչ համարվող թուրք կրոնական քարոզիչ Ֆեթուլլահ Գյուլենի «Հիզմեթ» («Ծառայություն») խմբավորման անդամներին Ադրբեջանի տարածքում հայտնաբերելու և վնասազերծելու ուղղությամբ: Այս մասին գրում է ադրբեջանական «Թրենդ» գործակալությունը: Ադրբեջանի գլխավոր դատախազությունը, ՆԳՆ-ի և ԱԱԾ-ի հետ համատեղ, «Հիզմեթ» խմբավորման քարոզչական գործունեության հետաքննման և կանխարգելման հետ կապված քրեական գործի շրջանակում ստեղծել է օպերատիվ-քննչական խումբ: Հայտնի է, որ այս գործի շրջանակում մոտ ապագայում կրկին Թուրքիա կգործուղվի Ադրբեջանի գլխավոր դատախազության քրեական բաժնի ղեկավարը: Հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, որը ներկայում բնակվում է ԱՄՆ Փենսիլվանիա նահանգում:
Հետևեք մեզ Viber-ում
