Իսրայելը Թուրքիային 20 մլն դոլար կփոխանցի

Իսրայելը Թուրքիային 20 մլն դոլարի փոխհատուցում է փոխանցել «Ազատության նավատորմիղի» միջադեպից Թուրքիայի 9 քաղաքացիների մահվան դիմաց: Թուրքիայի նախագահ Թայիփ Էրդողանը նախկինում հաստատել է խորհրդարանի կողմից վավերացված Իսրայելի եւ Թուրքիայի հարաբերությունների կարգավորման պայմանագիրը, որը ստորագրվել էր հունիսի 28-ին: Պայմանագրի համաձայն՝  25 օրվա ընթացքում Իսրայելը պետք է Թուրքիային 20 մլն դոլար փոխհատուցում վճարեր 2010 թվականին «Ազատության նավատորմիղի» միջադեպի դիմաց, որը երկրների հարաբերությունների վատացման պատճառ էր դարձել, հայտնում է NTV-ն: Թուրքիայի ղեկավարությունում NTV-ի աղբյուրների համաձայն՝ փողը փոխանցվել է Թուրքիայի արդարադատության նախարարության հաշվեհամարին եւ կբաժանվի զոհվածների ընտանիքներին: Հաղորդվում է նաեւ, որ առաջիկա շաբաթների ընթացքում Անկարան Իսրայելում նոր դեսպան կնշանակի: 2010 թվականին իսրայելական «կոմանդոսը» գրավել էր «Ազատության նավատորմիղը», որը նավարկում էր Գազայի հատվածի շրջափակման խախտմամբ: Տեղի ունեցածը հանգեցրել էր նավարկությանը մասնակցող 9 թուրքերի զոհվելուն: