«Պրիմիտիվ գողությունն» արմատախիլ անելու մասին կենացներ չլսենք

Վարչապետ Կարեն Կարապետյանը ՀՀ էկոնոմիկայի նախարարության աշխատակազմին է ներկայացրել նորանշանակ նախարար Սուրեն Կարայանին: Նա նշել է, որ մեծապես կարևորում է այս նախարարության աշխատանքը և պարոն Կարայանից ու աշխատակազմից ակնկալում է կառուցվածքային նոր լուծումներ և առաջարկություններ: «Մենք պետք է հանրությանը, ներդրողին, գործարարին հայտարարենք և ամեն ինչով ապացուցենք, որ իր կողքին կանգնած ենք: Մենք պետք է վերանայենք այն օրենսդրական նորմատիվ դաշտը, որը ձևավորում է բիզնես միջավայրը: Եթե այնտեղ առկա են խոչընդոտներ, պետք է վերացնենք: Պետք է ստեղծել այնպիսի դաշտ, որպեսզի արտասահմանից ներդրողը գա և իրեն զգա ապահով ու արդարացի միջավայրում: Ձեզնից ակնկալում եմ նաև նոր նախագծեր, որոնք կկարողանանք տրամադրել արտաքին աշխարհին»,- ասել է Կարեն Կարապետյանը՝ հավելելով, որ այս նախարարությունը պետք է իր կառավարման որակով օրինակ ծառայի բիզնեսին, ներկայացնի ժամանակակից կառավարման ձևերը: Հիմա շատ է խոսվում այն մասին, որ նոր կառավարությունն առաջնորդվելու է «նոր մոտեցումներով»: Ի՞նչ է նոր մոտեցումը, նոր սկիզբը, որո՞նք են այլ մոտեցումները... Ի վերջո` կարելի է ընտրել ցանկացած կարգախոս... Սերժ Սարգսյանն օրեր առաջ ներկայացնելով նոր վարչապետին՝ հայտարարեց, որ նա ունակ է առաջնորդել փոփոխությունների մեծ ալիքը Հայաստանում. «Ես վստահ եմ՝ արդյունավետ աշխատելով՝ Կարեն Կարապետյանը կկարողանա դառնալ փոփոխությունների յուրօրինակ սիմվոլը Հայաստանում»: Փոխվեցին հիմնականում տնտեսական ոլորտը համակարգող գերատեսչությունների ղեկավարները՝ էկոնոմիկայի, ֆինանսների, գյուղատնտեսության, տրանսպորտի և կապի նախարարները։ Բայց արդյոք երաշխի՞ք է, որ անգամ կառավարության կազմի հարյուր տոկոսանոց փոփոխությունը` տնտեսական էական զարգացման ակնկալիք առաջացնի: Այստեղ, իսկապես, պետք չէ ունենալ պատրանքներ: Որովհետև, քանի դեռ չկա կամք, որոշում` քաղաքական դաշտում որոշում, հերթական հիասթափությունն ուղղակի ժամանակի հարց է։ Ինչպե՞ս նպաստել, որ ներդրումներն ավելանան` թե՛ ներքին, թե՛ արտաքին: Տնտեսական ազատություն` պատասխանը գիտեն բոլորը, մրցունակ պայմաններ: Բայց կա՞ նման որոշում: Նորանշանակ վարչապետը խոսեց «պրիմիտիվ գողության» մասին: Սա դարձավ բուռն քննարկումների առիթ, բայց Կարեն Կարապետյանի հայտարարությունը կոնկրետ քրեական գործի նյութ պետք է դառնար իրավապահների համար: Բոլորը պետք է գիտակցեն, որ ով պետական բյուջեից գողություն կատարի` պատժվելու է: Ինչպե՞ս վերացնել «պրիմիտիվ գողությունը»: Մի՞թե դրա համար     բարդ սխեմաներ են հարկավոր, կամ օրինակ` հազար ու մի հանձնաժողովների ստեղծում: Թող պատժվեն «պրիմիտիվ գողերը», որպեսզի դա նաև դաս լինի «ոչ պրիմիտիվ» գողերի համար: Այսինքն` մենք պետք է հասկանանք, որ իշխանությունների այս կամ այն հայտարարությանը պետք է հետևեն կոնկրետ գործողություններ: Անցել են` հասարակությանը դուր գալու համար հայտարարություններ անելու ժամանակները: Այդ «կենացները» լսելու ժամանակ իսկապես չկա, բացի այդ դրանց ոչ ոք չի հավատում: Ինչու՞ են լռում իրավապահ մարմինները, երբ այս կամ այն իշխանավորը խոսում է ինչ-որ չարաշահումների մասին: Պատասխանը շատ պարզ է` որովհետև նրանց չեն կարգադրում` զբաղվել ու բացահայտել այդ չարաշահումը բացահայտելով: Մետաքսյա Շալունց