ԲՀԿ-ն՝ Հովիկ Աբրահամյանի դե՞մ է դուրս եկել

Հովիկ Աբրահամյանի պաշտոնանկությունը ԲՀԿ-ին է վերադարձրել հայրենի կառավարության նկատմամբ նախկին զգացմունքները։ Տիգրան Սարգսյանի կառավարության բմբուլները քամուն տվող ԲՀԿ-ականները մոտ երկու տարի ծպտվել էին ու բացարձակապես չէին քննադատում Հովիկ Աբրահամյանի կառավարությանը, բացառությամբ մեկ-երկու նախարարների, մասնավորապես ֆինանսների նախկին նախարար Գագիկ Խաչատրյանի, որը  լավ հարաբերություններ չունի Հովիկ Աբրահամյանի հետ։ Կարեն Կարապետյանի վարչապետ նշանակվելուն պես բացվել է ԲՀԿ-ականների լեզուն, պատեհ-անպատեհ նրանք անդրադառնում են գործող կառավարությանը, թեպետ այն դեռեւս մեծ հաշվով գործունեություն չի ծավալել։ Հովիկ Աբրահամյանի կառավարությունը, որը գրեթե ամբողջությամբ կազմված էր օլիգարխիայից ու աղմկահարույց դեմքերից որեւէ անգամ չքննարկվեց ԲՀԿ-ի կողմից։ Այսօր չնայած խորհրդարանում բոլորովին այլ նախագիծ էր քննարկվում՝ «Պետական պաշտոններ զբաղեցնող անձանց վարձատրության մասին» Հայաստանի Հանրապետության օրենքում լրացումներ և փոփոխություններ կատարելու մասին օրենքի նախագիծը, դա չխանգարեց ԲՀԿ ղեկավար Նաիրա Զոհրաբյանին իր ելույթի առանցքում այլ խնդիրներ արծարծել։ Նա անդրադարձավ կառավարափոխությանը եւ դժգոհեց նոր նշանակումներով, Նաիրա Զոհրաբյանի կարծիքով փոփոխությունը միայն տեխնիկական են ու բացահայտում են մեր օրակարգի մի շատ հետաքրքիր երևույթ: Նրա գնահատմամբ՝ նոր Կառավարությունը կրկին ամեն ինչ իր համար ձևեց: «Երեկ խորհրդարանական մեծամասնությունը վավերացրեց կառավարության կառուցվածքում փոփոխություններ կատարելու մասին նախագիծը, հերթական անգամ այս կառավարությունը ձևվեց կոնկրետ մարդկանց վրա: Այն նախարարությունները, որոնք, ակնհայտ էր, պիտի դառնային կոմիտե, մնացին նախարարություն, քանի որ տեր ունեն, իսկ այսպես ասած՝ հարաբերական «անտերները» վերաձևվեցին կոմիտեների, հերթական շտոպկան տեղի ունեցավ, կարուձևը հերթական խումբ մարդկանց վրա, ուղղակի այնքան պարկեշտություն ունեցան, որ եթե նախորդ կառավարության վրա ձևում էին կոալիցիոն հուշագրի համաձայն՝ կարևորը որակը չէ, կարևորը քանակն է, և կապ չունի մարդը ոլորտին տիրապետում է, թե՝ չէ, կարա լողի չեմպիոն էլ լինի, եթե լինի կուսակցական հանձնարարություն: Նախորդ անգամ ասացին, որ այս շտոպկան քաղաքական նպատակահարմարությունից ելնելով է, այս անգամ քաղաքական նպատակահարամարության անուն չտվեցին, ասացին՝ այդպես է պետք»,- նշեց պատգամավորը շարունակելով․ «Ամեն ինչ արվում է՝ քաղաքական նպատակահարմարությունից ելնելով, և վաղն էլ, երբ կլինի նոր կառավարություն, բնականաբար խորհրդարանը հերթական կարուձևին կողմ կքվեարկի՝ ի դեմս մեծամասնության: Պրոֆեսիոնալիզմից, օպտիմալ կառավարությունից հանկարծ չխոսեք, դա չի գործում այստեղ: Պահի ու րոպեի քաղաքական նպատակահարմարությունից ելնելով են այս փոփոխությունները։ Կան անձինք, որոնք տեր ունեն, ու որոնք մնացին կառավարությունում ու կան «անտերներ», ում կարելի էր , ու քաղաքական նոր համաձայնությունները ձևավորել նոր դեմքով»,- եզրափակեց Զոհրաբյանը: Իհարկե, կարելի է ինչ-որ հարցերում համաձայնել Նաիրա Զոհրաբյանի հետ, բայց առանցքային շեշտդրումը, թե «անտերներ»-ը գնացին ու մնացին տերովները, այնքան էլ այդպես չէ։ Նախորդ կառավարության ամենատերով մարդիկ Գագիկ Բեգլարյանը, Գագիկ Խաչատրյանը, Հասմիկ Պողոսյանը, Արամայիս Գրիգորյանը եւ էլի ուրիշներ չմնացին Կարապետյանի կառավարությունում, չնայած որ նրանցից առաջինը Սամվել Կարապետյանի հետ քավոր-սանիկ է, երկրորդը հայտի է իր ազդեցիկ կապերով, վերջին երկուսը վայելում են Սերժ Սարգսյանի վստահությունը, իսկ տիկին Հասմիկը՝ անգամ Ռիտա Սարգսյանի։ Տերովներից մնացել են Արփինե Հովհաննիսյանը եւ Դավիթ Հարությունյանը, որոնց մասին մամուլը գրում է, թե միջնորդել է անձամբ Հովիկ Աբրահամյանը։ Այսինքն եթե ասվում է մի բան, ապա պետք է ամբողջն ասել, որպեսզի հանրության լայն շրջանակների մոտ թյուր տպավորություն չձեւավորվի։ Նաիրա Զոհրաբյանի գրոհը այս նախարարների ու նրանց ««տիրոջ» դե՞մ է․․ Անի Սահակյան