Տարածքների վերադարձ Հայաստանին, Մեծամորի ատոմակայան` ծիծաղաշարժ մեղադրանքներ
Էրդողան-Բայդեն բանակցություններն, ինչպես երևում է, որևէ արդյունք չեն տվել` կպատասխանի իսլամական քարոզիչ Ֆեթհուլլահ Գյուլենի արտահանձնման հարցով: Որքան պաշտոնական Վաշինգտոնը փորձեց բացատրել, որ ԱՄՆ-ում պաշտոնյաները չեն կարող որոշել այս կամ այն մարդու ճակատագիրը, իրավական դաշտում է լուծվում, Անկարան շարունակում է նույն երգը երգել... Թուրքիայի արդարադատության նախարար Բեքիր Բոզդաղը հայտարարել է, որ Անկարան ակնկալում է, որ Վաշինգտոնը 1-2 օրում կպատասխանի իսլամական քարոզիչ Ֆեթհուլլահ Գյուլենի արտահանձնման մասին իր հարցմանը. Գյուլենը Թուրքիայում մեղադրվում է պետական հեղաշրջման փորձին մասնակցելու համար: «Մենք Գյուլենի արտահանձնման շուրջ ակտիվ բանակցություններ ենք վարում ամերիկյան կողմի հետ: Անհրաժեշտ փաստաթղթերը ներկայացրել ենք նրան: Ինչպես մեզ հայտնել են ԱՄՆ-ից, նրանք 1-2 օրում կպատասխանեն Գյուլենի ժամանակավոր կալանավորման մասին մեր հարցմանը: ԱՄՆ-ն արտահանձնման մասին պայմանագրով Անկարայի պահանջով պետք է կալանավորի Թուրքիայի քաղաքացուն»,- ասել է Բոզդաղը: Իսկ Թուրքիայում շարունակվում է «վհուկների որսը»... Բռնագրավվել է 60 գործարարի գույք, որոնց մեղադրում են իսլամական քարոզիչ Ֆեթհուլլահ Գյուլենի շարժմանը ֆինանսական աջակցություն ցուցաբերելու համար: Թերթի տվյալներով՝ ավելի քան 200 ընկերություններ տուգանվել են 2.7 միլիարդ լիրայով: Նրանց նույնպես մեղադրում են Գյուլենի շարժմանը ֆինանսապես աջակցելու համար: Թուրքական Son dakika լրատվական կայքի փոխանցմամբ՝ Թուրքիայում պատրաստվում է զինված ուժերի ամենամեծ «մաքրումը»: Այդ կապակցությամբ պատրաստվում է ամենամասշտաբային ուսումնասիրությունը՝ զինված ուժերի շարքերում գյուլենականներին հայտնաբերելու համար: Ամեն ինչ ենթարկվելու է մանրակրկիտ ուսումնասիրության, որպեսզի գյուլենականները բացառվեն զինված ուժերից: Հուլիսի 15-ի ռազմական հեղաշրջման փորձից հետո Թուրքիայի զինված ուժերի շարքերից արդեն հեռացվել է 4545 զինվորական, որոնք համարվել են գյուլենական, սակայն առաջիկայում այդ ցուցանիշը կարող է մի քանի անգամ բազմապատկվել: Ի դեպ, Թուրքիայի արդարադատության նախարար Բեքիր Բոզդաղը հայտարարել է, որ Թուրքիայում ռազմական հեղաշրջման փորձի կապակցությամբ կալանավորվածների թիվը հասել է արդեն 32 հազարի: «Ռազմական հեղաշրջման փորձի հետ կապված՝ հետաքննություն է տարվում 70.000 մարդու նկատմամբ, որոնց կասկածում են Ֆեթհուլլահ Գյուլենի կազմակերպության հետ կապեր ունենալու համար: Ներկա դրությամբ կալանավորված է 32.000 մարդ»,- հայտնել է նախարարը: Առհասարակ, Թուրքիայի իշխանությունները «գյուլենական» պիտակավորմամբ` արդեն հանդես են գալիս ծիծաղաշարժ մեկնաբանություններով: Թուրքիայի էկոնոմիկայի նախարար Նիհաթ Զեյեբքջին Դենիզլիուն գործարարների ու ՀԿ-ների ներկայացուցիչների հետ հանդիպմանը սկանդալային հայտարարություն է արել հուլիսի 15-ի ռազմական հեղաշրջման փորձի վերաբերյալ` ասելով. «Հուլիսի 15-ի ռազմական հեղաշրջման փորձի միջոցով ցանկանում էին Թուրքիայի տարածքները տրամադրել երկու երկրի: Խոսքը Հայաստանի ու Քուրդիստանի մասին է: Նրանք ցանկանում էին կյանքի կոչել մասնատման մասին 100 տարի առաջվա քարտեզը»,- հայտարարել է նախարարը: Դե իսկ Թուրքիայի էներգետիկայի ու բնական պաշարների նախարար Բերաթ Ալբայրաքը, ելույթ ունենալով Վիեննայում ԱԷՄԳ-ի Գլխավոր կոնֆերանսում, անդրադարձել է Մեծամորի ատոմակայանի գործունեությանը. «Անհրաժեշտ է փակել Մեծամորի ատոմակայանը։ Այն գտնվում է սեյսմիկ վտանգավոր գոտում և սպառնալիք է տարածաշրջանի երկրների և, մասնավորապես Թուրքիայի համար։ Աշխարհն ու խաղաղությունը Չեռնոբիլի վթարից հետո չի կարող թույլատրել երկրորդ ատոմային աղետի գրանցում։ Մեծամորի ատոմակայանը կառուցվել է 47 տարի առաջ և գտնվում է թուրքական սահմանից ընդամենը 16 կիլոմետր հեռավորության վրա։ ԱԷՄԳ-ին կոչ ենք անում հետևել համանման վիճակում գտնվող բոլոր ատոմակայանների աշխատանքին»։ Մետաքսյա Շալունց