Շիմոն Պերեսը մահացել է

Կյանքի 94-րդ տարում մահացել է Իսրայելի նախկին նախագահ Շիմոն Պերեսը: ՏԱՍՍ-ի փոխանցմամբ՝ այս մասին հիվանդանոցում լրագրողներին հայտնել է նրա որդին: Շիմոն Պերեսը սեպտեմբերի 13-ին տեղափոխվել էր հիվանդանոցի ինտենսիվ թերապիայի պալատ: Համակարգչային տոմոգրաֆիան նրա մոտ գլխուղեղի արյունազեղում էր ցույց տվել: Որոշվել էր հիվանդին արհեստական կոմայի մեջ մտցնել: Սեպտեմբերի 27-ին բժիշկները հայտնել են Պերեսի վիճակի կտրուկ վատացման մասին: Իսրայելի նախկին նախագահ Շիմոն Պերեսի բժշկի փոխանցմամբ՝  93-ամյա քաղաքական գործիչը մահից հետո  դոնոր է դարձել, հայտնում է ria.ru-ն՝ մանրամասնելով, որ Պերեսի աչքերի եղջերաթաղանթները տրվել են  փոխպատվաստման կարիք ունեցող հիվանդներին: «Շիմոն Պերեսը մեզ լքեց առանց որևէ տանջանքների: «Շիբա» կլինիկայի հմուտ բժիշկները մինչև վերջ պայքարել են նրա կյանքի համար ու ամեն ինչ արել են, որպեսզի նա չտանջվի»,- պատմել է բժիշկ Ռաֆի Վալդմանը: Նշենք, որ 2013թ. մինչև իր պաշտոնաթողությունը Պերեսը եղել է մոլորակի ամենատարեց գործող պետության ղեկավարը։ Նա 2 անգամ եղել է Իսրայելի վարչապետ, 2 անգամ՝ վարչապետի պաշտոնակատար, և իր քաղաքական կարիերայի ավելի քան 66 տարիների ընթացքում 12 անգամ եղել է Իսրայելի նախարարների կաբինետի անդամ:   Նա տարբեր դիվանագիտական և ռազմական պաշտոններ է զբաղեցրել 1948 թվականի Արաբա-իսրայելյան անկախության պատերազմի ընթացքում և դրանից հետո։