Ոչինչ չի բաժանի ՀՀԿ-ին ու ՀՅԴ-ին
Այսօր կառավարության նախաձեռնությամբ ԱԺ արտահերթ նիստ է հրավիրվել: Նախապես հայտարարվել էր, որ արտահերթի օրակարգում Հարկային օրենսգիրքն ու կառուցվածքային փոփոխություների հարցն է, սակայն պարզվեց, որ օրակարգում մի շարք օրենքներ կան։ ՀԱԿ խմբակցության ղեկավար Լևոն Զուրաբյանը իր դժգոհությունը հայտնեց կառավարության ներկայացրած օրակարգի վերաբերյալ` ասելով, որ ոչ թե պետք էր 22 օրենք «ճխտել» օրակարգում, այլ ներկայացնել միայն կառուցվածքային փոփոխությունների մասին հարցը:«Կառավարությունը ցույց է տալիս, որ շատ նման է իր նախորդին, և դիտարկում է խորհրդարանը որպես դակող ու կամակատար մարմին»,- ասաց նա: ԱԺ նախագահ Գալուստ Սահակյանը հակադարձեց՝ խորհրդարանի մեծ մասը չի կիսում այդ կարծիքը։Լեւոն Զուրաբյանի դժգոհությանը միացավ ԲՀԿ խմբակցության ղեկավար Նաիրա Զոհրաբյանը` ասելով, որ կառավարությունը խնդիր ունի հերթական անգամ կառավարությունը վերաձևելու, ինչ-որ մեկին նախարար նշանակելու, ինչ-որ նոր կոմիտե ստեղծելու, Զոհրաբյանը դժգոհեց նաեւ, որ այս խառը պահին բերվել է տխրահռչակ Հարկային նոր օրենսգիրքը, ասաց, որ պատգամավորների մեծ մասն այս օրերին զբաղված է ՏԻՄ քարոզարշավով և չի կարող ներկա գտնվել արտահերթ նիստի քննարկումներին: Գալուստ Սահակյանը նրան էլ արձագանքեց` ասելով, որ Հարկային օրենսգրքի քննարկումներին պատգամավորների մեծ մասը չէր մասնակցել, իսկ այն լրջորեն փոփոխության է ենթարկվել: «Ի՞նչ է նշանակում` ՏԻՄ ընտրությունների են մասնակցում, ի՞նչ է, խորհրդարանն ընդհանրապես չպետք է աշխատի, ինչ է` դուք գնում եք քարոզարշավի»,- ասաց նա:Եթե ՀԱԿ-ն ու ԲՀԿ-ն որոշել է էիմ մի բաժակ ջրում փոթորիկ բարձրացնել ու ամեն գնով քննադատել իրենց ջանքերով վարչապետ Հովիկ Աբրահամյանին փոխարինած Կարեն Կարապետյանի կառավարությանը, ապա ՀՅԴ-ն էլ իր հարցերն էր լուծում։ Մենք ավելի վաղ գրել էինք, որ ՀՅԴ-ի՝ Կարապետյանի նկատմամբ վերաբերմունքի ակնհայտ փոփոխություն է տեղի ունեցել։ Մի քանի օրերի ընթացքում ՀՅԴ-ականները սկզբում գրոհեցին Կարապետյանի ուղղությամբ, նրան հասցրեցին տարբեր բնութագրեր տալ, հետո ակնհայտ մեղմացած հայտարարեցին, որ Կարապետյանի բռնած ճանապարհը ճիշտ է։ Այսօր Աժ-ում Աղվան Վարդանյանը վստահեցնում էր, որ ՀՀԿ-ՀՅԴ համաձայնությունը ոչ մի կերպ չի փլուզվի։ ՀՀ էկոնոմիկայի նախարարի պաշտոնակատար Արծվիկ Մինասյանին էլ նորանշանակ վարչապետ Կարեն Կարապետյանն առաջարկել է մնալ կառավարությունում և աշխատանքը շարունակել որպես ՀՀ բնապահպանության նախարար: Աղվան Վարդանյանի ընդգծմամբ` Կարեն Կարապետյանն ինքն է Արծվիկ Մինասյանին առաջարկել մնալ և գլխավորել Բնապահպանության նախարարությունը: Լրագրողների հարցին, թե արդյոք Արծվիկ Մինասյանը կարող է աշխատել որպես բնապահպանության նախաարար` ոլորտի մեջ չլինելով, ՀՅԴ խմբակցության քարտուղարը պատասխանեց, որ Արծվիկ Մինասյանի հմտությունները բոլորին են հայտնի և վստահություն հայտնեց, որ խնդիր չի լինի: Հարցին, թե արդյոք լուսանցքային չի դառնում ՀՅԴ դերը կոալիցիայում էկոնոմիկայի նախարարի պորտֆելի կորստից հետո, Աղվան Վարդանյանը վստահեցրեց, որ ՀՅԴ-ն չի պատրաստվում դուրս գալ կոալիցիայից ու հայտարարեց, թե ՀՅԴ-ի համար գերխնդիրը ոչ թե պորտֆելների քանակն է, այլ ծրագրերի իրականացումը: Նա նաև ասաց, որ Կարեն Կարապետյանը վճռական է պայքարելու կոռուպցիայի և երկրում այլ խնդիրների լուծման համար: ՀՀԿ խմբակցության ղեկավար Վահրամ Բաղդասարյանն էլ անդրադարձավ ՀՀԿ-ՀՅԴ համաձայնագրին: Ըստ Բաղդասարյանի` ՀՅԴ-ՀՀԿ հուշագրում նշված չէ, թե որ պաշտոնները կարող են զբաղեցնել ՀՅԴ-ականները, ընդամենը կա պայմանավորվածություն քանակի մասին: «Հուշագրում ասված է, որ երեք դաշնակցական մեր գործընկերներ պետք է լինեն կառավարության կազմում: Մենք դա պահպանում ենք ու կպահպանենք»,- հայտարարեց նա: Ինչ վերաբերում է Արծվիկ Մինասյանի՝ այլ նախարարի պաշտոնի անցնելու հնարավորությանը, Բաղդասարյանը նշեց, որ կա նոր վարչապետ, ձևավորվում է նոր կառավարություն: «Վարչապետը կարող է առավել գնահատում է Արծվիկ Մինասյանին այլ ոլորտում և գտնում է, որ նա այլ ոլորտում ավելի օգտակար կլինի»,- ասաց նա՝ հավելելով, որ եթե Մինասյանը չբավարարեր նախարարի պահանջներին, այլ արձագանքներ կլինեին: Անի Սահակյան
Հետևեք մեզ Viber-ում
