ՀՀԿ-ի թատրոնը

ԱԺ արտահերթ նիստում քննարկվում է կառավարության կառուցվածքային փոփոխությունների հարցը: էկոնոմիկայի նախարարությունը վերանվանվում է տնտեսական զարգացման եւ ներդրումների նախարարության, տրանսպորտի նախարարությունը` տրանսպորտի, կապի և ՏՏ նախարարություն, էներգետիկայի ու բնական պաշարների նախարարությունը` էներգետիկ ենթակառուցվածքների և բնական պաշարների նախարարություն: Լուծարվում է քաղաքաշինության նախարարությունը: «Նախարարությունների անվանումների փոփոխությունը պայմանավորված է նոր կառավարության կողմից որոշակի առաջնահերթությունների ընդգծմամբ, նոր մոտեցումների մեկնարկով»,- ասաց Արդարադատության նախարար Արփինե Հովհաննիսյանը, որը նշանակված է հիմնական զեկուցող։ Սակայն մինչ նախարարը կներկայացներ նախագիծն ու հիմնավորումները, արտահերթ առաջարկով հանդես եկավ ԱԺ նախագահի տեղակալ Էդուարդ Շարմազանովը: Նա ներկայացրեց Հանրապետական կուսակցության առաջարկը, այն է՝ Սփյուռքի նախարարությունը վերանվանել Սփյուռքի և հայրենադարձության նաախարարության: Շարմազանովը դա բացատրեց նրանով, որ բոլոր սփյուռքահայերի հայացքները պետք է ուղղված լինեն Հայաստանին, և որ դա ուղերձ կլինի աշխարհի հայությանը, որ հայրենադարձությունը Հայաստանի ռազմավարություններից մեկն է: Նա հավելեց, որ ոգեշնչվել են Իսրայելի հաջող օրինակով: Արփինե Հովհաննիսյանը նշեց, որ կարևորում է այդ հարցադրումը, հասկանում է, թե ինչու է «հայրենադարձություն» բառը կարևորվում, հասկանում է, թե ինչ «մեսիջ» են ուզում դրանով փոխանցել: «Այդ փոփոխությունը նաև ֆունկցիոնալ փոփոխություններ կառաջացնի, սա մեսիջ է: Ինձ համար ընդունելի է, ընդունում եմ ի գիտություն, առաջիկայում այդ առաջարկը կդարձնենք քննարկման առարկա և կտեղեկացնենք որոշումների մասին»,- ասաց նա: ՀՀԿ խմբակցության մեկ այլ անդամ Հայկ Բաբուխանյանն ամբողջացրեց ՀՀԿ-ի թատրոնը, շարունակելով թեման, առաջարկեց սփյուռքին ու հայրենադարձությանը մի բառ էլ ավելացնել՝ փախստականները, որի արդյունքում նախարարության անվանումը կդառնա հայրենադարձության, սփյուռքի և փախստականների նախարարություն։ Այս առաջարկի վերաբերյալ էլ նախարարն ասաց, որ եթե իր անձնական տեսակետն է հարցնում, ապա ինքն այնքան էլ նպատակահարմար չի գտնում փախստականներ բառը նախարարության անվանման մեջ այն արտացոլելը։ Բայց խոստացավ այդ առաջարկությունը ևս քննարկել։ Դե, ինչ ՀՀԿ-ն ամբողջությամբ վերածվում է մանկապատանեկան ակումբի։ Փաստորեն, այստեղ այնքան միամիտ են, որ կարծում են, թե բառի ավելացմամբ կամ պակասեցմամբ հնարավոր է կասեցնել կամ խրախուսել արտագաղթը։ Ստացվում է, որ արտագաղթ, ուղղորդված հայաթափում իրականացնող իշխանությունները կարծում են, թե հայրենադարձության մասին թմբկահարելով կարող են թոզ փչել ժողովրդի աչքին եւ դիվիդենտներ շահեն սփյուռքում, որը վերջին տարիներին կարելի է ասել կապերը խզել է հայրենիքի հետ ու ասվածի վառ ապացույցը դրամահավաքության տարբեր ծրագրերն են։ Պարզից էլ պարզ է, որ ՀՀԿ-ում նախընտրական տրամադրություններ են ու առաջիկայում փորձելու են դիվիդենտներ շահելու նպատակով նման էժանագին ակցիաներ իրականացնել։ Եւ վերջապե, մեկը հարցնող լինի՞, այդ ինչով էր զբաղում Հրանուշ Հակոբյանն այսքան տարի «Արի տուն» ծրագրի շրջանակներում։ Գուցե տիկին նախարարն իր սեփական տուն էր կանչում հայրենադարձներին եւ դա անում էր ըստ ճաշակի։ Ի դեպ, նշենք, որ դեռ անցած շաբաթ կառավարության նիստում հայտարարվեց , որ էկոնոմիկայի նախարարությունը կկոչվի ներդրումների և ձեռնարկատիրությանն աջակցության նախարարություն: Բայց արդեն այսօր, երբ ԱԺ նիստում կառավարության կառուցվածքային փոփոխությունների հարցն էր ներկայացնում արդարադատության նախարարի պաշտոնակատար Արփինե Հովհաննիսյանը, հայտնի դարձավ, որ նախարարությունը կկոչվի տնտեսական զարգացման եւ ներդրումների նախարարություն։ Անի Սահակյան