«Միլիոնատերն ուզում է 500 մլն դոլարի ակցիա առնի, բայց չի կարող». Հրանտ Բագրատյան

«Տնտեսական քաղաքականությունն ո՞վ է գրելու, ո՞վ է ամփոփելու ամբողջը: Չի կարող երկիրը յոլա գնալ առանց էկոնոմիկայի նախարարության, որն առնվազն երկու բան պիտի անի՝ ասի, թե տնտեսական քաղաքականության սկզբունքներն ինչպիսին են, երկրորդ, պետք է որոշի, թե ինչի վրա է պետությունը փող ծախսում»,- այսօր խորհրդարանում կառավարության կառուցվածքի փոփոխության հարցի քննրակման ժամանակ ասաց ընդդիմադիր պատգամավոր Հրանտ Բագրատյանը:Այն, որ էկոնոմիկայի նախարարությունը վերածվում է ներդրումների նախարարության, ըստ Բագրատյանի, լավ է, որ ներդրումները կարևորում են, բայց ինչո՞ւ չեն թողնում, որ արժեթղթերի շուկան զարգանա: «Դիտմամբ չեն թողնում, ավելին, արժեթղթերի շուկան չթողողներից Վաչե Գաբրիելյանն ու Վարդան Արամյանը վերանշանակվել են: Այ մարդ, դուք երկիրը դարձրել եք ամրոց, վարչապետ եք նշանակում, իրա շուրջն էլ միջնաբերդ եք կառուցում, որ նա չաշխատի: Ո՞նց ա աշխատելու: Ներդրումները լինում են երկու տեսակի՝ պորտֆելային ու ուղղակի: Բա պորտֆելային ներդրումները ի՞նչ են եղել: Էն օրը մի հատ շատ միլիոնատիրոջ հետ քայլում էինք փողոցում, մարդն ասում ա՝ ուզում եմ մի 500 մլն դոլարի ակցիա առնեմ: Ասում եմ՝ հնարավոր չէ: Այո, Կենտրոնական բանկն էլ այստեղ հայտարարեց, որ դա չի անելու»,- ասաց Բագրատյանը:Պատգամավորը նաև նշեց, որ պետության հիմնախնդիրներից մեկն այսօր արտահանումների ոլորտի զարգացումն է, այդ հարցով ո՞ր մարմինն է զբաղվելու: «Ես, օրինակ, կգրեի, էկոնոմիկայի, զարգացման ու առևտրի նախարարություն: Հանրապետության ամենանեղ տեղը արտահանումն է: Ի գիտություն ձեզ, եթե մինչև նախորդ տարի ասում էիք՝ ի՞նչ եք ուզում, Վրաստանի չափ արտահանում ենք, ասեմ, որ Վրաստանն այս տարի կրկնապատկել է իր արտահանումները: Մենք արդեն տեսնում ենք, որ նրանք, ովքեր մտան, այսպես կոչված, Մաքսային միության մեջ, կատաստրոֆիկ հետ են մնում: Այստեղ լուրջ մտածելու հարցեր կան, որովհետև կամ մենք չենք կարողանում օգտվել Մաքսային միության առավելություներից, կամ դրանք չկան, կամ էլ այդ միության ղեկավարությունն այլ բանով է զբաղվում»,- հայտարարեց Բագրատյանը: