«Այս օրենքն աննախադեպ է». Արտաշես Գեղամյան

«Այս օրենքն աննախադեպ է»,- այսօր Ազգային ժողովում «Տեղական տուրքերի և վճարների մասին» Հայաստանի Հանրապետության օրենքում փոփոխություններ և լրացում կատարելու մասին հարցի քննարկման ժամանակ ասաց ՀՀԿ խմբակցության պատգամավոր, «Ազգային Միաբանություն» կուսակցության ղեկավար Արտաշես Գեղամյանը։«Ես հասկանում եմ` ինչ բնութագրում եմ տալիս: Աննախադեպ է այն տեսանկյունից, որ նա նորովի մոտեցում է դրսևորում երկրի կարևորագույն գործոններից մեկին` մանր և միջին բիզնեսին»,- ասաց նա: Ինչպես ասաց՝  Հայաստանն անցած տարվա դեկտեմբերին ընդունելով նոր Սահմանադրություն՝  ստեղծեց ինքլյուզիվ քաղաքական համակարգի համար բոլոր նախադրյալները, և հնարավորինս շատ քաղաքական ուժեր են մասնակցելու իշխանությունների ձևավորմանը, ինչը և նպաստում է տնտեսական ոլորտին՝ ինքլյուզիվ տնտեսական ինստիտուտների հիմնմանը, որի  առանցքներից մեկը հենց արդարացիության  սկզբունքի ներառումն է հարկային ոլորտում։  «Սա հիմք է տալիս, որպեսզի հնարավորինս շատ մարդիկ հնարավորություն ունենան ընդգրկվել ՓՄՁ-ների մեջ, ինչը կխթանի տնտեսության զարգացմանը, բևեռացվածության փոքրացմանը, այն խնդիրների լուծմանը, որի մասին քանիցս ասել է ՀՀԿ-ն՝ ի դեմս Սերժ Սարգսյանի և Հովիկ Աբրահամյանի, որն անգամ հրաժեշտի իր խոսքում հստակ  ձևակերպեց, որ բևեռացվածության փոքրացման տեմպերը չեն գոհացնում իրեն, դրանով է պայմանավոված նաև իր հրաժարականը, այսինքն՝ խնդրի լուծման բանալիներից մեկը մենք գտել ենք»,- հայտարարեց Ա. Գեղամյանը։