Ուռճացրել է համակարգը

Կառավարության վերջին  նիստում կայացված որոշումը, ըստ որի, Քաղաքաշինության նախարարությունն ու Մշակույթի նախարարության Պատմության և մշակույթի հուշարձանների պահպանության գործակալությանը վերամիավորմաբ ստեղծելու է  Ճարտարապետության և մշակութային արժեքների պահպանության կոմիտե, իսկական շոկ է եղել քաղաքաշինության նախարարության աշխատակազմի համար: Որոշումը եղել է անսպասելի, ու հիմա բոլորը մի ներքին հույս են փայփայում, որ Ազգային ժողովում իրենց նախարարության  լուծարման մասին որոշումը չի ընդունվի, թեպետ  մարդիկ նաև հասկանում են, որ այդ տարբերակի  հավանականությունը շատ քիչ է: Սովորական աշխատողների համար  գործազուրկ դառնալու հեռանկարը շատ իրատեսական է, ու նրանցից շատերը կանգնած են օրվա հացից զրկվելու վտանգի առջև: <<Կան մարդիկ, որ այդ աշխատավարձի հույսով վարկ են վերցրել ու մի քանի տարվա ընթացքում մաս-մաս պիտի վճարեին այդ վարկը, կան մարդիկ, որ բուհում սովորող երեխա ունեն՝  ուսման վարձ են վճարում, բոլորը խառնվել են իրար, չգիտեն ինչ են անելու>>,- մեզ հետ զրույցում պատմեց  աշխատակիցներից մեկը, ավելացնելով, որ քաղաքաշինության նախարարությունն այժմ 200-ից ավելի աշխատակից ունի, մինչդեռ, իրենց լսելով նորաստեղծ կոմիտեն ընդամնեը 50 աշխատակից է ունենալու: Նշենք, որ քաղաքաշինության նախարար Նարեկ Սարգսյանն այս պահին ունի երեք տեղակալ, մամուլի քարտուղար, խորհրդականների  և օգնականների մասին նախարարության  կայքում տեղեկություն չկա: Նախարարության աշխատակազմն ունի  աշխատակազմի ղեկավար, երկու տեղակալ և 20 կառուցվածքային և առանձնացված ստորաբաժանում, այդ թվում 15 վարչություն և բաժին, ԾԻԳ` Հայաստանի Հանրապետության քաղաքաշինության նախարարության «Քաղաքաշինական ծրագրերի իրականացման գրասենյակը», «Քաղաքաշինական ծրագրերի փորձագիտական կենտրոն» ԲԲԸ-ն,  «Ալեքսանդր Թամանյանի անվան ճարտարապետության ազգային թանգարան-ինստիտուտ» ՊՈԱԿ –ը, Լիցենզավորման կենտրոն գործակալություն և Քաղաքաշինական պետական տեսչությունը: Համակարգի  աշխատակազմի այն հատվածը, որոնք քաղաքացիական ծառայողներ են,  թվով 200-ից ավել են: Քաղաքաշինության նախարարությունը փաստացի ամենաուռճացված կառույցներից մեկն է, նախարարությունում այս պահին ազատ հաստիքներ չկան: Նախարար Նարեկ Սարգսյանը հնարավոր բոլոր տարբերակներով համակարգը համալրել է սեփական կադրերով և նրանք  ավելի մեծ շանս ունեն հայտնվելու նորաստեղծ կոմիետում, քան համակարգի ավելի հին ու փարձառու աշխատողները: Քաղաքաշինության ԾԻԳ-ն  իրականացնում է  պետական ծառայողների  համար նախատեսված բնակելի  շենքի կառուցման և պետական միջոցներով իրականացվող վերանորոգման և շինարարական ծրագրեր / դպրոցների, հիվանադանոցների հիմնանորոգում և այլն/: Եթե սրան ավելացնենք նաև Պատմության և մշակույթի հուշարձանների պահպանության գործակալությունը, որը ևս միավորվելու է նորաստեղծ կոմիտեում, ապա պարզ կդառնա, որ կադրային շեշտակի կրճատումներն անխուսափելի են լինելու: Նշենք, որ Պատմության և մշակույթի հուշարձանների պահպանության գործակալությունն ունի կենտրոնական  և տարածքային մարմիններ . Երևանի տարածքային բաժին, Արմավիրի և Արարատի տարածքային բաժին, Արագածոտնի և Շիրակի տարածքային բաժին, Կոտայքի և Գեղարքունիքի տարածքային բաժին, Վայոց ձորի և Սյունիքի տարածքային բաժին, Լոռու և Տավուշի տարածքային բաժին: Ընդ որում այս կառույցը  մշակույթի ոլորտում ստանում է ամենալուրջ ֆինանսավորումը, որը, փաստորեն, մշակույթից կանցնի նոր կոմիտեին: Վերամիավորման որոշումը ԱԺ-ում հաստատվելուց հետո գոյություն ունեցող քաղաքաշինության նախարարությունը և Պատմության և մշակույթի հուշարձանների պահպանության գործակալությանը կլուծարվեն: Գործող կարգի համաձայն՝ աշխատողները պետք է երկու ամիս առաջ այդ մասին ծանուցվեն, ապա նրանք՝ իբրև քաղաքացիական ծառայողներ կգրանցվեն քաղծառայության կադրերի կարճաժամկետ ռեզերվում և 6 ամիս կստանան իրենց աշխատավարձը: Դրանից հետո այդ մարդիկ, փաստացի, կդառնան գործազուրկ: Դավիթ Մանուկյան