Կարեն Կարապետյանն այդ հարցը պետք է տար Սերժ Սարգսյանին

Կառավարության նիստերը սկսել են թեթև ժանրի ներկայացումների վերածվել: Նորանաշանակ վարչապետ Կարեն Կարապետյանի  ու նախարարների ակտիվ երկխոսությունները կարծես թե դառնում են կայուն  ավանդույթ, ապահովելով տեսարան և բարձր տրամադրություն՝ առայժմ առանց հարցի:  Սեպտեմբերի 22-ի նիստի սկզբում, երբ աշխատակազմի ղեկավար-նախարար Դավիթ Հարությունյանը ներկայացնում էր կառավարության համար  ավիափոխադրման ծառայությունների գնման գործընթացը, վարչապետն անսպասելի ընդհատել է  ու հանձնարարել <<պրիմիտիվ գողությունները>>  վերացնել.<<Հանձնարարական՝ մենք  բավականին բարդ մեխանիզմներ ենք ընտրելու, որպեսզի պրիմիտիվ գողությունը վերացնենք:  Վերացրեք պրիմիտիվ գողությունը ձեր համակարգերում, այդ ամեն ինչը կարգի բերեք: Ինձ որ պատմում են՝ ինչ սխեմաներ են անում՝ ուղղակի  ֆանտազիայի վրա... Եթե այդ մարդիկ այդ խելքն օգտագործեն մեկ այլ տեղերում, հաստատ էֆեկտը շատ ավելի լավը կլիներ>>,- նշել է վարչապետը: Այնուհետև կառավարության նոր կառուցվածքի ներկայացման ժամանակ վարչապետը  էկոնոմիկայի նախարար Արծվիկ Մինասյանին ու մշակույթի նախարար Հասմիկ Պողոսյանին շատ հանգիստ զգացնել է տվել, որ նրանց կարծիքներն իրենց կողմից ղեկավարվող ոլորտների հետ կապված  առնձնապես կարևոր չեն:  Բանն այն է,   որ ըստ կառավարության նոր կառուցվածքի՝  մշակույթի նախարարությունից վերցվում է  հուշարձանների պահպանության գործակալությունը, իսկ էկոնոմիկայից՝ տուրիզմը: Բայց սա,  խոսակցության առանձին թեմա է՝ հավանաբար մասնագետները պիտի քննարկեն ու գնահատեն,  թե որքանով է տրամաբանված այդ մոտեցումը: Բավականին ուշագրավ  երկխոսություն է ծավալվել նաև վարչապետի ու ԿԳ նախարարի միջև: Թեպետ Կարեն Կարապետյանը, ըստ ԶԼՄ հրապարակումների ընդգծված դրական վերաբերմունք ունի դաշնակցական այս նախարարի հանդեպ և նա այն եզակիներից է, ում փոփոխության  հարցը անգամ չի էլ շոշափվել: Կառավարության նիստում սակայն, երբ  Լևոն Մկրտչյանը ներկայացրել է «Գյումրու Մ. Նալբանդյանի անվան պետական մանկավարժական ինստիտուտ» պետական ոչ առևտրային կազմակերպությունը «Շիրակի Մ. Նալբանդյանի անվան պետական համալսարան» հիմնադրամի վերակազմավորելու և գույք տրամադրելու մասին հարցը,  Կարեն Կարապետյանը դիտողություն է արել նրան, ասելով, որ մինչև վերջ այդպես էլ չհասկացավ, թե ինչ փոփոխություն է առաջարկում Լևոն Մկրտչյանը, և ընդհանրապես ինչո՞ւ են բուհերը դառնում հիմնադրամ: ԿԳ նախարարի պաշտոնակատարը  մանրամասնել է խնդիրը՝ նշելով, որ այս գործընթացը տարբեր բուհերում արդեն կատարվել է և ընդհանուր քաղաքականության համատեքստում հիմնադրամ է դառնում նաև Գյումրու Մ. Նալբանդյանի անվան պետական մանկավարժական ինստիտուտը: Նախարարը նաև մանրամասնել է, որ  ոլորտում կան խնդիրներ, և առկա վիճակը իրեն էլ չի բավարարում, այդ նպատակով էլ նախաձառնվել է բարձրագույն  և հետբուհական կրթության մասին օրենքի փոփոխություն, որը  հոկտեմբերի 1-ին կդրվի հրապարակային քննարկման, որտեղ  կփորձեն խնդիրները բարձրացնել և լուծումներ առաջարկել: «Եթե հոկտեմբերի 1-ին պիտի քննարկենք, այսօր սեպտեմբերի քսան քանինսն է, ինչո՞ւ եք բերել այս որոշումը»,- հարցրել է  Կարեն Կարապետյանը  և հայտարարել, որ ինքը դեմ է իներցիայով ու կիսատ- պռատ մոտեցումներով առաջնորդվել և  տալ լուծումներ՝ վստահ չլինելով, որ դրանք լավագույնն են: Վարչապետի դիտողությունն  այս տեսանկյունից, թերևս ճիշտ է.  եթե քննարկվում է  ոլորտի վերաբերյալ օրենքի փոփոխությունը,   ընթացիկ մյուս փոփոխությունները կարող են հետաձգվել գոնե մինչ օրենքի փոփոխությունը: Ինչ վերաբերում է բուհերի իրավական կարգավիճակի փոփոխություններին՝ ապա այստեղ իսկապես հարցեր կան: Այս գործընթացը սկսվեց մի քանի տարի առաջ: Առաջինը հիմնադրամի կարգավիճակ ստացավ Ագրարային համալսարանը, այնուհետև մեկը մյուսի հետևից հիմնադրամների վերածվեցին նաև պոլիտեխնիկը, ԵՊՀ-ն, բժշկական համալսարանը և մյուսները:  Թեպետ պաշտոնական հիմնավորումն այն է, որ հիմնադրամի կարգավիճակում բուհերն ստանում են ավելի ազատ ֆինանսատնտեսական գործունեություն վարելու և իրենց ակադեմիական ազատությունների շրջանակը ընդլայնելու հնարավորություն, սակայն իրականության մեջ բոլորը հասկանում են, որ հիմնադարմ դառնալով լուծվում է  ռեկտորների ցմահ պաշտոնավարման հարցը: Ռեկտորները  ձեռուոտ ընկած իրենց բոլոր կապերն օգտագործեցին, որ բուհերը ստանան հիմնադրամի կարգավիճակ: Զարմանալի  զուգադիպությամբ ռեկտորնեը որպես կանոն հիմնադարամի վերածվելու հարցը բարձրացնում են իրենց 65 տարին լրնալու նախաշեմին, որովհետև ՊՈԱԿ-ի կարգավիճակում տարիքային այդ շեմն հատելուց հետո նրանք ստիպված կլինեին հրաժեշտ տալ իրենց պաշտոններին: Հայտնի է նաև, որ այս հարցը ժամանակին լուծում է ստացել նախագահ Սերժ Սարգսյանի անմիջական համաձայնությամբ: Կարեն Կարապետյանը  համեմատաբար նոր մարդ է մեր իրականության մեջ և  որոշ նուրբ էլևեջներից կամ տեղյակ չէ կամ էլ ձևացնում է, թե տեղյակ չէ: Ամեն դեպքում, եթե Կարեն Կարապետյանը իսկապես ուզում է իմանալ, թե ինչ իմաստ ունի բուհերը դարձնել հիմնադրամ, ապա այդ հարցը  գործող նախարարին կամ նրա նախորդին  ուղղելը սխալ է: Այդ հարցը պետք է տալ Սերժ Սարգսյանին, իսկ որպես շարունակություն պետք է խնդիր դնել, որպեսզի բուհերը դադարեն հիմնադրամներ դառնալուց, քանի դեռ դրա արդյունքում կրթության որակը ոչինչ չի շահում:   Դավիթ Մանուկյան