Կարեն Կարապետյանի կարեւոր վրիպումը
Հայտնի դարձան կառավարության կազմում առաջին փոփոխությունները, և անմիջապես վեր բարձրացան սրերը՝ նորանշանակ վարչապետ Կարեն Կարապետյանից դա չէին սպասում: Մասնավորապես, Վաչե Գաբրիելյանի ու Դավիթ Հարությունյանի վերանշանակումը ի չիք դարձրեցին այն ճոռոմ խոստումները, թե կառավարման համակարգը թարմացման ու արագ զարգացման է տարվելու: Կառավարության կազմը համալրած նոր դեմքերը ոչ մի բանով աչքի չընկած, գործնական կենսագրություն չունեցող երիտասարդներ են: Նրանք, ամենայն հավանականությամբ, հայտնվել են նոր կառավարությունում բացառապես Կարեն Կարապետյանի հետ ունեցած անձնական կապերի արդյունքում։ Կապի և տրանսպորտի նորանշանակ նախարարը Վահան Մարտիրոսյանն է։ Նրա մասին հայտնի է ընդամենը, որ նա «Ռոստելեկոմ»-ի նախկին աշխատող է եղել, այսինքն, նա ՀՀ կառավարություն է գործուղվել ռուսաստանյան շրջանակների կողմից: Իգնատի Առաքելյանը գյուղատնտեսության նախարարի պաշտոնն է զբաղեցնելու՝ փոխարինելով Սերգո Կարապետյանին։ Նա էլ Երևանի կոնյակի գործարանի տնօրենն էր 2015 թվականից, Առաքելյանի կյանքում գործնական առաջընթաց եղել է միայն այս գործարանի շրջանակներում, այլ մանրամասներ նոր նախարարի մասին հնարավոր չէ գտնել։ Էներգետիկայի եւ բնական պաշարների նորանշանակ նախարարի մասին էլ առանձնապես առատ նյութ չունենք: Աշոտ Մանուկյանը հայտնի է միայն, որ «Հրազդան Ջեկ» -ի տնօրենն էր։ Այս ընկերության միակ բաժնետերն է հանդիսանում «ԻՆՏԵՌ ՌԱՕ» բաց բաժնետիրական ընկերությունը, և կարելի է ենթադրել, որ Աշոտ Մանուկյանը եկել է ՀՀ կառավարության համակարգ ռուսական կապերի շնորհիվ։ Միակ քիչ թե շատ հայտնի նախարարը ֆինանսների նախարարի պաշտոնը ստանձնած Վարդան Արամյանն է, ով մինչ այդ ՀՀ նախագահի աշխատակազմի ղեկավարի առաջին տեղակալն էր։ Արամյանի ստեղծագործական վերելքը կայացել է շնորհիվ Տիգրան Սարգսյանի, ԿԲ նախագահի պաշտոնավարման ընթացքում 2003 թվականին նա Արամյանին նշանակեց ԿԲ դրամավարկային քաղաքականության վարչության և արտաքին հարաբերությունների բաժնի պետ։ 2008 թվականին էլ նշանակեց ֆինանսների նախարարի առաջին տեղակալ։ Վարդան Արամյանի թռիչքը կասեցվեց, երբ պաշտոնանկ եղավ Սարգսյանը, Արամյանը ֆինանսական հաշտարարի գրասենյակում հոգաբարձուների խորհրդի անդամի պաշտոն ստացավ ու հիմա միայն տեղի ունեցավ նրա անսպասելի թռիչքը:
Իհարկե, լավ է, որ Գագիկ Խաչատրյանին վերջապես հեռացրեցին այդ գերատեսչությունից, սակայն նրան փոխարինելու եկած անձը ավելի լավ հույսեր նույնպես չի ներշնչում: Համենայն դեպս Կարեն Կարապետյանից սպասումներն այլ էին, չէ՞ որ նրա վերադարձը կազմակերպվեց գրեթե փրկչի հայտնության մոտիվացիայով, Սերժ Սարգսյանն ընդգծեց նրա պրոֆեսիոնալիզմը, բարեփոխիչ լինելու մեծ շնորհը: Պարզվեց նաեւ, որ նա լիակատար ազատություն ունի կադրերի ընտրության հարցում, ինչը տրված չէր իր նախորդին: Հովիկ Աբրահամյանի կառավարության կաբինետի ձեւավորումն, օրինակ, վերապահված էր Սերժ Սարգսյանին, բացառությամբ մեկ-երկու նշանակումների, որոնց թվում էր Արփինե Հովհաննիսյանի նշանակումը Արդարադատության նախարարի պաշտոնում: Հովիկ Աբրահամյանին նույնիսկ ընձեռված չէր իր հակառակորդներից, օրինակ Գագիկ Խաչատրյանից ազատվելու հնարավորությունը: Իսկզբանե, նախկին վարչապետի կաբինետից տպավորություն էր ձեւավորվել, որ ինչքան վարկաբեկված մարդ կա, նախարարի պաշտոն են տվել, սակայն Կարեն Կարապետյանի դեպքում բոլորովին այլ իրավիճակ է: Մինչեւ անգամ ամենամեծ կապեր ունեցող Գագիկ Բեգլարյանը հրաժեշտ տվեց իր պաշտոնին:
Թեեւ տեղեկություններ կային, որ Սամվել Կարապետյանն է բարեխոսել նրա պաշտոնի համար, որը Կարեն Կարապետյանի մտերիմն ու գործընկերն է: Ինչեւէ, բարեփոխումների մասին հորջորջող իշխանությունը երկու տարբերակ ուներ, կամ կառավարության կաբինետը պետք է համալրվեր պրոֆեսիոնալ, վաստակաշատ մարդկանցով, հզոր բարեփոխիչներով, որպեսզի հնարավոր լինի բարեփոխումների ալիք բարձրացնել, կամ էլ այդ պաշտոններում նշանակվեին անփորձ երիտասարդներ, որոնց կղեկավարեր հզոր բարեփոխիչ:
Մինչդեռ Կարեն Կարապետյանի դեպքում նման պնդում անել հնարավոր չէ հենց թեկուզ այն պատճառով, որ նա իր կաբինետում պահեց երկու մարդկանց, որոնք մեղմ ասած չեն տեղավորվում բարեփոխումների խոստման ծիրում: Օրինակ՝ Վաչե Գաբրիելյանի պես ալարկոտ եւ կաղապարված , ոչ պրագմատիկ մեկ ուրիշին դժվար է պատկերացնել, ինչպես որ դժվար է պատկերացնել ներիշխանական ինտրիգների ավելի կատարելագործված վարպետի, քան Դավիթ Հարությունյանն է, որը համատեղության կարգով բոլոր ժամանակներում միշտ բարձր պահել նաեւ տվյալ համակարգի դեմագոգության աստիճանը:
Անի Սահակյան
Հետևեք մեզ Viber-ում
