Բոլորից խռոված և բոլորի վրա «մուննաթ» գալով
Ադրբեջանում հակաարևմտյան արշավը շարունակվում է ողջ ուժով... Ադրբեջանի նախագահ Իլհամ Ալիևը ընդունել է ԵՄ-Ադրբեջան միջխորհրդարանական համագործակցության հանձնաժողովի անդամներին ու Եվրախորհրդարանին մեղադրել է Ադրբեջանի հանդեպ «կանխակալ» դիրքորոշման համար: Նա քննադատել է արևմտյան այլ կառույցների, որոնք հայտարարություններ են տարածում Ադրբեջանում մարդու իրավունքների խախտման մասին: Ալիևը «թշնամական ակտ» է որակել մեկ տարի առաջ Եվրախորհրդարանի ընդունած բանաձևը, որը հարված է հասցրել Ադրբեջանի հեղինակությանը և լուրջ հետընթացի պատճառ հանդիսացել երկկողմ հարաբերություններում: Ադրբեջանի նախագահն իր անհամաձայնությունն է հայտնել այն թեզիսին, որ վերջին 5 տարում Ադրբեջանում վատթարացել է մարդու իրավունքների շուրջ տիրող իրավիճակը: Նա հերքել է, որ Ադրբեջանում լրագրողներն ու քաղաքացիական հասարակության ներկայացուցիչները հետևողականորեն ենթարկվում են հալածանքների: Այնուհետև Ալիևը ԵՄ-Ադրբեջան միջխորհրդարանական համագործակցության հանձնաժողովի անդամների հետ հանդիպման ժամանակ անդրադարձել է 2015թ. ամռանը Բաքվում ԵԱՀԿ գրասենյակի փակմանը: Նրա խոսքով՝ դրա պատճառը եղել է ԵԱՀԿ Բաքվի գրասենյակի ղեկավարի պաշտոնից Ֆրանսիայի քաղաքացի Ալեքս Շախտախտինսկու պաշտոնանկությունը, ինչը տեղի է ունեցել ԵԱՀԿ-ում ԱՄՆ մշտական ներկայացուցչության միջամտության արդյունքում: Ադրբեջանական արմատներով Շախտախտինսկին տվյալ պաշտոնում մնացել է ընդամենը մեկ տարի: Ալիևն ընդգծել է, որ Շախտախտինսկու պաշտոնանկության պատճառները եղել են նրա աշխատասենյակում Ադրբեջանի նախագահի հետ նրա լուսանկարի առկայությունը: «Ֆրանսիայի կառավարության վրա ԱՄՆ ճնշման ներքո Շախտախտինսկին ազատ արձակվեց ԵԱՀԿ Բաքվի գրասենյակի ղեկավարի պաշտոնից: Վերջ տրվեց նրա կարիերային, նա հեռացվեց Ֆրանսիայի ԱԳՆ-ից: Ի՞նչ կարող եմ ասել ես, եթե ԵԱՀԿ-ում ԱՄՆ ներկայացուցչի կարծիքով՝ ինձ հետ լուսանկարվելը հանցանք է: Ես ասացի՝ եթե Շախտախտինսկուն պաշտոնանկ անեն, ապա գրասենյակը կփակվի: Այն ժամանակ ես զգուշացրի, սակայն ինձ չլսեցին, և մենք արեցինք դա: Այժմ նրանք ցանկանում են վերականգնել գրասենյակի գործունեությունը, իսկ ես նախապայման ներկայացրեցի՝ ասելով՝ վերադարձրեք Շախտախտինսկուն, վերականգնեք արդարությունը, կարիերան, և մենք վերստին կբացենք գրասենյակը», ասել է Ադրբեջանի նախագահը: Բայց սա դեռ ամենը չէ, այնուհետև Ալիևը քննադատել է Freedom House-ին՝ այն որակելով որպես հայամետ կազմակերպություն: Նա բողոքել է, որ Freedom House-ը Ադրբեջանը համարում է ոչ ազատ պետություն, որ Ադրբեջանում համացանցը մասամբ է ազատ, որ Եվրասիայում 10 տարիների ընթացքում Ադրբեջանը մյուս երկրներից հետ է մնում ժողովրդավարական կառավարումից: «Պատկերացնո՞ւմ եք, դա ժպիտ է առաջացնում», նկատել է Ալիևը` հավելելով, որ Freedom House-ը հայամետ դիրքորոշում է որդեգրել. «Քանի որ Freedom House-ը հայամետ դիրքորոշում է որդեգրել և պարբերաբար հարձակվում է Ադրբեջաննի վրա` մեր երկիրն այդ կազմակերպության հետ ոչ մի կապ չի պահպանում»: Նա որպես այդ կազմակերպությունում ընդդեմ Ադրբեջանի հանդես եկող ու Ադրբեջանը ուժգին քննադատող է մատնանշել Դեյվիդ Քրամերին. «Մենք ոչ մի նշանակություն չենք տալիս Freedom House-ի զեկույցներին»: Ինչպես նկատում ենք, Ալիևն ապրում է բոլորովին այլ իրականությունում: Նա հանգիստ նստում է եվրոպացի իրավապաշտպանների, պաշտոնյաների առջև ու սուտ խոսում` ասելով, թե իբր իր երկրում չկան քաղբանտարկյալներ, ազատազրկված մամուլի ներկայացուցիչներ ու իրավապաշտպաններ: Իհարկե, ալիևյան իրականությունը որքան բարձր է ասվում, այնքան դրան հավատացողների քանակը պակասում է: Բայց կարևորը` չի սասանվում ալիևյան ռեժիմը: Թեև վերջերս Ադրբեջանում ընդդիմության բազմահազարանոց հանրահավաքը, որ թույլատրվել էր բացառապես այն պատճառով, որ առաջիկայում Ադրբեջանում սահմանադրական հանրաքվե է տեղի ունենալու, որոշակիորեն ցույց տվեց, որ այդ երկրում հազարավոր մարդիկ չեն վախենում դուրս գալ բողոքելու ընդդեմ Ալիևի կլանի: Մետաքսյա Շալունց