Սերժ Սարգսյանը բացահայտել է իր ամենամեծ ձեռքբերումը

ՀՀ անկախության 25-րդ տարեդարձի առթիվ կազմակերպված հանդիսավոր համերգի ժամանակ, ելույթ ունենալով Կ. Դեմիրճյանի անվան մարզահամերգային համալիրում, նախագահ Սերժ Սարգսյանը հայտարարել է, որ անկախության 25 տարիների ամենամեծ ձեռքբերումը անկախության սերունդն է: Նախագահի խոսքով՝ Հայաստանի անկախության 25 տարիները հաստատում են, որ հայ ժողովրդի փոխարեն իր առջև ծառացած խնդիրները ոչ ոք չի լուծելու: «Անկախության սերունդն աստիճանաբար գալիս է ստանձնելու այդ պատմական պատասխանատվությունը: Նա օտարի աչքի փուշը տեսնելուց առաջ խոսում է մեր աչքի գերանի մասին: Սա ճիշտ ճանապարհ է, քանի որ մեր բոլոր խնդիրների լուծումները մեր մեջ են. որքան հասուն լինենք որպես հասարակություն, այնքան ավելի արագ կլուծենք մեր հարցերը: Մենք գնում ենք արդար աշխատանքի, արդար վաստակի և ճշմարտությունն ասելու ճանապարհով: Մեր հարստությունը մեր հասարակությունն է. ինչքան լավ բան կա մեր երկրում, արել է հենց նա՝ Հայաստանի Հանրապետության քաղաքացին՝ անկախ նրանից, թե ով է եղել իշխանության ղեկին»,- ընդգծել է Սերժ Սարգսյանը: Փաստորեն Սերժ Սարգսյանը փաստում է, որ երկրում իրավիճակ է փոխվել, ու այդ համատեքստում նա անդրադարձել է նաև երկրում կատարվող կադրային վերջին փոփոխություններին ու նոր սահմանադրության իրագործմանը. «Այսօր մեր երկիրը բարեփոխումների նոր արագացված փուլ է մտել: Դրանք սոսկ կադրային փոփոխություններ չեն, ինչպես ոմանք են կարծում: Դրանք համակարգային փոփոխություններ են, որոնց արդյունքում ունենալու ենք որակապես նոր պետություն: Ասվածը լոկ բարի ցանկություն չէ, այլ նախանշված հստակ քայլերի հաջորդականություն: Մենք գիտենք, թե ուր ենք գնում և ինչպես պետք է հասնենք այնտեղ: Եթե մի ամբողջ ազգ ուզում է նորոգել իր տունը, ապա նա դա կարող է անել: Մեզ ոչ ոք չի կարող խանգարել այդ ճանապարհին, իսկ նորացված Սահմանադրությունը կդառնա այդ ուղին լուսավորող վառ փարոսը»,- հայտարարել է Նախագահը: Կարելի է արձանագրել, որ սա շատ լուրջ, նույնիսկ շրջադարձային փոփոխություն է Սերժ Սարգսյանի՝ հասարակության հանդեպ ունեցած մոտեցումներում: Այլևս ոչ մի գաղջ մթնոլորտ. հասարակությունն է ճիշտ, երբ խոսում է իշխանության, այդ թվում նախագահի թերացումներից, որովհետև դրանից է ծնվում ձեռքբերումը: Եվ սա ասում է երկրի ղեկավարը, ով 2013 թվականի ընտրություններից հետո ԶԼՄ-ների հետ հանդիպման ժամանակ հայտարարեց, որ մեր երկրի գլխավոր խնդիրը գաղջ մթնոլորտն է. «Մեր երկրի ամենամեծ պրոբլեմը մարդկանց մեջ չի, մեր երկրի ամենամեծ պրոբլեմը կաշառակերները չեն, մեր երկրի ամենամեծ պրոբլեմները հանցագործները չեն, մեր երկրի ամենամեծ պրոբլեմը գաղջ մթնոլորտն է: Այդ գաղջ մթնոլորտը պետք է վերանա: Օգնեք, որպեսզի վերանա այս մթնոլորտը: Դա միայն իշխանությունների պատասխանատվության ոլորտում չի: Արտագաղթի համար առաջին պատասխանատուն իշխանությունն է, բայց միայն իշխանությունը չի, որովհետև Հայաստանից արտագաղթում են ոչ թե նրա համար, ինչպես հաճախ ասում եք՝ արդարության պակասի կամ աշխատատեղ չլինելու հետևանքով: Եթե մի քիչ նեղություն տաք ձեզ, տեսնեք, թե արտագաղթողներն ո՞ւր են գնում և համոզվեք, որ նրանց ճնշող մեծամասնությունը գնում է Ռուսաստան, ապա պիտի եզրակացնեք, գոնե այս պարզ տրիվիալ բանը պետք է տեսնեք, որ հայերի համար Ռուսաստանում արդարությունն ամենահասանելին չի, որ Հայաստանում հայի համար արդարությունն ավելի հասանելի է, քան Ռուսաստանում: Եթե պատճառը դա է, ապա ինչո՞ւ են գնում Ռուսաստան: Իսկ այն մարդիկ, ովքեր 16 ժամ աշխատում են, եթե Հայաստանում 16 ժամ աշխատեն, չե՞ն կարող իրենց ընտանիքները պահել: Կարող է մի փոքր քիչ ստանան, ինչին ես կասկածում եմ, բայց հնարավորություն կունենան իրենց ընտանիքները պահելու: Արտագաղթի բուն պատճառը հենց այդ գաղջ մթնոլորտն է, այն, որ մարդիկ լույս չեն տեսնում, հույս չեն տեսնում»,- 2013 թվականի մարտին լրատվամիջոցների հետ հանդիպման ժամանակ հայտարարել էր նախագահը՝ ավելացնելով, որ այդ գաղջ մթնոլորտի պատճառը որոշ լրատվամիջոցների գործունեությունն է, որոնք անընդհատ սևացնում են իրականությունը: Սերժ Սարգսյանը փաստում է, որ երեքուկես տարվա ընթացքում լուծել է գաղջ մթնոլորտի ու դրա սկզբնաղբյուրների հարցը: Իսկ դա ամենամեծ ձեռքբերումն է, որը Սերժ Սարգսյանը հպարտորեն ներկայացնում է անկախության 25-ամյակին: Կարինե  Սարիբեկյան