Պարտադրել խաղաղություն
Ցանկացած բանակ աշխարհում, ունի զինատեսակ, որ աշխարհին ցույց չի տա, բնականաբար, և կան զինատեսակներ, որ, այո, առաջին անգամ միայն զորահանդեսներին կերևան, երեկ «Ազատության» հետ զրույցում ասել է Հայաստանի պաշտպանության նախարարի մամուլի քարտուղար Արծրուն Հովհաննիսյանը։ Դիտարկմանը, որ մամուլում շրջանառվում է, թե Հայաստանի զինված ուժերի կողմից ձեռք է բերվել «Իսկանդեր M» օպերատիվ-մարտավարական հրթիռային համալիր, և հարցին, թե արդյո՞ք դա համապատասխանում է իրականությանը, Հովհաննիսյանն արձագանքել է. «Ես չեմ պատասխանի այդ հարցին, ինտրիգը կմնա մինչև սեպտեմբերի 21-ի զորահանդեսի պաշտոնական հայտարարությունները։ Եվ այդպես ավելի հետաքրքիր կլինի»։ Հովհաննիսյանը, սակայն հորդորել է չգնալ սիրողական գնահատականների՝ հակառակ ծայրահեղությամբ։ «Ապրիլյան պատերազմին, երբ մեր դաշտում սկսեցին, թույլ տամ ինձ այդպիսի բառեր օգտագործել՝ վատ, անլուրջ գնահատականներ բանակի զինանոցի մասին՝ բացասական իմաստով՝ փամփուշտ չկա, էս չկա, էն չկա և այլն, նման, ներողություն արտահայտությանս համար, հիմարությունները մեծ տեղ գտան հանրության մեջ, ես ցավով դա արձանագրեցի և ասեցի՝ «ժողովուրդ, սրանով մեծ վնաս ենք տալիս մենք մեզ, չի կարելի այսպիսի ծայրահեղության մեջ ընկնել»։ Հիմա դրան հակառակ մեկ այլ ծայրահեղության մեջ եք ընկնում», ասել է նա՝ շարունակելով. «Մեկ երկու զինատեսակներ կան, որ մենք սկսում ենք աստվածացնել՝ ասելով, որ «այ, եթե «Իսկանդեր»-ն ունենք, «Սմերչ»-ը ունենք, «ՏՈՍ»-ը ունենք, ապա վերջ, Ադրբեջանը պարտված է»։ Չի կարելի, սրանք լուրջ չեն, պետք չէ մարդկանց մանիպուլացիաների ենթարկել նման գաղափարներով»։ Իսկապես, մենք բավական հաճախ ենք ընկնում ծայրահեղությունների գիրկը, թե լավի, թե վատի իմաստով: Գերժամանակակից զինատեսակներ ունենալն, իհարկե, որոշակի պաշտպանվածության, հակառակորդին զսպելու կոնկրետ երաշխիք է: Բայց ոչ 100 տոկոսանոց, այն էլ` Ալիևի նմանի դեպքում: Հայկական բանակի ոգին ևս կարևոր է, բայց այն էլ բավարար երաշխիք չէ: Պետությունն ամուր է ոչ միայն իր բանակով, այլ երկրի ներսում` քաղաքացիներով, որոնք ցանկանում են ապրել հայրենիքում, շենացնել հայրենիքը ու պահել այդ բանակը: Իսկ «Իսկանդերն» ու «Սմերչը», եթե Աստված մի արասցե, կարիք լինի` կօգտագործվեն... Հայաստանի Անկախության 25-ամյակը չպետք է ասոցացվի պատերազմի հետ: Իհարկե, մենք երբեք չպետք է բացառենք պատերազմի հավանականությունը: Բայց Հայաստանն ամեն ինչ պետք է անի, որպեսզի խաղաղություն թելադրի, պարտադրի ու ստիպի հակառակորդին, որպեսզի Ալիևը երբեք չունենա կասկածներ, որ` պատերազմ սանձազերծելու դեպքում` կարող է ինչ-ինչ առավելությունների հասնել: Իսկ դա բացառապես զինատեսակների առկայությունը չի ստիպելու նրան այդպես մտածել: Մետաքսյա Շալունց